Mokokchung asoshi tapak tasen ka asütsüsa tanü “Shisalen Riju” ta sür NPSC aser NSSB tatidang agütsütsü jangrartem nem angati tesayuba agütsütsü asoshi ‘coaching centre’ ka Feb 19 nü Nagaland RD & SIRD Minister, Metsübo Jamir-i lapoktsüogo. Tsüsapang Baptist Arogo Pastor, Rev. W. Süpongi iba riju meshitettsü.
Tetushi tesemdanger Metsübo Jamir-i iba riju lapokja jembidang, Advisor & DPDB Chairman, Tongpang Ozüküm lenisüba nung iba mapatong asangsang kümdaktsüba den shirnokisa iba mapatong dak sentakba nung nungita aser yaritepa arudar, parnok ajak dang pelaba metetdaktsü.
Riju ka lapoka nisungi nisung ka taküm jenjang yanglushitsübaji mapa temelabo masü. Coaching ji kanga tongtibang lir, ibai tanga maparen ka ama masü, anungji, coaching agirtem dang masü saka tesayurtema sakuku bendanga agütsütsü nungdaker, aji mesüra bilemba ama süngjang metangtettsü, ta pai ashi.
Coaching taginür ajak agitsüba masü saka shirnok temulungtetba tulu nung arur parnok nemji maongka agütsütsüla, aji mesüra iba coaching centre tenzükba nükjidong metongtettsü, anungji, coaching agir shiai aser tesayurtemi ibaji süoki ia agitsüla, ta paisa ajungshi.
Takok anguba – mangubajia tongtibang lir, saka item dak alaka nisung ka taküm koma libalirua aor ibaji tongtibangba aser iba education-ji agütsütsüla, aji oda, tesayurtemi kanga kümdanga aser shisa ka-a sayutsü asoshi paisa ayongzük.
Coaching centre-tem ya nükjidong balala nung lapoker, asenoka koba nükjidong atema iba riju lapok, ibaji kanga junga angatettsüla. NSSB, NPSC, UPSC tatidangtem ya yimya balala nung agir, anungji, itemji bendanga aser tensa den apet tawa tanü atalokbatem sayutsü asoshi paisa shisem.
Government mapa tazüng ka adokdang private sector nungbo mapa noklang tama adoker, anungji, itemjia mamatoki tangatetba agütsütsü asoshi paisa ayongzüka liasü.
Iba riju ya Mokokchung district planning and development board (DPDB)-i ‘LADP Common Pool’ nungi achayanga anepaluba mapatong ka lir. Iba riju ya Mokokchung yim kübok Tsüsapang Sector nung taoba mapang Baptist English School aliba tesem nungto amenoka lir. Mokokchung yim putu menden den angatetepa Ao Baptist Arogo Mungdang (ABAM) dang temelaba agir iba riju ya lapokba lir. Iba riju nung tongtibangsa competitive exam balala atema tesayubatem agütsütsü.
Sentong nung Advisor & DPDB Chairman – Tongpang Ozüküm, Shisalen Riju Management Committee züngsem & FAC nung tesayur – P. Tiatemsü, ADC & Convenor, Shisalen Riju Management Committee – Chumlamo Humtsoe, Mokokchung Village Council Chairman, ABAM executive secretary – Rev. Dr. Mar Pongener aser Mokokchung DFO – Dr. Sentitula (IFS) parnokia shilem balala agia liasü. Tanü iba sentong nung Advisor Imkong L. Imchen aser Advisor T.N Manen na densema liasü.
(www.nokinketer.com)
The Nokinketer 