“RISHIKANGSHI” ASER “METANGDANGI”: Kaket züluri item tasüngdangba asüngdanga research agitsü nüngdaker

~ Wati Longchar

YSS nung züngsem tajung kari “philosophical/theological hermeneutic aser historiography” nung shisatokden ka akatsü nüngdakba indang shisemogo. Aji kanga tongtibang. Molungkimong aser Molungyimsen ana arogo süiren (otsü) (Menjibai history dang “Süiren” ta agütsüogo) sentakba nung ojang ana “Rishikangshi” aser “Metangdangi” ta asüba ya kanga tongtibang süa jembi nung iba ojang ana ratet sentakba nung methodological question kar asüngdanga research aginung ajungdisü ta sensaksemtsü onük benoka YSS nung züngsempur aikati shilem agiogo. 

Item methodological question ya iba ocet tebhong kümtsüri puratetba tasüngdangbatem tasen masü. Shirnok Master aser Doctoral level nung hermeneutics subject agiogo, parnoki question aika asüngdanga research zülur. Tasüngdangba aika asüngdanga süiren atalokba ochibaji tangatettsü atema question aika asündanga kaket zülur. Anungji, iba ocet tebhong kümtsüri telangzüba magütsür, saka tali aroka bushiloktsü atema question asüngdanger dang aser item question-tem ajanga research tarokba agitsü lenmang ngutettsü südi ta bilema iba onük lemsateper.

Sensaksem mapang tebilemba lemsatepdang, iba ocet kari taoba atalokba süiren angatettsü asoshi “methodological framework” tejangja tuyur ta shia liasü. Taoba mapang süiren aika temesüng nunger ajungketa, Tsüngrem nisung amai zülua lir. Tanü putu taoba mapang atalokba “receivers”, “colonized” tsütsü nungi süiren meyipa reprangshitsüla ta lemsatep. Tat. agi, Mary Mead-i züluba “A Corner in India” ya fundraising atema züluba kaket ka ta F.S. Down-i ashir. Anungji, Naga nunger tamang lima amai nemja züluba angutsü. F.S. Down-i pai züluba kaket, “The Mighty Works of God” ya colonial, white is superior ta angatetba tsütsü nungi zülu, anungji nia kü methodological framework magizükteter ta pai pasasa aija ashiba angur. Anungji, missionary record ajakji iba tsütsü nungi angatettsüla aser süirenji zülushitsü nüngdak ta lemsatepa liasü. Saka karibo temesüng nungerji Tsüngrem amai angateta, parnoki zülubaji tajento kata tai mali ama parnoki zülua aliba record lemsatepa liasü. Parnoki iba ocet nükjidong “methodological framework” ka agütsütsü zuluba mejangjaba agi yamaji lemsa alitsü ta bilemogo. Methodological question metettsü atema YSS nung sensaksemba “Rishikangshi” aser “Metangdangi” ta jembiba ojang ana ya lemsateper.

“Rishikangshi” ta asüba ya kechi? Shibai/shirnoki kodang nungi kechi atema amshi? Rishikangshi ta asüba ya Clark aser Mary Mead nati koma angatet, aser koma züluja lir? Kechi nükjidong nung zülu? Rishikangshiji shirnoki asu? Kechiba? Shibasa aser koma rishikangshi?  Taküm kuli kar lir asü? Aori rishikangshi ta asüba ya kodang nungi, komala ka maparen dang rishikangshi ta aja. Missionary and Aor tangatetba balala asü kesa dang asü? Godhula aser Clark-a rishikangshi asü masü? Yim tasen akümtsübaji shibai/shirnoki atongtet? Molungkimong nungeri asü mesüra Clark-i? Godhulai? Yim tasen akümbaji rishikangshi marem akumba asü, yimsüsüba menden raktepba agi? Clark-I yim tasenji anir akümba asü?  Tamanger dang rishikangshi asü? Mamangera rishikangshi? Clark tamanger den anitaka ao asü, pai anir ao? Clark or tebutsü Mary Mead-i dang rishikangshi ojang ya zülua lir asü, tanga missionary-temia mesüra Godhula-ia zülua lir? Koma zülua lir? Missionary report nung “rishikangshi” ta asüba ya kechiba amshi? Baptist missionary report balala nunga iba ojang ya amshia lir asü masü? Koma amshia lir? Kechi nükjidong nung amshi? Iba mesükba aika asüngdangtsü akok.

