Mokokchung district asoshi otsüsütsüsa ‘Li Ning Northeast Invitational Badminton Tournament 2023’ yangi MDBA Stadium, Mokokchung nung tan Dec ita 12-15 tashi asayatsü sentong renemdaki ta Dec 1 nü Mokokchung District Badminton Association ketdangsürtemi parnok office nung osangbenertem den jembidang metetdaktsü.
Iba asayamung ya Nagaland Badminton Association aser Mokokchung District Sports Council (MDSC) na aküm nung MDBA-i ayonga akar. Mokokchung nungbo iba asayamung ya mezüng süa ayonger.
Iba asayamung ya tongtibangsa tetoktepba ka dang masü saka Mokokchung nung badminton asaya nüngtugu kümdaktsüba den külemi MDBA indang mangdang 2040 atalokdaktsüba nung yaritsü nükjidong yur taküm iba asayamung ya yangi ayonger, ta organizing committee, convener, Lipok Jamiri metetdaktsü.
MDBA mangdang 2040 dak rangloker MDBA-i mapangaben district level, inter-club, inter-school tournament, coaching balala ayonga arur. Iba den ano Mokokchung nung badminton riju akatsü nüngdaker, anungji, iba dak sentakba nung tang maparen balala teinyakdak lir aser sangküm küm nungibo tebangmung kabo kümtettsü imlar, ta Lipokisa ashi.
Asayamung dak sentakba nung maparen balala mazüngi inyakdaki, aji oda, district administration-i anir 12 Assam Rifle-temia renemshiba mapa balala nung yaritepdaki, anungji, parnok ajak dang pelar, ta Convener-isa ashi.
Badminton ya asenok asoshi tapet asaya ka lir, taoba mapanga Mokokchung nungi Moarenlai International tournament nung India tenüng nung shilem agia lir, anungji, mangdang 2040 tashi nungbo Mokokchung nungi Olympic nung shilem agir adokdaktsütsü merangtsü, anungji, iba mangdang atalokba nung asenok ajak shilem agir kaka asütsü ayongzüker, ta paisa shisem.
Iba asayamung nung northeast region kübok Badminton Association of Assam, Arunachal Pradesh, Manipur, Meghalaya, Mizoram, Sikkim aser Tripura ta association ajak dangi tejaokba shiti yokogo, item rongnung state karibo arutsü osang agütsüogo aser ano kar nungi osang maru lir, ta tayonger MDBA ketdangsürtemisa metetdaktsü.
Iba asayamung ya Mokokchung nungbo mezüngbuba ayonger aser ibai asenok asoshi maongka, anungji, iba asayamung takok angutsü asoshi nübur ajaki amalitepba den akokba ajak nung nungita yaridaktsünür, ta MDBA ketdangsürtemisa mepishia ayongzük.
Iba asayamung nung asaya telemsa trok (6) alitsü, itemji – Women’s Doubles, Men’s Doubles, Men’s 75+ Doubles, Men’s 85+ Doubles, Men’s 95+ Doubles aser Men’s 105+ Doubles ta alitsü. Asaya telemsa ajak nung takoker mezüngbuba (winner) nem senpet sen 25,000/- aser atongdakba (runner up) nem 15,000/- agütsütsü. Jangratemtsü osang kaji iba asayamung nung match shia takoker nem senpet sen agütsütsü, ta tayongertemisa metetdaktsü.
Asayamung mapang badminton sayir nüngtugu asayar kar jaoka shisatokden akaba den exhibition match kar alitsü sentong lir. Asayamung mapang stadium kima chiyungtsü balala angudak food court-tem lapoktsü. Li Ning Northeast Invitational Badminton Tournament ya Nagaland Badminton Association tenzüker küm 50 ajungba nüngtem nung ayonga akar.
(Source: Tir Yimyim)
The Nokinketer 