~ Walu Walling & Wati Longchar

Taküm 2023 nungi 150 jubilee nung nangzükba nükla tasen nung jajatsüba mapang ka nung, ABAM okadak Arogo otsü ochi o bendang bushitsüsa akümba yabo tim masü ta angateta, YSS nung iba onük dak sentakba benoka sensaksem aka. Anogo ana-asem tashi sensaksemba ajakbo rasa-a meshitettsü aser tenüng tetshia meshitettsü. Tongmelang agi sensaksem olen kar den iba ocet tebhong kümtsür tebilemba kar inoksema shisadangtsü asoshi lemsateper.  Iba ocet nung magizüktettsüsa olen kar lira aji meyipa agir, saka shisatsü tasen karbo tebilemdangtsü angutsü ta imla-a iba ocet lemsateper.

Tebilemtsü

  • Arogo okadaki aotsü asü maotsü? Ya tim asü masü? Lai tesayuba kechi? Kobala tebilemtsü nung arogo okadaki aotsü?
  • Molungyimsen-i Jubilee sentakba ken-o  nung ABAM Sanen Luden den telemtetba tajung aginüa aiben asüngdang  aser Central Council nunga küm ana tashi jembinüa mapang mepishi, saka memela ta ashir.  Sanen Luden-i kechiba memela? Parnok tebilemba kechi aji angadangtsü tim masü no?  Molungyimsen-i mepishir mapang memelara, parnok atema Court-ji dangato?
  • Naga tenem nung First Baptist Church-ji koba? Nagaland aser Ao Mungdang koba küm aser anogo agitsü? Molungkimong aser Molungyimsen metetshi Naga nunger Khristan otsü mabensatsü, saka missionary nüklabo “Mission to the Nagas”, Naga nunger ajunga Khrista dangi anir arutsü aser China tashi oa Khristar Osangtajung sayutsü nükjidong liasü. Tanü arogo otsü nung ni “tambu” ta raktepba nung “Mission to Molungkimong & Molungyimsen” ama dang jembir. Ya bentettsüla.
  • Kechiba Molungyimsen arogo-i tambu rakteper? 1965 Süngratsü Mungdang nung tzüsenba küm arogo tenzükba küm agitsü lemtet. Iba nungji ajemdaker Ao arogo ajak jubilee munga arur. Iba telemtetba anema Molungkimong, Molungyimsen, mesüra Ao arogo kari magizüktetba o agüja lir asü masü? Agüja malira telemtetba anema kechiba ola adoker? Mesüra, kuli tejangja kar nguteta ali asü?
  • 1986 Special Committee Finding ya tatembang asütsü asü masü? Special Committee puri ashibaji tatembang asütsü asü tarutsü lanur asoshi research agia shisatsü tasen bushiloka aotsü lapoka yutsütsü? kaket züluba dena bandh sütsütsü na?

Tekümdangtsü o

Special Committee 1986 report nung ashiba ama, “Memetetba mapang tesüiba arogo otsüren meimchir tashi mait ajanga Missionary-tem nungi tenzüka arogo aser Ao Mungdang nung tenzüker tashi inyaka aruba mapatem nung teti dangbo tabensa inyaka mali, aji oda, aibelena inyaksemba ajiteta aru….” Record aika nung mabensa aser tashishitsü aliba ajanga scholar-temi pei angatetba aser tebilemba aika shia angur. Aji par tangatetba aser aji agiang ta mashir. Ano temalen Ao arogo nung samanirji Molungyimsen nungi teimba liasü aser par arogo otsü aika record nung lir. Anungji, o anatsülen lirumedema (balance süa) sensaksemtsü lenir kari ayongzük.

Atangji meimchirji kodanga tabensa masü. Meimchiri dang inyaker asünung missionary record balala, mungdang telemtetba, arogo otsü, tebang agi jembia aruba otsütem ajak nungji ochi lir, saka tebensa masü. Pei yimer, taginüba, tebilemba atsünga (missionary record nunga, tat. agi, Clark or tebutsü Mary Mead tena record meputetba) züluba aser jembiba angutsü. Ibai meimchir tashi mait tulutiba ka ta angatettsüla.Yamaji alima tanga nunga pei juri ajungtsü atsünga teratet balala agütsüba ajanga mangatetep aser azü tokshi adoktsüba otsü nung azünger.  Aji meimchir tashi mait ajanga ta metetdi. Ao arogo-a iba aibelen nungjagi jenbua mali ta YSS sensaksemer ajaki aji shitak ta jembitep.

Arogo Okadaki aotsü asü masü?

