Mokokchung Town Baptist Arogo otsü nung tapak tasen ka asütsüsa MTBA kübok Skill Training Entrepreneurship and Placement (STEP) ludeni ayongzüka lanur ishika nem pei jangraba mapa tenzüktsü (startup) atema senotsü terara aputsüba mapatong ka tenzükba den shishilembaba dak sentakba nung shisatokden sentong tajung ka July 13 nü MTBA senden kilem nung kaogo.
STEP mapatong kübok lanur 12 nem pei jangraba mapa balala tenzüktsü atema arogoi tetemlok meketi sen terara aputsüogo. STEP ya mission mapa ka lir aser ibai tongtibangsa lanur mapa makartem mapa inyakdaktsütsü maongka lapoktsüba den pei sasa tepok sünga taküm liteta odaktsütsü aser lenmangtem tuyutsü nükjidong nung tentetba lir. Iba sen ya tetemlok meketi aputsür saka tapurtemi mapang tetaktet ka lir tesülen sentsüh ji aotsü.
Tanü shisatokden sentong nung shisalen sayur Mokokchung Chamber of Commerce & Industry (MCCI) tir aser STEP luden nung züngsem, Tsükti Longkumer-i jembidang, shishilembaba mapa koda tenzüker aser shishilembar kaji shiba, parnok dak kechi jakla akettsü tim item onük dak ajemdaker tagitsü onük aika rateta ashi.
Shishilembar ka jagi nübur taginüba/ungdakba metettsüla aser pai/lai inyakba mapa jagi nübur nem tajangzük agütsütettsüla, ta pai ashi. Shishilembar (entrepreneur) kati rongsen aahba dang masü pai/lai mapa yanglua nüburtem nem mapa inyaktsü maongka lapoktsür aser alima rongsenkettsüng renloktsü atemaji shishilembartem dak tulu keta lir, ta paisa shisem.
Paisa shishilembar ka dak lidaktsünüba jakla kar lemsatepdang, pai/lai nüburtem nem service tajung agütsütsüla, rongsen aser senotsü junga ketdang sütettsü tim, meranga inyakba den rongsen rizüngba (savings) sobaliba benshitsüla, ochishiba, mapang amshiyim metettsüla aser shishilembaba mapa inyaktsü atema timtem aremtettsüsa jakla alitsüla, ta paisa ajungshia liasü.
Asen yimti renloka aotsü asoshi liso shishilembaba (local market) kati ka ajungshiteptsüla, kechiyong iba inyakyim nungji kati ka ajungkettsür aser yangji tajangzük aika keta lir, ta paisa kuli den tatishitsü kar bener arua lemsatep.
Takok angutsü atema lenmang anasaba mali, teinyaktsü ajak agi erangtsüba dang, kodang meranga inyakdir, yamaji tia tajungba moatsür, ta paisa shisem.
Iba sentong nung MTBA Pastor Rev. Ponen Longchar, Assoc. Pastor, Rev. Temsuwati, Rev. P. Chuba Jamir, Assoc. Pastor & STEP Convenor, Monglier parnoki shilem balala agia liasü.
(Source: Tir Yimyim)
The Nokinketer 