~ Dr. R. Zulu Jamir, Assoc. Pastor

   Kümlong Baptist Arogo

Okila:

Tanü asen tendak Khristar Arogo shia nung tenzükba wadang khen meyipa reprangshitsü mapang kati menepa aruogo. Yisu Khristai amangbapur shia nem Pa Arogo tanela nung taküm lidaktsütsü nungloka yutsü, saka nisungtemi tanelar Arogo ali shi tesa agi tenzükba ajanga tanela tejang matangba Arogotem aika küma tokogo. Atangji Arogotem aika kiojen nungi tenzüker alima maparen project aser physical development nungbo kanga renloka aor, saka tanela samaba wadangbo aika senzüka yutsüba yong, amangbapur jenti tekümtet mejangjai samaa odar. Hao, physical development-jia tongtibang, saka Khristar Arogo ka asoshi ajak dang tongtibangtibaji asen atep nung sama aliba tanelatem anir aruba wadangji tongtibangtiba. Aji oda, amangbapurtemia Tsüngremer sentong dang nungibo alima maparen ang tuluba kümdaktsüba, tanela chiyungtsu dang nungibo alima rongsen aser konang tesapuba, iba ama tangatetba aser libaliru ajanga Khristar Arogo tanela nung azüngmeyaka küma aoba asen nüki angur. Anungji Arogo aser Tenzükba nung tenzüker aser amangbapur ajaki alima putu yimya den sütepa meli-i tanela nung Tsüngremer sentong tulu atalokdakja khen asentenshia tanela nung taküm aliba Arogo ka ka küma noktaktsü iba ocet ajanga ayongzüknür.

Arogo:

Tsüngremi jatetba pur sentepba telok dang Arogo ta ajar. Arogo ya tasen Lai nung amendaker Yisu Khrista zü agi alangzükbapur ajanga aküm. Arogo nung Yisu Khristaji tekolak aser Kibur lir. Khristar Arogoji ozüng amshiba tashiyim nung masü saka Yisu Khristai mulungba mapa ataloktsüba aser Tebu Tsüngrem sentsüwangshidaktsüba telok lir. Arogoji pungmen maket aser temenen süngra nung kulemi maputeper, saka tanela nung, shisatsü nung, temeim nung, aser tamang nung ka küma longjema aliba lokti.

Arogo ka nükjitongji Yisu Khristai tenyaba mapa sama aliba tanela aser taküm kümzüktsü, tajemreba purtem mesotsü aser Khrista osangtajung sangdonga alima nung Kodak yimli yangerba mapa inyaktsü asoshi lir. Khristar Arogo nung tenüktelen balalai pei mapa angateta kati ka den amalitepa Temshi Lai tesayuba aser Tanela Temeshi leniba kübok mapa ajak rajema Tsüngrem sentong atalokdaktsütsüla.

Tenzükba:

Tenzükba mapa ya Yisu Khristai nungloktsüba mapa lir. Yisu alimai aruba nükjitongji, ‘Tenzüktsü aser aika alang pei taküm agütsütsü aru’ Luk 10:45. Anungji tenzükba mapaji pei ajangzüktsü atema masü saka  tangar ajangzükdaktsütsü asoshi lir. Tenzükba nung Kibur ka lir, iba Kiburji Yisu Khrista. Shibai Pa O aser mapa agi lia sayu. Anungji Yisu Khrista tsüngsü nung jajar tem dang tenzüker ta ajar. Khrista tenzükba wadang nung tenzüker ka asoshi tongtipang kuli ana nungdaker. Mezüngbuba nung, Tajaba (Calling) Mathi 4:19. Tanabuba nung, Temulungtetba (Commitment) Luk 9:23.

Tenzüker ka asoshi tongtipang qualification; Temeim aliba, Tatok agütsütetba, Aria bilem aketba, Taküm yimya tindang, Jembi shinü tajung, liba liro tasüngtet, achi ajem temerük aser inyak sangshi lenden, item jenjang tem ya asen sermon dang tongtipangba lir. Tenzükba mapa nung Yisu Khrista nükjitong; “ Ni tenzükdaktsütsü asoshi masü, saka tenzüktsü aru” Mathi 20:28. Tenyar Paul asoshi tenzükba tamentakdak, “Tenzüktsü asoshi kümzük” (Saved to serve) 1Timo.1:1-2.