Kari Arogo okadaki aotsüla, kari maotsüla aser Lai tesayuba masü ta jembi. Pastor-tem aser tesayur aikadi court-i aotsü/maotsü Lai tesayuba rateta ashi.  Pastor kadi court-i maotsüba kuli asem agütsü:

(1) Secular court is not likely to be sensitive to Christian values

(2) The basis for going to court is often revenge and this should never be Christian’s motive

(3) Lawsuits make the church look bad, causing unbelievers to focus on its problem rather than on its purpose.

Ano tesayur kadi yamai ashi, “As a true believer of Christ secular court is not our judgment platform, and therefore I strongly stand that we should never go to court.” Matt. 5:25-26 nung Yisui court-i moi mangatetep ajak tangatetep kadi aruatokang ta kanga junga shia lir. Yamaji kuli aika agüja sensaksem aka.

Ano karibo aotsü tim ta shisem. Lenir kadi yamai ashi, “Aor Khristantemi tamanger ka pei temeten asoshi alima okadaki aobaji tai ta bilema jembir. Koba tetezü alima okadaki aobaji temenen (mojing sabang ama bilemer)! Alima okadak sabangi aobaji temenen süra okatsürtemjia (lawyer) temenen asü? …. Reverend aser Sannüker chirtem karbo law azünger/lawyer ali asü mali, lira aji temenen asü?  Asenoki tali angajemtsü asoshi asen atepzüng nung atalokba kuli kar shisadangdi: Küm ishika süia ogo lanur meyirijang tema tesayur interview nung takok ngur Government-i mapa magütsüba anema okadak ken-o benoka takok angubato tai asü? Küm ana-asem ka jakdang sannüker ishika Holy Land Tour aotsü lenmang bushiba nung yariteper nisung kadi sen chitsür mapa mekümtettsüba asoshi alima okadak ken-o benoka temeten anguba toa tai asü?  Kodang India lima nung state kar nung Anti-Conversion Law passed asü iba lemtet ozüng anema tamangertemi pei temeten jembitsü Court nung ken-o benokba ya shitak asü tai? Kechi keno südir süang, kija-a süang, lokti-a süang alima okadaki aotsü aser aoba kecha lemsa-a mali, ajakji pei temeten jembitsü aor dang. Laishiba nunga alima okadaki aoba aitsüba mali ama bilemer. Kokra maodang yimjung yanglu tajungba ta tesayubabo angateter, saka koda mesüra aobaji tai masü (Mathi 5:25-26; 18:15-17). Tejen Lai putu nung obendanger Debora-i Israel nunger mangatettep mapang okadak obendangba angutsü (Obendangertem 4:5). Solomon Chuba-i tetsür ana tanur mechi mangatettep mapang okadak o bendangba angutsü (1 Chubatem 3:16-28). Mosai okadak koda shilem agitsü iba indang Israel nunger den jembiba Tazüngkunem 25:1-3 nung angutsü. Iba dak sentakba kuli Laishiba nung aika angutsü. Sura tanü Molungyimsen-i Ao Naga Baptist Arogo Otsü temeten jembitsü alima okadaki aoba ya kangasa tai asü?” Yamaji aika jembia arur, Pastor kadi “Arogo court-i aoba nung aitsütsü maitsütsüji shir ajanga aor iba dakji aket. Alima lokti, bangdak den ken-o adokra court ajangang bendanglanglang. Saka arogo o arogo na tsungta, mungdang o arogo na tsungta atema otembangtsüji Laishiba ta amangba telokji asenok Baptist ya lir.”

Koba küm aser kong Naga tenem nung arogo tenzük?

Sensaksemer ajaki December 22, 1872 nung Molungkimong-i Clark atua tamangertem parnok 15 tzüsenja aser Kibuba benjong ka-a arogo tenzük. Ibaji Naga tenem nung mezüngbuba arogo kimungji lir. Iba historical fact-ji melenshitsü makok. Koba 1872 küm December 22 Clark-i Molungkimong yimdak tzüsenja, temeshi Kibuba benjong aka ibaji Naga tenem nung arogo kimung aser “First Baptist Church in Naga soil” ta historian ajaki ashir aser yamaji tanü tashi Molungkimong nung tzüsen tzüpu aser sentep ki kimung lir. 1872 küm aser anogo nungji ajemdaker Naga nunger aser ABAM jubilee munga arur. 1872 küm arogo tenzükba ya Molungkimong litsü nung atalok. Missionary record, arogo otsü balala, tebangi shia aruba otsü ajak agi mezüng arogo tenzükbaji Dekhaimong aser iba historical fact ta tejangja ta shisa lemsateper ajaki shisem.

