Longsa Baptist Arogo, Pastor, Rev. Supongchiten-i Peniel Prayer Home Longsa nung ojala Yashikala nüngtem sütsüba guest house ka meshiteta lapoktsür külen lar kinungertem den külemi tangokba noksa nung angur. Mokokchung, 18th August, 2023

Asür N.I Jamir kinungtsü Asür Wt. Yashikala nüngtem Longsa yimdak Peniel Prayer Home nung aienertem anendak Guest House yangluba ka Longsa Baptist Arogo, Pastor, Rev. Supongchiten-i meshiteta sarasademer lapoktsüogo.

                Iba ki ya tsürabur N.I Jamir aser ojala Yashikala na jala aser tamo (amoaja) nungertemi tenla-a sütsüba lir. Iba guest house den külemi ano N.I Jamir’er kibongisa Peniel Prayer Home nung ki ana sütsüba Rev. Supongchitenisa meshiteta lapoktsü. Pastor-isa tsürabur Yashila indang takümzülu kaket ka dena sayatsü.

                N.I Jamir aser Yashikala na nem chirnur 9 – tetsür 6 aser tebur 3 moatsü. La arishi küm 23 asüdang Imnukloba (N.I Jamir) den 1943 nung kibong aküm. Kinungbu N.I Jamir Chief Secretary menden tashi tonga inyaker ano minister menden nung lia September 7, 1996 nung iba akümli toktsür ao. Tebu Aonungshu aser tetsü Teyonglepla na jala Yashikala 1920 April 9 nü aso aser 19th Oct, 2017 nü arishi 97 nung asü.

Ojala Yashikala ya sempetjep tetsü ka liasü. La dak temeim, taremzük, ajemalu, shisataka, Tsüngrem aküm tsübuba, meranga inyakba, teka mapa nung techira, aser ajak den jungtepa lokti ajungkettsü aser yimjung asoshi inyakba tetsü ka liasü, ta la otsü ajanga angazüker. La sempet tajung ajiteta Watsü Mungdang-i 2001 küm “Aolima nung tetsü tajungtila” (The Best Mother Award) konang senpettsü.

Tanü ki lapokba sentong nung N.I Jamir’er kibong nungi Imtirenla, Chubala, Alemtemshi Jamir (IAS Retd) aser Minister Metsübo Jamir, Longsa Village Council Chairman – Talichuba, Longsa Arogo tenüng nung Supongmeren deacon parnoki shilem balala agia tepela o den tayongzükba o tulu bener arua lemsatep. Iba sentong tembanga Chubayimkum Pastor, Temjen-i tenüngsang agüja sarasadem.