http://www.nokinketer.com: Tanü putu nung computer education-ji tongtibang angateta kaketshir shia nem computer shisatsü angazükdaktsütsü nükjidong nung Sep 9, 2023 nü St. John’s School Changtongya nung computer lab ka amenokogo. Iba computer lab-ji 12 Assam Rifles Mokokchung, Commandant, Col. Rahul Gurung, Kirti Chakra-i lapoktsü.
Col. Rahul-i sentong nung jembidang, tarutsü India limaji nenok kaketshirtem ya lir, anungji, nenok taküm nung langka mesüra langka kabo pungmangtsüla, kechiyong asenoki dang merangra aser shitak lenmangi ora taküm nung tamakoktsü kecha mali, ta tayongzükba ka agütsü.
Pai India lima nüngtugu nisung kar tetshia ashidang, taoba India President, Dr. A. P. J. Abdul Kalam-i tarutsü India lima atema bilema inyak aser tanü pa pungmang asangsang küma aoba angur, yamaji tang India Prime Minister, Narendra Modi taküm ya jenjang tila ka nungi ajungketba lir, aser business tetsüti Ambani’er kibong ya tila ka nungi dang tenzükba tanübo alima nung takartiba rongnung züngsemer, anungji, kaketshirtemi maneni pungmangtsüla aser pei taküm nung nükjidong tejangja ayutsüla.
Nükjidong ayuba den maneni meranga azüngtsüla, alima nung maongka jenti lir, anungji, temulung ajema malitsüla aser marendaktsüla. Tangar amaji asenokia kasa angazüktettsü aser tongtettsü, ta paisa kaketshirtem ajungshi. “Küm 10 sülen nenok rongnung nisung karbo pei taküm nung jenjang tajung ajangzükteter alitsü imlar aser ibaji reprangi ni arutsü”, ta paisa shisem.
Tesayur mapa ya tamaren mapa ka lir, ibai lokti nem bendanga agütsüba mapa, ano maneni tanur tajung kümdaktsütsü meranga sayutsü Col. Rahul-isa tesayurtem ajungmeso.
Iba school ya tenzüker taküm agi küm 28 buba arur, iba school pai agir ita 9 shi dang arur. Tang tashi nung yangi kaketshir 140 shi lir aser kaketshirtemji Changtongya area nungi dang masü Longleng district nungia kaketshir 30 shi lir. Iba school nung pre-nursery nungi tenzüka class 10 tashi lir aser tetsür tebur atema hostel facility agütsür, ta St. John’s School Changtongya, kibur, Takowati-i osangbenertem den sensaksemdang metetdaktsü.
Tanü alima ya computer putu kümogo, anungji, iba school nung azünger kaketshir shia nem computer theory den practical angazükdaktsü nükjidong nung tanü iba lab ya amenloker aser ibai angati angazükdaktsütsü, ta pai ashi.
Paisa tarutsü nung inyaka aotsü pa mangdang kar lemsatepdang, iba school ya Central Board of Secondary Education kübok higher secondary jenjang nung ajungketa Science aser Arts stream amenloknür. Changtongya area nung CBSE kübok school kata mali, anungji, iba area sanger atema dang masü temeket alirtem nem education tajung agütsütsü pa mangdang lir, ta paisa shisem. Iba tesem ya semi-urban ka dang asünung fees-temjia tangalen meshiba ama memeshiteter, iba ya mission school ka amai dang anepalua arudar, ta paisa ashi. Iba school temeket ya tzü mopung tajung, meta penzütsü jangratemtsü, school kima ground tulu lir, tajemtsü tzü talubusa aser tesayur ajak training agir tesa.
Tanü iba sentong nung SJS Principal – Subrata Baruah, Akhoya Village Council Chairman – Tiatemjen, yimsüsür M.T Among, yimsüsür K. Mangyang, SJS Headmistress – Chubakokla Lkr parnoki shilem balala agi. School tanurtemi school anthem aten. Iba sentong nung tesayur Aküminla menden liasü. Jangratemtsü kaji tanü 12 AR-i achayanga kaketshirtem atema Army jangrartem atema lenmang sayuba sentong ka ayongzüka katsü.
*****
The Nokinketer 