(Takümbo Nagaland open asayadaktsütsü)

MDFA Trophy 2023 dak sentakba nung osangbener senden amendang tangokba noksa. (www.nokinketer.com)

Taküm atema shimtetba “empower through football” omen dak rangloker Sept 20, 2023 nungi tenzüka Mokokchung nüburtemi kanga yongya ataba ‘MDFA Trophy’ Imkongmeren Sports Complex, Mokokchung nung asayatsü lemtetogo, ta Mokokchung District Football Association ketdangsürtemi osangbener senden ka nung metetdaktsü.

                ‘MDFA Trophy’ tenzükba sentongjibo Sept 19, 2023 nü agitsü aser iba anogojibo match kata masayatsü saka kentenmenü aser wawamenü dang teimba alitsü aser iba sentong nung Nagaland nungi nüngtugu musician-tem jaoktsü tebilemba lir, ta taküm MDFA Trophy organizing committee, Convenor, O. Wati Jamir-i metetdaktsü.

                Taküm jangratemtsü aser tanga mapang meinyakdangba kaji, takümbo iba asayamung ya Nagaland Open asayatsü lapoktsür, tetezü Nagaland nung aliba telok mashi kati arua shilem agitettsü koka lir, aji oda, bendang balala nungi asayartem anir arua asayatettsü, ta Convenor-isa ashi.

                Ano osang tajung kaji tanga district nungi arur telok atemabo tamungdak (lodging) angati MDFA-i anepalutsütsü. Taküm October ita Tuensang nung Dr. T. Ao Tournament asayatsüba lir, anungji, Mokokchung tenüng nung asayatsüpurjia tang asayatsü aliba MDFA trophy nungi dang shimtettsü, ta paisa ashi.

                Taküm iba asayamung shir teloki bendir takoker (champion) nem trophy aser medal den senpet sen 2 lakh, atongdakba (runner up) nem 1 lakh agütsütsü, aser semifinal tashi tongteter nema 25,000/- (each) agütsütsü. Iba den ano nija senpet (individual prize) kar shima parnok nema senpettsütsü, ta tayongertemisa metetdaktsü.

                Iba trophy nung shilem agitsü jangrartemi August 10, 2023 nungi 3 Kit Photo Studio Mokokchung nung form agizüktettsü aser online nungia form ji agizüktettsüsa maparen kar inyaktsü. Form meyiptsütsüba tatembang anogoji August 30 asütsü.

Asayamung nung shilem agitsüpur telok shia nüng züluokba taah (registration fee) 5000/- alitsü, MDFA kübok club tasen züngokba taah 2000/- & renewal taah 1000/- asütsü, aser fixture ji Sept 15, 2023 nü asayatsü, ta parnokisa metetdaktsü. Asayamung dak sentakba nung kari danga osang tejangjaba metetnüra iba mobile number – 8787535824 (MDFA Secretary) den tongteprateptettsü.

                Mokokchung District Football Association ya 1992 küm football asaya tsütsü lanurtem ajungshia anitentsü aser parnok nem sabang lapoktsütsü nükjidong nung tenzük. Yamaji MDFA tenzüker arudang football asayar tajung aika adokogo aser ano maneni adokdaki. Taküm iba asayamung open asayadaktsütsü lemtetba ya tongtibangsa Naga nunger rangben ajangzükdaktsütsü MDFA nükjidong lir.

*****