Mission to the Naga

American Baptist Missionary nükjidongji Naga tenem aser China tashi Yisu osang sangdongtsü nükla liasü. Parnok Molungkimong nunger kisüng Khristan kümdaktsütsü matu. Anungji, “Naga Mission” otsü ya Molungkimong  nunger jurila otsü amai dangbo mebilemtsüla aser mejembitsüla. Iba tatalokba ya Naga nunger ajak temoatsü tulutiba rongnung ka lir, kechiaser 1872 küm Naga nunger otsü nung tapak (chapter) tasen ka lapok. Tamangba tasen den Naga nunger modern education bener aruba ajanga Naga nunger alima ajunga den sentaktepa kümdaktsü. Naga nunger ajaki tenüng asangtsübaji tetsü-tebou leptep tsüngtep putu Godhula aser tebutsü Lucy, aser Dr. Clark, Süpongmeren-i samanir sür kümzük. Naga tenemi anir atuba lidaktsüba ya tesüngmangtsü ka lir.  Molungkimong nungeri tasü ita Khristan yimsü magizük ka asü nungbo tanü Aor/Naga nunger jenjanga koma lila ta bilemdi aser item tsüraburtem tenüng sangdi. Dr. Clark Molungkimong nung mezüng alitsü atudang, parnok koda pelateper alitsü aser ki tasen mesema tenzükdang tzü, jang, entsü, an, mapo, mendi, melok, nok-nü ajaki tenlar alitsü. Clark, Godhula aser Lucy nunger ajak Ao oshi angazükdaktsür alitsü. Molungkimong nung School tenzüka tanurtem züngdaktsütsübaji tsüraburtem koda yongyar alitsü.

Anungji Aor/Naga nunger  ajak 1872 küm Godula aser kinungtsü Lucy, aser Clark Molungkimong-i atua  arogo tenzükba küm nung ajemdaker Jubilee amungtsübaji Naga nunger ajak senmang asütsüla. America nunger “Mission to the Nagas” nükla asangsang atalokba aser Naga nubur Khrista ajanga nüchiso bener arutsüba tepela jurila arogotem balalai tamang jenjang tali akangshitsü aser Tsüngrem sentsüwangshidaktsütsü asoshi jubilee benjong 1872 küm nung ajemdaker mungnüra parnokjia temeten kar.  Yongji 2022 NBCC aser ABAM iba nungji ajemdaker jubilee mungogo.  Iba dak alaka Dec. 22 anogo nung ajemdaker ABAM mission Sunday munga arudar. Anungji, “Mission to the Nagas” ya local arogo kar otsü amai mebilemtsüla ta sensaksemer aika lemsatepa liasü.

1872 dak ajemdaker Molungyimsen nunger Jubilee amungtsü temeten lir mali?

Molungyimsen nunger dang masü, Naga nunger ajak amungtsü temeten kar.  Temalen shisemba ama, American Baptist Mission nükjidongji Naga nunger  ajak aser Naga tenem atener oa China tashi Khristan kümdaktsütsü nükjidong nung Assam mission/Naga mission tenzük. Historical fact kaji, mezüng tzüsener Clark den teimba ka yim tasen 1876 nung küma oa tekülem maneni ka-a liasü. Tzüsenba dak ajemdaker Molungyimsen arogo metenzük, saka Molungkimong nung tzüsener aortemi maneni arogo kümteta külema aru. Tetezü, Tsüngremi mapang tatong nung Clark aser Molungkimong nübur den jembia (mepetmesü ajanga-a Tsüngremi jembir ta angatetdi) Khristan yimsü tali züindaktsütsü asoshi Molungyimsen 1876 nung kümtet. Saka tamanger ajakbo yimsenbai mai, Khristan dang masü limapura ai. Godhula-a ita ishikabo mai. Anungji, Molungkimong arogo disband sütsür aoba kuli tejangja mali, ta record balala lemsatepa sensaksem ka-a liasü.

Dec. 22, 1872  tzüsenertem Molung yim anaprongla nung prokshia liasü ta Molung arogo/yim otsü anaprongla nung jangja jangja kuli sayur.  1872 nung Clark-i Molungkimong nung arogo ka tenzük aser ano 1876 nung Molungyimsen küma ir arogo ka yangji tenzük ta tejangja kuli angur.  Molungyimsen nung aliba arogoji tamangertem mezüng tzüsener teloki kümtetba arogo ka asü nung, Tsüngrem nem balaka tushia agüja jubilee amungtsübaji parnok temeten kar aser shingaia noktangtsü makok, ABAM-ia noktangtsü makok.  Saka Molungyimsen 1876 küm nungang yim aser arogo tenzük nungji, Molungkimong nung aliba arogo belener ai aser onoka First Baptist Church ta amshia jubilee amungtsübaji tai ta sabangpur aikati shisem. Ano iba dak sentakba nung ABAM-i tzüsenba küm nungiang arogo tenzükba küm agitsü ta 1965 Süngratsü mungdang nung lemtetba ama arogo ajak lirumetema iba küm nungji ajemdaker Jubilee amung nung kanga ajungtsü ta Mungdang-i arogotem nem nenshia tanaben metetdaktsü nungbo ajungtsü ta shisa lemsatep.