Arogo nung Tenzükba Wadang:

1. Taneptsüba Wadang: Tanü Robotic aser plastic surgery putu tensa ka nung asenok alir. Medical science advancement ajanga meimchir temang nung tongtipang shilem ajak surgery dang masü, saka transplant süteta taküm arishi atsülanga litetba mapang ka nung asenok alir. Iba tendak tenzükba wadang nung healing ministry wadang ya kanga tongtipang kümogo. Yisu Khristai mapa tulu inyakba rongnung tongtipang kaji taneptsüba wadang (healing ministry) liasü. Tanü Arogotem nung amangbapur aika shimang aser tanela anaprong taneptsü nüngdaka lir. Khristar Arogo shia nung taneptsüba ministry melira asen santem taneptsü angudak lokti bushia aotsü ana nung lir.. Local Arogo shiai healing ministry takok ngua aotsü asoshi Tsüngrem tashi ain nendaka bushitsü nungdaker. Isaia 59:1 nung ashir, “Kümzütsü asoshi Kibuba teka tatsü masü.”

2. Nütsüngsüba Wadang: Tesüiba küm ishika tejaklen Electronic aser Media Arogo indang jembia aruba tanübo asangsang asen atep nung Media ajanga sentep agia Tsüngrem külemteper. Shiranger aser mokokmiener asoshibo media ministry ya tongtibang, saka anema alirtem tenla kidangi moi kidang sadok sadoka Tsüngrem külemba nung tebilemtsü tulu ajurur. Tanü alima nung meimchir puadaktsütsü tashi tulutibaji  technology ya lir. Lokti telongjem tashi ajema akümba ajanga meimchir tsüngta temeim mekonga kümdaktsür. Iba ajanga Khristan kibong aika nung tsürabur aser chirnur tsüngta tesendaktep aser amalitep rakasba den kibong jenjang (family values) tajemrepa tiai idaktsür. Arogotem nütsungsüba nung ken temulung tangshitsü mapang kati menepa kümogo. Tenzükba mapa nung temenen nisung senzüka yutsür nisung tajung ishika den dang amalitepa inyaksangshi süra, Arogo nung nütsüngsüba wadang nung tejang matangtsü. Yisui ashi, ‘Kechiaser nisung chir samaba bushitsu aser kümzüktsü aru” Luk 19:10. Tenzükba wadangji Sannükeri san tekur teku kümzüka liaka samaba ka nendaka bushiba ama mitta inyaktsüla. Asen atep nung sama aliba santemji Yi lar, mim mozü lar, kibong balalulaba, kibong teraksa aser tebilemtsü balala agi sünger aliba purtem lir. Tenzükba nung samaba pur bushitsüji tongtipangtiba mapa lir.

3. Tanela Temeshi Nem Anidaktsüba Wadang: Tanü alima ya tashitemetet aser shisashir mongin agi amokbanger aliba lima nung asenok alir. Secular nisungtemi Laishiba nendaka azünger aser sayutsüngi kanga junga süteper. Iba ama tensa ka nung tenzükba wadang nung nokdaka alir shiai pi tang balaka asütsü asoshi tanela sobutsü teberi agitsü nungdaker. Efesa 6:10-18, nung shia aliba tanela sobutsü sobua melira asen tashi kija agibo alimaji machettsü. Yisui nütsüngtem dang nangzükba teyarir tulutibaji Tanela Temeshi lir. Tenyartem Mapa 1:8 nung shia aliba ama, “ Kodang nenok dangi tanela temeshi arudir nenoki ain agizuktsü.” Sama aliba tanela anir arutsü tashi tulutibaji Tanela Temeshi tashi ain. Yisu nütsüngtem laishir tem masü saka pei tebok aser kibong atema alima wadang balala nung ayanger ka ka liasü. Saka kodang parnoki Tanela Temeshi ain agizük, Yirusalem nung Peteri  ken sayutsüngi nung nisüng meyi asem tashi temulung meyip. Tenyartem mapa 2:41.Tenzükba wadang nung tenzüker shiai shin mangdanger dak memetaloki pei taküm nung Tanela Temeshi jungkai adoktsüsa bendanga agütsütsüla. Zakaria 4:6 nung ashir, “ Tashi agi masü mesüra ain agi masü, saka Kü Tanela agi.” Tenzükba mapa nung Tanela temeshi tashi ain medenra asen mapang asen tashi ajak amajok.

4. Tsüngrem O Tiyongtsü Südaktsüba Wadang: Arogo nung sannükeri anirtenzüker shia pulpit ministry ya kanga temeshiba jenjang nung wazüka ayutsüla. Temeshi Sabangji alima otsü mesüra pei tebilemba jembi dak tesem ka mekümdaktsütsüla. Amangbapur tila tulu tanela nung mesütsü asoshi Tsüngrem O teratet  tensa mapang den apet lentet lenteta anganütsüla. Tsüngrem O ajanga tamanger ka tanela aser shisatsü nung anogoshia atsüshia aintsüsa kanga sarasadema renemer sayutsüngitsüla. Yeremiai Tsungrem O ji kodang achitsü tenzük, pa mulung asoshi tepelatsü aser jangratemtsü liasü Yer.15:16. Tenzükeri Tsungrem O ji nanga chiteta jembira, jentipur asoshi iba Tsungrem O taküm tzüpokdak ayong alitsü. David-i T.Ken 119:103 nung ashi, “ Ne otem kü bang dang koda tanang lir! Hau, kü bang dang mojitzü dang nungi tanangba! Tenzüker temi Tsüngrem Oji sermon ka asoshi dang züngra iba jakibo asen temoatsü manguba den aika temoatsü mangutsü. Anogo aben asen taküm Tsüngrem O agi metena alitsüla süra iba metenzükba jaki jentipur moatsütsü.

