~ M. Meren, Ex. Pastor Ungma

Aortem 1872 mapang tashi nungbo ano yim o yim na aser nisung ka o ka na tsüngta lepteptsüngtep tiyalong liasü. Anungji kishikinar o kishikinar na tsungta  shishilemba mesütet, pei yimtsüng nung pei lushi nung aki-alu meyimtet kati ka tsübuba agi alu meyimtet sür ayawara tulu liasü. Saka iba mapang nungji Dr E.W. Clark Sibsagar nungi aposua atua tenemlenji pa kolak mangazüka lua tokongneta  repranger Molung tenem jagi aposu aser lenmang nung ali tesa nung konung yipzüker tananü Molungji pungtet. Yamaji pa Naga tenem jagi atuba ajanga kishikinar tsüngta yimjung lapok aser nisung tsüngta yimjung adok,  aser yim ka o ka na tsüngta shishilemba süteta tebok sünga aliba ajanga kika süchir jenti adoka takar aika aküm aser ayawara anena aküm. Tongtibangsa Ao lima nung tashir jenti adoka Naga lima nung Aor shisanga aküm nung, Aori anir Molungyimsen nung mezüngbuba Ao Mungdang tulu sentep aser kishikinartema aika arua aden aser ajaklen yimjung lapokyonga ao.

Aji oda, America lima nungi pei kolak lepzüka bener aotsü metsübui asen Naga tenem limai Clark atuba ajanga tanü asenok kechi tia nung lir aji lir. Clark Naga tenem lima nungi maludang Sibsagar nung aliba British nunger tulurtemi Mrs. Mary Clark dang naia ne kinungbu pa temang nung tokolak keter Naga tenem nungi arutsü ta amanger no? ta ashiba angur. Tanü asen tia den par mapangji temetemdangma, kechiaser iba mapangji asadangtsü makokba putu ka liasü. Clark asen Naga tenemi matu asübo tanü asen kechi tia nung lila?

Iba sülenji joko asen Aortemi Missionary-temi nungloktsüba ama lepteptsüngtep lima koba dang asenoki Meri-Sangtam ta ajar, par limai yim o yim na tsüngta yimjung mali tetsübu agi sünger aliba tsüngta nungji yimjung adokdakja Osangtajung sangdong. Tanü par lima koba tashi tenük lapoker lir, aji asen Aor metsü, parnoki hau süang nunga ta süang saka aji asen tsüraburi noknü metsübu oda Dr. Clark nungi angazüka tamang tasü-tait agi noknü tsüngta asen Aortemi nungpoka aiba ajanga tanü par tia asen dang nungi tajungba küma odaki. Saka British Sorkaribo tzü atena Osangtajung bener maotsü ozüng tesashi agütsü saka British ozüng metsübui Osangtajungji bener ojen ao nung Missionary Rev. Kijung dangbo Mokokchung SDO-i jaketa meren aser sen jenti senchi (fine) achi, iba senji Longkhüm nunger obala Nokchirabai küpdangtsü, aji asoshi Tsüngremi par kibung koda moatsüogo. Tanü asen jakdang aliba obala nungeribo yamaji tasümaken yimjung mapa inyakba angur.

Tongtibangsa ano 1954 meta nungi Naga nunger o India nunger na tsüngta Naga nüchiso atema tesüngmangtsü rara tulu adok. Idangji India Army-temi Naga nunger kecha maka oda noknü dak alaka hatir kecha maka teka tesa alibapurtem den hatir tulu bener tashi ajak agi parnoki rara. Naga nunger ki ajak anaben asemben rongtoktsü, alu mena akaba ajak mi sena rongtoktsü, aser tsükma süng agi züka ao aser yimtsüng nung tebur-tetsür ajak atsüzüka züka züka aika südaktsü. Tanü Kuki nunger rishikangshiba tang taoba benshi. Yimtaklir mezüngdangtet Jorhat jail nung, Dibrugar jail nung, Kohima jail nung, Mokokchung jail nung, Tuensang jail nung, Mon jail nung küm jenti shibanga ayu, aika jail nung asü. Yim pungu-trok yim ka nung atsü tapu asem agi atsübanger küm ka piyong shibanger ayu, aya agi aika asü. Iba timtim marem nung public aika arem nung alitsü kibong ajunga jena oa arem aser alu nung jenoka ali. Yamaji rishikangshi tulu den tasüba jenti ajuruaka asen Naga nungeri pei nüchiso mapa metoktsü aser tasü itta noktak aser tasü arem.

Iba tensa mapang nungji ABAM lenirtemi anir Arogo nung pastor-tem ishika shimteter Naga lima yamai tajem tia nung shibanger malitsü, saka Yisu dang tamang agi ayimtentsü aser “ Naga lima Khrista asoshi” (Nagaland for Christ) ta kangki nisan tulu yanglua aji apur Naga lima ajak leni nübu lemsar Tsüngrem dang tashi tulu meshir  lendong tulu mapang nung tasütsü metsübui nüburtem tetsübu tatenten tiyalong nung alidang, yamaji yimjung asoshi aposu. Ammang nung tanur tajem tia nung alidang tsürabur aru ama iba jagi Naga nungertem taten tetsübu anen.