“Metangdangi” ta asüba ya kodang nungi amshia tenzük? Clark-i koba mapang, kong, koma amshia ali? Kechi, kobala mapa/inyakyim metangdangba indang jembir? Clark-i kwiben amshia lir? Ya 1986 Special Report nung “metangdangi arubaji ta angateter” ta opinion ka agütsüba dak ajemdaker Molungkimong or Molyngyimsen nunger aser par phukümeri puraloka jembia aoba asü? “Metangdangi” ta amshiba ya tambu-tanubu jangjatsüba atema amshiba ojang ka asü? Clark-i amshia alinunga pai koba context nung kechi atema amshi? Clark-i amshia melira, kechiba interpretation opinion ka nung ammeter yamai arogo süiren sentakba nung jembir? Court-i aotsüsa aküm? Süra, “opinion” ka nung ajemdaker okadaki ABAM ajar asü?

Anungji, “Rishikangshi aser Metangdangi” ta asüba ojang ana ya missionary-temi kwiben report agüja lir jangjatsüla. Kobala jenjang ka nüburtem alidang report ji zülu? Kechi nükjidong nung zülu? Tezülur mulung nung kechi bilema zülur alitsü? Missionary record nung “Disband” ta asüba ojang yaa kasa tasüngdangbatemji asüngdangtsü nungdak aser Rishikangshi aser Metangdangi ta jembiba ojang ana ya “disband” ojang tesentaktepji koma angateta benshia aru aji metettsüla. Tanü Molungkimong o Molungyimsen arogo süiren sentakba nung parnokia kechi ashir? Kaket zülurtemi iba ojang ana ya koda rateter aser amshir?  Item ajakji prime source (primary source and prime source anaji balala) den medemdanga research agitsüla.

Ano “Arogo” ta kodang missionary-temi jembi, parnoki koma angteta amshi? Iba putu nung Baptist dak alaka tanga protestant missionarytemi koma angatet? Missionary putu, leptep-tsüngtep mapang, mangsa aliba putu, modern education marudang, Molungkimong, Molungyimsen, Aortemi “arogo” ta asübaji koma angatet? A, B, C, 1, 2, 3 sayuba, ken sayuba, Laishiba otsü sayuba, anogo tenet nü buba nung alui maoba, limapur amungtsümung mamungba dang “arogo” mesüra arogo nunger/tamanger ta aja asü? Iba ojang ana terajem angatettsü atema ibala mesükba tesentaktep ojangtemji bushitsüla.

“Rishikangshi”, “Metangdangi”, “Disband”, “Excommunication”, “Arogo” (both organized or unorganized), ano aika, item olongtemji tapi agi mopung nungi mesüra tazüngla nungi kodanga mepokteter. Langka tatalokba ka aliba ajangang ojangtemji adoker aser ojang shiaji context balala nung tangatetba balala nung amshiba angutsü. Asen lima nunga nüngja-koja ajakji tetezü kaka lir, tat. agi, “Ungma”, “Chungtia”, “Mokokchung”, Mopungchuket” etc item ajak nungji tetezü kaka lir. Clark’er putu, pa masodang kobala tangatetba nung item ojangtemji jembia aru itemji metettsü kanga tongtibang. Iba dangji “World behind the text” ta ajar. Iba angatettsü atema Colonial history and ideology, slavery movement, white poor liberation movement, indigenous movement & doctrine of discovery, women’s rights movement, civil rights movement, Protestant theology, evangelical movement aser theology rajema metet nung dang ojang tera, tetezü, kechi nükjidong nung amshi itemji jangja angatettsü. “World behind the author/text” researcher-temi metettsü merangtsüla. Tapi agi, “World behind the text” jangja merajemi tangar kati ashiba mesüra secondary source kar dak ajemdaker pei tebilemba teratet agütsüba jagi otsüji raksatsür aser telok mangmangteper ta angatetdi.