Ano ajaki metetsüba kaji Clark-i anir mezüng tamangertem den yim aser arogo tasen ka akümba ajanga, Khristan tamang tain kümdakja, Khristan libaliru sayua, merükmeju, ola-angla, Ao mungdang tenteta, school lapoka, kaket-ken-o renlokdakja Naga nunger tenük lapokdaktsü. Khristan tamang wazüka ayuba, züindaktsüba den lokti taküm nung temelenshi, shisaliok, kaket-ken-o renlokdaktsüba nung Naga nunger otsü nung shilem tulutiba agibaji Molungyimsen ta angateter aser aji shiangaia rakzüktsü makok. Ashiko Clark-i anir Molungyimsen ya kümteta mao ka asübo, Bronson-i Namsang nung mission centre lapokdanger shibangba amai ajurur lila ta sensaksemer kari shisema liasü.

Lim arogo otsü nung ABAM

ABAM ya Ao arogo ajaki akümba Mungdang ka asünung, “ABAM-i kechi ashir?” ta  aiben asüngdanger. Lokti lirumetema aotsü asoshi telok bangzüng ka alitsübaji tim. Naga nunger yimtsüng ajak independent republic ka ka ama lia aru nung, yim shia otsü balala aser inyakyim balala lir. Anungji, guidance aser yimjung o agütsüba dak alaka lim otsü nung tebang mai tajungba. Missionary putu Molung yim ana nung arogo disband asüba/masüba, arogo medangdangi lia aruba/maruba, rishikangshi asüba/masüba, küm balala nung  arogo tenzükshiba otsü amala ya internal otsü aser itemji Naga/Ao arogo otsü mekümdaktsütsüla. 1872 sülen kechisa ataloka aru, aji Mulongkimong aser Molungyimsen lim arogo jurila otsü. Lim arogoia jurila otsü nung ABAM nem khuret magütsütsüla aser ABAM-i takok tashi obendang oshilang magütsü tajungba ta sensaksemertemi lemsatep.

Ashi ama, ABAM ya Aor arogo ajaki kümtetba Mungdang. Mungdangi telemtetba agir aser melenshitsüjia Mungdang dak tashi lir.  Ashiko, taoba Mungdang telemtetba kar dak ajemdaker Sanen Ludeni Molungyimsen-i mepishiba magizük alitsü. Molungyimsen-i parnok tebilemba lemsateptsü sabang mangu nungji okadak jembitsü o agütsü südi. Mungdang telemtetba aser Molungyimsen-i okadak o benokba anapronglaji tim amai, saka telok anapronglai atsü-anem kara tangatetep kati arutsü ana nung lir. Anungji, okadaki maodang ABAM Sanen Luden aser Molungyimsen arogo, aser kokra Molungkimong arogo dena khen ajurutepa sensaksem kadaktsünür ta YSS sensaksemeri temepishiba shisem. Yisu Khristai sayuba ama temeim, taochi aser amalitep ajanga dang chichiba yimjung bener arutettsü akok ta tangatetba nung iba mensem kadaktsünür ta ajang ajangja mepishiba shisemer.

Asen Aor Tsüngremer taoshi tulu ajanga Naga kin rongnung mezüngbuba Yisu yimsü tajung agizükba kin aser America lima nungi arua parnoki taküm bendanga agüja küm 82 tashi asenok yaria liasü. Ibai Ao kin dang malangba temoatsü ulura. Paronki bendanga agüja tenzükba ajanga Ao kin Naga nunger rongnung mezüng tenük lapoker aküm aser tanü tashi Naga nung dang “Pioneer” kin ta ajar. Iba temoatsü ya khuret ka ama agizüka tsürabur putu nung ama, Khrista Osangtajung bener aotsüba aser taküm libalirui sayutsübaji asenok khuret lir, ta angatetdi. 150 jubilee amung tenüng nung Tsüngrem tenüng ajungkettsütsüba aser missionary, tsüraburtem shirnoki taküm bendanga agüja Khristan tamang agizüka nüchi bener arutsü, parnok nem tenüngsang agütsütsüba talang sürnung parnoka dena tenüng menük bener arutsütsüsa asenok konang bushitepa okadak  noktaktsüsa akümba ya maaksü mapa ulura. Amangba pur ajak temulungjang bushia, temeim aser ajemalu nung Khrista dangi meyiptsü atangji mapang tang ya lir.

Ano lepshia ashir, aiblena zülusema lira, tatok meshir aser metongshia azüngtsü ayongzuker. YSS ya tepu maket social media telok ka, kong shisatsü balala lemsatepba sabang ka dang lir. Nisung kar shisatsü tasen kar ngur lira, aji agi teperi. Tsüngremi iba ocet azünger temoatsü kadakjang ta sarasademer.

*****