~ M. Meren EX. Pastor 

Alima nung tanishir tajung ka angutsübaji kanga dang tasak  aser tanishir tamajungi raksaba yanglushitsüjisa tasaktiba aser aiben meyanglushiteter aser ibaji ajanga kin ka telungi alubaji iba nungjagi tenzüker.

Tsüngremi shimtetba Israel kin 12 loksa-a aobaji Solomon’er jabaso Rehoboam kanga majungba ajanga atalok, kechiaser pai tambur shisa magi saka par pur asangurtem shisa agi aser tebu dang nungi tetokzemba agi yimsü asütsü tenzük. Iba amaji tebilemdang makaba shisa tatsü ajanga par yimli nung teraksa tulu adok aser pai yimsü asütsü asoshibo kin ana dang anunga yutsür  Jeroboam-i kin 10 lokzüka bener ao. Israel kin loksaba tetenzükbaji ibaji liasü.

16 century mapang London yimti mi agi 7 ben tashi metsürepa rongtok, iba mi jagi London senti rongsen ajak mitsü küma rongtok, aser nisung jenti rongset, aser iba sülenji wara tulu aru aser nisung mezüngtangtet asü. Iba atakatemji England Parliament nung ashikelak aser tiyazü tsüngteter chuba den atongba tasa tamajung ajanga chuba aini or alidang chuba  pua tepsettsü sen agi Parliament  member-tem  mesüzüker par chuba tepsettsü tebu-metsükshia ata aser chuba ain nungi teshilanger pua tayur ta konung tepuokdak ayu aser tananü chubai  pa asütsü langa mapa tamajung inyaktetaogo ta sür nüburtem ajak sendendaktsür yimjak nung chubaji tokolak atang. Tai maket chuba tepsetba Tsüngremi kanga kukua jashi aser par England limai atakatem yoka küm 7 tashi kukua merenshiba angur. Aji nübur majungba ajanga  atalok masü saka lenir ochi mashi ashikelak ajanga nüburtem nem bener arutsüba atakatem liasü. Anungji nüburtemi timtem marem parliament member ajak arishia tepseta aoba angutsü.

Khen mapang ka  Germany yimti jirepa laoba aser mezüngdangtet nütsüngnübu samadaktsüba meteter südi, iba takoksaji tanga kecha masü saka Tanirshir tulu Hitler ajanga atalokba angutsü, pa mesotet asübo tanü Germany yimti alima kini süngmangtsüsa yangerteter lila ta bilemer.

Israel nung Yihuda kin yimtiba Jerusalem nung Solomon-i yangluba nüngshi tenla ki koba alima ajak nung tushitsüka (kin ajaki jembitsüsa) akatsüba aser Yirusalem lungtsüki China wall dang nungi nungtugutiba akatsüba, saka AD 70 nung Babilon nunger arur ajakji auyi küma tepsatsür mezüngdangtet nüburtem tepset. Oda Yirusalem yimti ajunga tasümang agi asüng saka aika jenzüka otet, aser jena aortemji kar England nung, kar France nung aser kar Germany nung ta perokshia jenok. Saka Yihuda nunger shir alima kintem rongnung jenoka lia ao aser nütsüng jenti bendang lima nung renlok saka kin ajak jagi tesüngmangtsü rishikangshia aser tepseta arishi aser parnok rongsen ajak rakzüka ayu. Oda küm jenti bendang lima alar tia nung liyonga aodang German lima nungbo ano kenüyongi Yihuda nunger aiür-asangur, tanur tila tulu, tantsür-tambur Lakh 6 dak tali Hitler-i tepsetba angutsü. Yamaji Yihuda nunger atakatem anguba taiji kodang Yihuda nunger Farisi aser Saduki-temi  Tsüngrem chir Yisu Khrista ashikelak agi pua kangki nung tepset, iba anogo nungto pa tepsetba ashikelak mapaji  onok tai masü saka pa tai alang tepset ta aitsü. Saka ibaji tai sürabang taiji onok aser onok chirnur aser semchirtem dak kaodakjang ta ain adoka ayimtenba atakatemji atalokba angutsü.

Alima nung Yihuda aiatai tiaji tangar shinga tai masü saka lenir atakatem ochimashi aser ashikelak mapa  ajanga tanü tashi parnok kolak aka matutetba angur, saka aji nübur tai masü saka lenir ajanga atalokba angutsü.

Israel ajunga madak chubatiba David shibai asüküma par temeranger aser nütsüngnübur dak temulung lema asükümtsü tenzük aser pa meketa aliba kintem madoktsü pasasa temulung alem aser nütsüng züngdang, anungji Kibuba Tsüngremi kanga mepela aser David’er nütsüng anogo asem tsüngta nung nisung meyirijang 75 dak tali südaktsüba angur. Yamaji yimsüsür majungba ajanga nütsüng nübur akoksadaktsüba tejangja otsü nung angur.