Tanabuba nung, “Words in the Text”(Kaket nungji kechi zülua lir) ya kanga tongtibang. Tezülur jagi, tat. agi, pa/la masodang jembia aruba tejen tangatetba dang lepshia ashir asü mesüra ojangji kasadang süaka tangatetba/teratetba tasen ka agütsütsü meranger? Koma meranger? Koba mapang nung, kechi telokdangi, kechi nükjidong nung iba ojangji inoka zülu? Tat. agi, “metangdangi” ta Clark-i amshia lira, iba arogo ya “tambu” ta Home Mission pur nem angatetdaktsütsü zülu asü? Molungkimong/Molungyimsen or ABAM nem angatetdaktsütsü zülu asü? America nunger sobaliba nung “tambu” ta asüba ya kanga tongtibang asü? Parnokia tambu ya raktepa aru asü? “Tambu” ta asüba ya parnok sobaliba nunga koma angateter? Aori koma angateter? Aor sobaliba nung ajemdaker tanü süiren ratettsürtemi tali purapujia jembir asü? America nunger sobaliba nung “Tambu” ta asüba nungji kechi konang lir? Aor sobaliba nung kechi konang lir? Aori ozu yimer tambu, kidong rongnunga sünga, tebou semchir ana rongnung tambu raktepba shilu, yimpur, aiener ta kechiba yamai konang ka küma jembir? American nungeria asenok Aori angatetba amai angatet asü? Item research question ji asüngdanga süiren zülutsüla.

Kaket nung zülua lir, talisa missionary record nung kechi zülua lir aji “primary source” aser item ajakji shitak ta bilemer asü? Parnoki tai koda sür zülua yutsütsü? Asenok “white is superior” ta bilemba mulungsentsü aliba ajanga Clark-ji Tsüngrem nisung aser paibo aibelena zülua meyutsütsü ta bilemer! Missionary record-ji dang shitakba kuli asütsü ta angatetba lir asü? Parnoki zülua aliba alema tali bushiloka maotsüla ta bilemer? Indigenous scholartem-i zülu alema/atena oa, talisa colonizer, mesüra white missionary atena/alema oa research agia süiren zülushitsüla ta ashir. Indigenous scholars aikati, asen tesayur Renthy Keitzar-ia temesüng nunger tenük kuli aser parnoki ajangshiba koba züludang primary source ta ajar, ya tabensa masü. Aika lisopur sobaliba mangateti zülua lir. Itemji atener “prime source” lir ta ashir. Tesayur Keitzari ashiba agi, tetsü-tebou nungi nülak songa kazüka yokbatemjia prime source. Ali, tzü, tetsü-tebou otsü koba zülu nung mali, saka asangsang nung angur, jembir, kuli sayutsü akok itemji prime source ta ashir. Süra, prime source aser zülua yutsüba primary source tesentaktepji koma amshitsü? Ojang anaji tanü süiren zülur aser teratettsürtemi koma angateter aser rateter? Koma jembia aru/jembir? Molungkimongi koma Rishikangshi aser Metangdangi ta asübaji rateter? Molungyimsenia koma rateter? Researcher-temi koma rateter? Kechi nükjidong nung item ojang ana ya tongtibang aküm? Parnoki ratetba nungji historical basis tejangja lir asü masü? “World behind the text” aser “Words in the text” ya koma researcher-temi amshia süiren yanglur?

Naga context nung prime source-ji kanga tongtibang ta angateter. Prime source isab nung kong Clark-i tenzükba First Baptist Church amenoka tanü tashi noktaka lir? Ali, tzü, arrtsü aser tenük kuli agi bendangdaktsüdi. Shir liküm nungi Ao Mungdang, Tetsür, Youth Mungdang, Sunday School, kaketken-o renloka kümdaktsü? Ali, tzü, arrtsü, tenük kuli ajanga bendangdakjang. Rishikangshi aser Metangdangi ta jembia aruba ajakji prime source denji medemdanga arogo süiren bushidi, ta ayongzüker.  Tsüngremi tazünger ajak item tasüngdangbatem ajanga tangatetba tasen agüjang ta sarasademer.

*****