5. Mapa Agi Sayutetba Wadang: Tenzükba wadang nung tangar kongshitsüsa sayutetba tashi tongtipangtibaji jembiba ama lia sayutetbaji lir. Yakobi ashi, “ Mapa metenibo tamangjia tasü lir’ Yakob 1:26.  Khrista asoshi taküm bendanga agütsütsü indang bo mela mela kazüka jembiteter, saka amangbapur koda masüba tia nung bendanga agüja meyaritetra asen tenangzükbaji amajok.  Asenoki temeim onük jembir saka pi nem ochi temeim magütsütetra aseni jembibaji amajok. Taküm kuli tajungji asenoki jembibaji masü saka lia sayutetbaji lir.  Khristai Arogo meimba temaitsü Pa taküm mesükshii aika alangtsü bendanga agütsü. Asenokia tenzükba wadang nung jendipur ajangzüktsüsa bendanga agüja inyaktsü nungdaker. 1 Korint 15:31 nung tenyar Pauli ashi, “ Ni anogoshia asür…” Khrista kangki ajungkettsü aser jendipur Khrista ajangzükdaktsütsü asoshi anogoaben Paul taküm tasü aküm. Yisui ashi, “ Tsükjang ka ali nung tsüker mesura pa pei kija alir, saka pa süra, pai tejang jendi atanger” Yohan 12:24. Yisu Khristai ajaba tenzüker shiai tangar taküm jenjang angutsü mechi pei taküm tasü akümtsüla.   

6. Tanela Lenir Anitetba Wadang:  Khristar Arogo tenzükba nung asen kijai tulu inyaktsü merangba nung matemer. Tenzükba wadang ya tenzüker aser nüburtem telongjem mapa nung takok anguba lokti lir. Asen lenisüba nung tenzükba mapang lenir tajung aniteta medoktsüra, tesülen arurtemi asenok menungra bilemtettsü melena atak atemtsü. Anungji Yisu Khristai nütsüng terana shimteter alima ayimsünga Pa osangtajung perokshidaktsüba medem, asenokia asen mapang nütsüngsür lenir tajung jendi aniteta doktsütsüla. 1 Thessalonika 5:11 nung ashir, ‘ Anungji nenoki inyakba ama, kati ka den ajungshitepang aser tashi idakjang.”

7. Ainkar Ola Taküm Lidaktsüba Wadang: Tsurapur tendak Arogotem shia nung Tsungremer tejembiba shin mangdang kanga tashi ita liasü. Amangbapur saksalemshitsü tashi tulutibaji Ainkar ola (Prophetic voice) ya lir. Apijemtsü shin 29:18 nung ashir, kong ainkar sayutsüngi mali, nübur tesotba mali.” Amangbapur tanela teyongyaba tulutibaji, tanüa sannukeri kechi osang ka abentsü ta ata alidang, Lai O ka zünger shi tesa agi dang jembira amangbapur tanela chiyongtsü mangutsü. Rom 8 nung shia aliba ama, shi nisungi shi indang bilemer, saka tanela nisungi tanela indang bilemer. Atangji tenzüker taküm shia tanela indang bilemba taküm ka ka asütsü nüngdaker. Tsungrem tenzükba mapa nung tanela ainkar olaji ajak dang tematiba ain o lir. Tejen Lai tensa nung Ainkerterji Tsungrem aser nisung tsüngta o tongtar liasü. Ainketerji Tsüngrem melena yokba (God representative) liasu. Tanu iba putu tensa nung Tsüngrem aser nisung na tsüngta o tongtarji asenok tenzükertem lir. Tsungremer ain O tongtatsü asoshi mapang ajak nung Tsungrem den sensaksema alitsüla.

O Tembang: Temeim amangbapurtem, tanü asen Arogo nung tenzükertemia  sama aliba tanela anir aruba nung koba tashi shilem agia inyakdar? Khristar Arogo ka alima tashi temetet aser shi tesa agi tenzüktepa ora, tarutsü lanu putu tendak Arogo asoshi tebilemtsü tulu ajurutsü. Anungji Arogo nung tenzüker aser amangbapur ajaki Yisu Khrista kulisür ka ka ama, asen mapang tanelar sentong tejangja angateta Arogo kaji tanela tashi aser ain nung Yisu Khrista-i yangerba Arogo ka ama kotak kikümbang mesemteta yutsüdi.

*****