Saka ano telung nung alirtem arishidang tema nung alirtemang khuret tulu ajurua aodang 1964 küm Wokha Town nung NBCC Mungdang tulu sentep. Idangji Mungdang aser Arogo lenirtemi anir alima tia yagi matemtsü aser Naga nunger teküp-tesü agi matitsü aser oda oda Naga lima ya samatsü aser aji India nunger nükjidong lir, anungji, telung nung alirtem o India nunger na tsüngta yimjung lapoktsü  bushidi ta sür tashi ajak agi meranga Peace Mission nisung asem shimteta yutsüba parnok den NBCC lenir aser ABAM tenzüker lungjumer meranga inyakba ajanga  iba kümjisa India nunger o Naga nunger telung nung alir na tsüngta 1964 Sept 6 nung yimjung lapoka tanü tashi iba yimjung nungji asenok lia aor. Asen jakdang aliba  Arogo lenirtemi yamaji mapa tajung tasü itta inyakba ajanga tanü asenok yimjung nung lidaktsür.

Asen tsürabur mapang nung asen tetsü-teboutemji kecha maka sensaker teimba oda asenoki inyaktetba kecha maka nung, alu arotsü NINOK Manipur lima nungi dang aben, noknü teimba Manipur lima nungi dang bena amshi. Aor konang sobutsü, shiret-shibu, Laküp-molung, Azük tapu ajak, Rong sentsü balala temerem aser tanak ajak par lima nungi dang bena amshi. Jang Manipur jang tajungba alia chiyung, Ngashi aser Angokong Manipur nungi dang bena achi. Naga lima School ajak shibanger tazüngdak maka, anungji Imphal nung, Ukhrul nung, Tangkhul lima dang oa zünga Aor tashir aküm. Sürabang Aortem kechiba  Manipur Aiatai asoshi ola madoker? Parnokjia  na aser ni ama shi azü adenba purtem lir aser ajakji asen adianu masü no? Yisui ashibabo tsükchir dang pei ama meimang ta, pei kiyonger dang pei ama meimang ta, pei dangbo pi taoba ta bilemang ta shia aliba Lai tekong to asen Aor asoshi menungdakra item tekongtemji shizüka intoktsüla. Kechiba pei kiyongertem aiatai tia nung ammang sangwa maka talidak maka, tachi-tajemtsü maka pei kinungtsü aser kinungbu tepseta intoker tanur temesür mali, kar tanur ka ana aliba tepseta intoker, kar kibong ajunga leperi yoker telushidak maka alibapurtem bilemdangang. Ayawara tepoker nisungtem sümar, tenla ki maka aser sentep anir mali, School maka item amala kiyongertem asoshi Aoli Arogotemi nüktzü yima kwiben sarasadem ayongzüker? Parnok asoshi Aor Khristan kwikati nüktzü kwiben yimtoker?

India P.M-i Kuki nunger asoshi ola madoker na? iba atema nüngsen agüja jembia melili. Manipur Chief Minister-i Kuki samatsütsü pa nükjidong na? Aji asoshi nüngsen agüja tejembi. Ano Naga nunger Chief Minister-i Meiti nunger asemer na? Aji asoshi pa nem nüngsen tagütsü. Ano Naga nunger MLA kwikati Meiti nunger asemer ta ola adoker na? Ajia odang tokjang aser Naga nüchiso bushirtemi Naga nunger ta asüba ajak lungjumer süra, Manipur Naga nunger asoshia kechi ashir? Saka ajia nüngsen agüja tejembi, kechiba item amala meputep adokdakja nüngsen o jembir? Tang mapang pa majung pa majung ta jembia apotangshitsü mapang masü, iba jagi kecha makümtsü. Saka shiba ket nung kin aser yimli aser chuba tashi ajak ammeta lir, Pa dangji Ao Arogotemi nüktzü yima hapta ka shi danga melumitettsü no? Nenevi chubai chuba sobutsü  ajak sepzüka yur süjen abener ali nung amen aser pa nüburtema yamaji pa ama amentsü, shirurutema kasa lumidaktsütsü asoshi anogo asem ayongzük, idangji Tsüngremi melangzü no?

Anungji Ao Khristantem, ordain minister-tem, Ao Pastor-tem, Ao Deacon-tem pei tetushi sobutsüji khen agizüka yuang, nenok tetushi akhümji khen ali nung yuang aser Nenevi nunger ama ali nung mener nüktzü yima aut mezüa Manipur aiatai tia nung alirtem asoshi Elia Tsüngrem dang, Temerem tzüyim kongdaktsüba Mosa Tsüngrem dang aser Yordan ayong kongdaktsüba Yihusua Tsüngrem dang hapta ka ayimtentsü memulunger no? P.M. dang tashi tuluba, C.M. dang tuluba noknü mamshii tongpang jirepdaktsüba Tsüngremji asen Tsüngrem masü no? Arung, Ao arogopurtem noknü mamshii Jeriko longtsüki jirepdaktsüba Tsüngremi Kuki nunger asemtsü asu Meitei nunger asemtsü? Asenoki o mebendangli saka Kotaker rarar nokinketer tulutiba Maikel jagi Meitei nunger asemtsü asü Kuki nunger asemtsü. Aji Kibubai o bendangtsü. Anungji asenokbo Manipur nunger rongnung yimjung adokdakjang ta dang sarasademtsü Ao  arogopurtem ayongzüker. Kechiaser ibai Hindu yimsü o Khristan yimsü na tongpang masü no? Amangbapurtem, tongpang ana nungji shir tsütsü adentsü? India ajunga nung Khristan State ji Nagaland dang masü no?

*****