India nung nüngtugu reality show ‘India’s Got Talent’ Season 10 nung 15 Mahila Band-i tetenzük nungi tanü tashi kanga junga shilem agiba ngua jangratema bilemer aser par band nem maneni salute agütsür. Parnok sempet ajanga tetendangertemi tenük asüngba tamaitsü ‘Golden Buzzer’ punguben tashi agütsüogo aser par band ya India lima kanga nüngtugu küma nüburtemi vote agütsüba ajanga tanü parnok IGT nung Top 10 jenjang tongtetogo. Ya atamata mapa ka dangbo masü. Ya Nagaland asoshi otsü tasen ka yanglur asütsü. Ibai police department atema dang masü saka Nagaland state, Naga nunger aser Northeast India rangben asoshi nema atangtsü mapa ka lir. India Reserve Battalion (Mahila) ama telok kati India’s Got Talent nung shilem agiba yabo ashiko ni aibelener ka mesüra India nung ibai mezüngbuba asütsü. Tang ya parnok temaleni atutsü atema nüburtem nungi vote nungdaka lir. Asenok ajaki Mahila Band ya support sünüaka aikati vote tagütsü mashira alitsü. Aji asünung, pei medemsor, kinunger, kiyongertem shirnok vote tagütsü mashi lir, parnok dang tashirtemi vote agütsütsü sayudi arungma. Asenoki Mahila band support asüba tamaitsü ajaki shilem agia vote agütsütsü ayongzüker. Tang ya parnok asoshi vote tejang kajia kanga senti lir, anungji, asenok ajaki maneni temeim sayua parnok nungitdi ta mepishir. 15 IRB Mahila Band madak Tsüngremer temoatsü lidakjang ta sarasadema atar.     

Sd.

Watilemba

Former SSO (SSP)

Home Guards’, Civil Defence and SDRF Nagaland, Kohima