HQ IGAR (North) aküm nung Mokokchung nung aliba 12 Assam Rifles-i “Anti Drug Campaign” sentong tulu ka yangi Nov 21 nü Mokokchung town hall nung ayongzüka kaogo.
Iba sentong nung special guest, Miss Nagaland Kr. Hikali Achumi-i jembidang, asen lima lanurtem mozümora achitsü angazükbaji talisa medemertem, movies aser social media balala ajanga nungi lir, ta metetdaktsü.
Mozülar akümba (addiction) ya tashitak ka dang, anungji, iba atema anepalu balaka nungdaker, saka aiben asenoki mozülartem ya lokti nung meketmeseni amshir, ya nija khuret ka masü saka kibong shia, school, arogo, sorkar aser lokti ajak sakuku shilem agia iba anema raratsüla, ta lai tayongzükba ka agütsü.
2011 küm KRIPA Foundation den yaritepa Mokokchung Town Baptist Arogo-i mozülartem atema detoxification sentong ka ayongzüka liasü, arogo kati iba ama sentong ayongbaji kangabo bulua maliasü. Iba sülenji arogo balalai iba nungi angazüka sentong balala tenzüka ao, ta lai ashi. Iba tebilemtsü atema arogo ya kanga dang tongtibang telok ka lir aser arogoi shilem tulu agitettsü imlar, ta laisa shisem.
State sorkaria iba tebilemtsü tsütsü sentong kar tenzüka aoba angazüker, iba ajanga lokti nung temelenshi karbo adoktsü imlar, ta lai ashi. Taküm kümzükba maparen nung sorkar, lokti balala den arogo aser kija kibong ajaki iba tongpang anema külemi senteper raratsü laisa ayongzüka jembi.
Tanü iba sentong nung Mokokchung SP Manoj Kumar IPS, Mokokchung ADC Chumlamo Humtsoe NCS, 12 AR Commandant Col. Rahul Gurung, Watsü Mungdang tir Arenla, IMDH SMO Dr. Temsumenla Longkumer, Rev. Dr. Bendang Longkumer parnoki shilem balala agia liasü. Telok balalai sentong lemsadakja kentenmenü ajanga tesentepertem longsodaktsü.
The Nokinketer 