TENLAKI NUNGI MAINSHITSÜLA VS TENLAKI NUNGI AINSHITSÜLA

~ Imli P Lemtur, Jorhat

Okila:                                                                                                                     

Kiyimba ya, Baptist Khristantem asoshi temeshi mapa (sacrament) asem rongnung ka lir. Süra, kiyimba kulizüngya Tenla Ki nung dang agitsüla asü, moapu aser tesem balala nunga kulizüng agitsü akok? Baptist tamangbai kechi ashir? Laishibai kechi ashir? ta “Yanglushidi Sensaksem Sabang” (YSS ya Aor whatsApp group ka lir) nung sensaksem agia liasü. Aser iba onük ya züngsem tajung kati tasüngdangba yamai asüngdangba nungi adok; “Asen Aor karbo Youth Oasis Dimapur nung moapu nung sati kuli agiba lir, sürapang parnokji outside of the Church sati kuli agibaji tim asü masü? Tim mesüra parnok dangji arogoi kechi ashitsü?” (Mr. Ben Jamir).

Iba onük nung sensaksem akadang, züngsem aikati shisa tajung lemsatep aser kari  tongtibang tasüngdangbatem (questions) aika asüngdang. Item shisa tajung aser  tasüngdangbatem kar iba ocet nung angutsü. Ajakbo iba ocet nung müka mezülutetba asoshi nemjemer. Membertemi lemsatepba shisatsü/tasüngdangba kar den kiyimba yimyaren (Marriage Rituals) tenzükba indang aser Laishiba tesayuba den rajemshi o tatsüka shisemba angutsü.

Olong Ratet: Khristan Kiyimba Tesayuba aser Yimyaren:

“Khristan Kiyimba Tesayuba” tetezü, Laishiba nung kiyimba indang kechi ashir? Tamangertemi Kiyimbaji koda angatet? Tanabuba nung “Khristan Kiyimba Yimyaren” tetezü, koba tesem nung satitsüla, komala süoshi agitsüla, sentongji koma agitsüla, ki sobutsü komala, wedding ring, wedding card amshitsü/mamshitsü? item amala. 

Temeshi Kiyimba Kong Agitsüla?

Shilem agirtemi yamai lemsatep. Shisa lemsar tenüngbo madoktsür, saka parnoki züluba kürak saka spelling metongshitsür lemsar. Parnoki yamai shia liasü.

“…Tantsur, tambur kümer arogo ajangasa kibong kümnertem, kidang dang satitsüba aika lir. Karbo sentep kidang lokti nung satitsü aaker ta sür, kidang dang Pastor den, khuli agütsütsü deacon ana arua satitsüba lir. Tensa aser taküm yimya jagi kechi ashir ta angatettsü nungdaka kümogo.”

“Ano karbo court nung sati kuli agizüka kibong akümer, itemjia koda?”

“Tantsür tamburbo kidanga sati kuli agütsür saka lanurtembo ajak tenla kidang dang satitsü ta renema lir. Tensa aser mapang sülen arogo anidakra aji agi nübur aika mashileni aotsü ana nung lir, anungji Temeshi kiyimbaji temeshi tenla kidang dang agitsüla” Court marriage aser marriage registration ana ya bendanga angatettsüla. Marriage registration ya tongtipang document ka lir saka tenla kidang sati kuli agizükba sülen dang oa registration agitsü ta inyaker.

“Tantsür tambur, lanur ajak lokti tekülem mapang mesüaka tenla kidang dang temeshi kiyimbabo agidaktsütsüla.”

“Karbo shirang yipden nung lia satitsüba lirko. Ajia koda?”

“Sema nungerbo, wedding home moapu nung yanglur, yangjidang Pastor aser tenzükertem arua satitsüba nguogo. Parnokjia Baptist-sa.

“Nia alima aika nung moapu, hotel, park ama nung satiba nguogo.”

“Khristan kibong ka akümdang Temeshi Tenla kidang sati kuli agiba ya Laishiba tesayuba lir aser  ya asen sobaliba masü, anungji koba kin südir süang, Baptist Pastor kati Baptist züngsem ayir ka aser asangur ka outside of the church sati kuli agütsüba ya kenyongi Laishiba anema lir aser Baptist distinctive agi memelar. Anungji  yamaji kar satir lira, Pastorji license meyipa meshitsüla aser satiba kibong nungi certificateji meyipa meshitsü masü na? ta angateter.”

“Asen Baptist doctrine den maputepba arogo ajak ya mamanger telok nung atener asü, Khristan sür nung balaka?…Khrista dak amanger sür nung, Laishiba kesa dang sür nung, ka (one) küma magizüktetsüba-ya  kechi Christian aka? ta bilemer anü”

“Denomination ajak nung doctrine aser tradition anaprongla lir aser ajakji inyaksangshi nung tongtipang aser temeshi amai bilemba ka lemsateper.” 