Akhidang tsürabur putu nung yim ka nungi ka küpzüka  aoba aser yim tilala küma aoba item ajak ya meimtepa lia, jungtepa lia, kati ka taoba ta züngshia lia aoba ajanga masü saka yimsüsür majungba, nübur mezüngshiba ta yamaji lia aoba ajanga pilaba teimba angutsü.

Taoba putu nungbo Naga lima ajunga atema Impur nung dang telungjem mungdang ka liasü saka joko kin aika peisasa tenük rangdaka akümba ajanga aser pei tsüng dak pei mang titeta akümba ajanga Lotha ama, Sema ama, aser Sangtam ama kenü ka kenü ka ta razüka ao. Saka ibajibo tangatetep ajanga aser tepila o tajung jembir temoatsü agütsüteper senshi saka Naga lima aika nung Mungdang ka dang aliba agi ana küma lemsaba angutsü. Mission field karbo  ita aika office ajak shibanga yur kelen telok tuluka pakzüka or kelen dang office lapokba angutsü. Item ajakji Mungdang nung lenir majungba ajanga atalokba angutsü.

Ano Naga lima nung Arogo ka agi ana akümba kar angutsü, aser ibaji Arogo ulura, anungji ana kümdi ta sür tangatetep agi ana akümba masü saka tashi agi rarateper pilaba teimba angutsü aser item ajakji tenzüker shisa tatsü, tangatetba  tatsü aser tebilemdang makaba ajanga atalokba angutsü. America lima Boston yimti nung küm ishika jakdangbo Arogo kanga tulu aser tashi tait ka liasü saka pastor tamajung ka amshia ata, aser pa ajanga Arogo kaji ana küma pakdang aser tanü tashi anaprongla tashi mait kümer lir. Ajakji arogo nung amangbapurtem masü saka lenir majungba ajanga atalokba lir. Ano Arogo tulu aser yim tulu amala ajurua aodang fellowship ana asem kümteta aor aser oda oda, Fellowship-ji independent küma  aotsüsa mapang agi bener arutsüdang kanga sashia rarateper dang pilaba  aika angutsü aser ngua aruogo. Item ajakji tenzüker shisa tatsü aser tebilemdang peria maliba ajanga atalokba teimba angutsü aser yamala maparen nung Mungdang tenzükeri tim lenmang sayuba ngua aruogo. Saka khenkhenbo tatulen ayatsüsa mesüra rongsen akalen noktaktsüsa aser tebu akümtsüsa inyaktetra Arogo o Fellowship anaji Mungdang ajanga masü tashi tsükchir yanglutsütsü mapang ajurutsü. Item ajakji Mungdang leniri kanga shisa ka-a meinyakra teraksaji Mungdang  leniri inyaktettsü.

Ano tanü tensa nung yimtsüng aika nung yimden teraksa aser junga yimsü mesütetba angutsü. Item ajakji külem yimsüsürtem rongnung telungjem maliba, obang memetemba, sarutoker memeimba, pei yimtsüng memeimba ajanga atalokba angutsü aser menden loksar aser sarutoker o sarutoker na tsüngta tsükchi tendaktsür aser molumi ajangzüktsüsa inyaktetdaktsür. Item ajakji  lenir majungba ajanga ataloker. Tongtibangsa election mapang balaka leniri sen talep ka yong yimtsüng yoka achir aser takar candidate-ji minister menden nung mendaktsür aser tashir, yimden meimer, alima yanglutsü tashi aketertem ajenzüka yutsür, kechiyong paji sensaker aser yimsüsürtem  malizükteter. Anungji madoker aser joko Minister mendenji takar amenba menden ang akümer. Saka tadoker ajakibo yimden yimlibo junga bener moteter. Kechiaser north east state 7 rongnung Nagaland State ji tamajungba aser sensaktiba ta jembibaji nümatangtsübo masü. Yimsüsüba mapabo tajung, kanga junga yimsü asür sürnung   oda alimaji pasasa raksar aser pa sasa mainer ta shibai shitettsü.

Hoi! Naga nunger tashirtem, pei lima meimertem lirabang tenük rangdaker asen lima penzüdangang, Kong terenlok ali? Naga lima koleni aor aser tanü asen Aortem kong lir? Oda ashirtangashi tongtibangbaji ka süali ka süali ajak majung masüji lenir kari danga alima raksaba nung dena lira aser aibelena lira, otia tai nangzüktsüla aser tatok meshitsüla. Idangji dang alima süneptsü. David chubaibo pei tai auyi ma nung mener Kibuba dang tatok meshi saka tanü alima nung shiba südir süaka, jakdaka mapa tamajung inyakteter tai mekümnüba lima lir. Anungji kechisa südir süaka, tatok meshiba aser tai nangzüktepba mali tashi Naga lima tia ajaklen telungi lupet alutsü. Yihuda nungertem anogoshia tanem-tanemi lupet lur kodang ponglang atong, idangji par chirnur aser semchirtemi mang yima jepa ashí, ozü tsüraburtemi tai mena aser tanü parnok menen khu onoki abener ta ajepba angutsü. memenui Naga kin iba tia jagi aitsü kanga tsübua bilemtsüra.

*****