5th Mokokchung Inter-Ward Football Tournament 2024 osang

(Artang ward final-i igo, Arkong o Sungkomen 2^nd semifinal asayatsü)

19^th March nü 5 bubaMokokchung Inter-Ward Football Tournament mezüng semifinal asaya Artang Ward o Mongsenbai Ward tsüngta yangi Imkongmeren Sports Complex, Mokokchung nung asayaba, Artang-i penalty nung goal 7-6 agi Mongsenbai pur madak takok tulu nguteta final asayatsü jenjang ajangzüktetogo.

                Tanü iba asaya nung, mezüng asaya tesadang (1^st half) tashibo telok shingaia goal kata magütsütet. Aji oda, tanabuba asaya tesadang (2^nd half) tenzüker minute 59 or lia mezüng goal Artang nungi jersey No. 10, Tongpangnokdangi D-Box telung nungi yok. Iba goal kaji yoker külen ano telok anaprongla teyakyakba küma meranga saitep. Ano kopi mali-i tanabuba goal jia Artang nungisa jersey No. 11, Chubalemba-i minute 64 nung metsüokja Artang-i goal 2-0 agi koka liasü.

                Aji saka, Mongsenbai pur temulung majem aser parnoki kanga meranga asaya, aji oda, khenpika lirbo Mongsenbai nungi jersey No. 12, Imnatoshi-i minute 69 aser 77 nung goal ana atonga-atonga idaktsür anatsülen goal kasasa kümdaktsü. Goal ana küptokdang Mongsenbai pukümer (support asürtem) tepela nung ola tashi agüja pongtenbaji tuluka liasü.   

                Iba sülenji mapang shia telok anapronglai goal yoktsü maongka nguaka, kataia goal magütsüteti lemzüktsüba mapangji tembang. Aji sür, mapang talila (extra time) minute ter-er apulokja saitep saka yangjia shingaia takokba goal ji magütsütet. Anungji, asayamung temzüngi melaba ama penalty metsütep. Penalty metsütepdangjia goal trok-rok tashibo kasasa atu aser tenet-net metsütepba mapang Artang goalkeeper-i ball ka nokdangteta iba asaya parnoki takok angu. Tanü asayaji final match repranger amato telok anaprongla sakuku tajung tesa liasü.  

                21^st March, 2024 Brihostibarnü tanabuba semifinal asayaji nikong 2:00 ako nungi tenzüka kasa tesem nung Arkong Ward o Sungkomen Ward na asayatsü. Asayamung tepiyong repranga arunung, ward anaprongla league match nungi quarter tashi kanga junga takok ngua asaya-a atuba angur. Anungji, iba asaya ya shibai akoktsüar shingaia meshiteter, aji oda, shibai akoktsüar mapangi dang bener arutsütsü.   

*****