“Temshi kiyimba Arogo ajanga akümer ajak Tenla kidang agitsü, ta Ao Arogo ajaki mulungtepa ABAM Central council telemtetba lir…”

Tesem ka nung “…Pastorbaji aputsü bushir, anungji pa state balala nung  jenoka lir. Pa alidak nungi, online ajanga, Sentep service ajak agir. Ano kiyimba, service jia kidang dang agitsür. Church deacon kari witness asütsü aser  Pastorbai online ajanga sati kuli agütsür…Zoom service ajanga tang tashi yamaji mapa ajak function asur.  Aika Yisu agizuka baptitsü…”

“Temeshi kiyimbaji Tenla kidang tang agitsüla, aser aji Laishiba tesayuba”, ta asüba jia koba Lai tekong nung shia aliarna? Tsüngremji Tenla kidangji dang ashi, tanga tesem jagibo marur ana? Mesüra Pastorba/Reverendba-ji Tenla kidang tang temeshi ashi, tanga tesem nungbo memeshi akümera na…?

“Kechi tesem nung satitsütsü ta masü saka satitsüpurji kotaki otettsü asü motettsü ta bilema, mesatitsüdang counseling junga agütsür satitsü nunga koda? ta nibo bilemer.”

“Laishiba Tesayuba” ta masü, “Mungdang Telemtetba” ta amshidi arungma. “Laishiba nung amendaker” ta asüba olongji bener, Arogo inyakyim aika pei sobaliba aser pei atongba nung ajemdaker inyaker, ta tali jangjashitsür.”

Item tasüngdangbatem aser shisaren ajak ya, tanü dendak Arogotem inyakyim asoshi kanga tongtibangtem lir. Ajaki aroka shisadangtsü onük ka. Anungji, iba dak ajemdaker, Kiyimba yimyarenya koda tenzük aser Laishibai-a kechi ashir? Iba indang tatsü agi lemsateper.

Khristan Kiyimba Yimyaren Tenzükba: (Marriage Ceremonial/Rituals)

Tanü asenok Khristan tamangertemi amshiba kiyimba yimyaren ya, putu aika suia melenshia aruba yimyaren ka lir. Aser iba yimyarentem ya tamangba yimsü aser tanga sobaliba ajanga poktetdaktsüba aika angutsü. Khristan Kiyimba Yimyaren ya metetsü asoshi, mezüng/akhi tamangertem aser parnok sobaliba-tem melenshia aruba tatsü agi tatongti lemsar. 

Akhi Tamangertemi Benshiba:

Akhi tamangertemi, kiyimba ya tamangba maparen ka ama mezüngshi, saka sorkar mapa (state matter) ama inyaka aru, aser tanü asenoki tenla kidang kiyimba kulizüng agiba yimyaren yabo maliasü. Anungji, mezüng tamangertemi, kiyimba ya, par sobaliba aser tsüngkong nung koma amshia liasü, yamaji dang benshia liasü.

Roman Ozüng Kübok:

Roman yimsüsüba mapang nung, tsükong aika nung tamangertem prokshia liasü, aser item tsükong ajunga nung, kiyimba yimyaren, tatishitsü agi, tetsür asüngdangba, zük meshiba (dowries), kiyir benjong amala ajakji, Roman ozüngi melaba ama benshia aru.

Kiyimba Khristan Yimya Kümdaktsüba:

Melungi, Khristantemi kiyimbaji, Khristan temeshiba mapa ka kümdaktsütsü tenzük. Mongin Laishir, Augustine of Hippo, parnoki anir Khristan Kiyimba ya meshiteta ayutsü asoshi sayua tenzük. 

Khristan Yimyaren (Rituals):

Jokorla Middle Ages mapang nungibo, Khristan Kiyimba yimyaren nung, Khristan yimyarentem bendenloktsü tenzük. Tatishitsü agi, kulizüng agiba, temoatsü meshia sarasademba amala tenzük. Aser item yimyarentemji Putiri (Priest) anitsü tenzük.

The Council of Trent:

Tanü tamangertemi benshiba Kiyimba Yimyaren metetsü asoshi, 16th Century nung “The Council of Trent”ya kanga tongtibang council ka lir. Kechiaser iba Council nung ya, Catholic Church  nung, Kiyimba Yimyaren ya mapatong (formalization) küma agizük, aser Kiyimba ya temeshi mapa (sacrament) tenet rongnung ka ta Catholic Church nung agizüka ayu. Iba tashi nung Baptist tamangba medenzük liasü.

Reformation aser Telemsa Adokba:

Iba sülen 16th Century nungsa, Protestant Reformation tenzük aser Protestant denomination teloki parnok jurila kiyimba yimyaren amshitsü tenzük. Catholic Church nungi telemsa adokertem rongnung Anglican Church-temi Catholic traditions nungi mepila saka Anabaptists, (Baptist ya Anabaptist nungi razükba lir) amala teloki, ano tali tongmelang kiyimba yimyaren amshitsü tenzük.

Tanü Putu Yimyaren:

Joko tanü putu nung, denomination shia-i, parnok tamangbaren (religious context) nung amendaker kiyimba yimyaren yanglur (liturgical practices) amshia arutar. Ajiasünung, Khristan dang süaka, denomination shia kiyimba yimyaren balala amshiba asenoki angur. 

Pangdak (Legal) Tenüngdakba:

Tanü putu nungbo, satiba kuliji, Arogo kuli dang masü saka pangdak tenüngdaktsü ka kümogo. Tetezü, kibong akümba certificateji, Arogo Certificate dang masü saka pangdak/sorkar certificate-a bushitsüla (Court Marriage Registration).

O Rajemshi:

Tanü Khristan kiyimba tangatetba (teachings) aika Tejen aser Tasen Lai nungi angazüka amshiba lir, saka Tejen/Tasen Lai mapang nung, kiyimba yimyarenji (rituals/ceremonies) tanü asenoki amshiba dang nungi khenyongi balaka liasü. Ano, Tejen/Tasen Lai putu mapang nung, tamangbaren aika (ajak ta ashitsü akok), Yihuda nunger sobaliba den sendaktepa liasü, angji, kiyimba yimyarenjia Yihuda nunger sobaliba ama benshia liasü. Aser alima putu melenshia aruba ama, kiyimba yimyarentemjia melenshia aru, aser ano melenshia aotsü.

Kin/Arogo/denomination kar parnok sobaliba den tamangbaren meyokteper kiyimba yimyaren amshia arur,  aser kar parnok tendak apet (context) inyaka arur. Anungji, Khristantem dang süaka, kiyimba yimyaren balala aika alibaji, tamajung ta mangatettsüla, mesüra aseni (Aor Baptist) benshibajidang shidak/tajung aser danga denominationi inyakbatemji majung/temenen ta mangatetsüla. Iba telemsa yabo, asenok Khristantem otsü nung takar (rich history) aliba temaitsü lir aser pei dendak aliba sobaliba-i (cultural influence) tamangbaren nung nungitba ta angatettsüla. 

Teburi tetsür ka, pa kinungtsü asütsü asoshi agiba, aser shi nung ka akümbaji Tsüngremer sentong, Lipok 2:24, Mathi 19:5-6. Kiyimbaji Khristai longjemdaktsüba, 2 Kor. 6:14. Kiyimbaji, kinungtsü aser kinungbo tsüngta temeshi tezüngzüktepba lir, Malaki 2:14. Kiyimba benjong nung Yisu aden, Yohan  2:1-11. Apuani tsüngta nung kibong asoshi khuret abenbaji Laishibai sayur, Efesa 5:22-33. Apuani tsüngta shi nung medembaji meshiteta ayutsü Laishibai sayur, Ibri 13:4. Iba ya Khristan kiyimba tesayuba lir. Kiyimba tesayubaji (Teachings & understanding) Laishiba nungi pilatsü makok saka kiyimba yimyarenji (Marriage Rituals/ceremonies/elements,) tatishitsü agi, Sobusolem, tesem, ring amshiba, Ki sobutsü enokba, ken atenba, aser chiyongtsütem asoshi, Laishiba nung tatongi shia mangütsü, kechiaser kiyimba yimyarentemji, tensa aser putu den apet melenshia aruba asenoki angur aser ano adoktsü.

Otem:

Kimyaba tesayuba aser tangatetbaji Laishiba nungi pilatsü makok saka kiyimba yimyarenji Arogo, kin, denomination aser jila balala shia tepila alitsüsa. Tetezü, “Khristan Kiyimba Tesayuba” aser “Khristan Kiyimba Yimyaren” anaji bendanga angatetsüla aser benshitsüla.  Aji oda, iba tangatetba liaka,  Mungdang ka kübok, Arogotem ajak liromedemtsü asoshi, “Kiyimba Yimyaren” lateta ayubaji tajungba lir. Saka “tekongmerang lemtet” (rigid) masü tajungba. Kechiaser, tetenzük len member kari ashi ama, tensa kar nungbo, lateta aliba nungi ainshitsüsa mapangi bener arutsütsü. Anungji, kodang tamanger teloki “Khristan Kiyimba Tesayuba” aser “Khristan Kiyimba Yimyaren” ana ya bendanga angatetter, mangatetep aser meputepba shisatsü aika nungi kümzüktsü.

*****