India lima kin balala rongnung tsürabur mapang nungi Naga kin temeten ya balaka wazüka yuja lir. Tanü putu nung technology tashi tongtibangsa, Artificial Intelligence aser Radio Frequency Identification ajanga alima ajunga rongsenketzüng (economy), shishilembaba (marketing), aser yimsüsüba tashi (political power) tzüzüng ozüng ka kübok aotsü tasa amshia aodang, asen Naga senso leniri anir nüburtem temeten wazüka ayutsü terenemba koba tashi lir? Ya Naga nunger senso tajung ajaki kanga aroka shisadangtsü mapang kati menepogo ta bilemer. Indian political tashi agi dang asen meraket sobaliba aser tamangba yimsü anokshitsüsa kümra, asen Naga kin temeten jenjang makai akümtsü.
Naga kin tejangraba aser taginüba tangar dak nungi khenyongi balaka ta asenoki meteta lir. Asen lenirtemi anir nüburtem ajaki Naga political settlement atema kümsa küm jembia arur, saka temelenshibo kecha maka. Lanurtem asoshi employment aser alima asoshi development jembia aruba tanü pungmang nung shi den chiyunger sak ama kümogo. Naga nungerji India nunger dang nungi teprangtsü sentsü balaka, chiyungtsü balaka, sobaliba balaka, libaliru balaka, sübosolem balaka, oshi balaka,yimyayimpong balaka, aser tamangba yimsü balaka. Item ajak dak ajemdaker Indian Constitution Article 371A nung temeten pezü agüja lir;
(i) Religious or Social practices of the Nagas temeten
(ii) Naga Customary law temeten
(iii) Administration of civil criminal justice involving decisions according to Naga customary law temeten
(iv) Ownership and transfer of land and its resources temeten
Iba den 1873 küm Bengal Eastern Frontier Regulation ajanga Inner Line Permit tashi agüja aliba den, 2001 küma Naga nunger asoshi temeten, ‘The Uniqueness of Naga History’ recognition agüja lir. Ano item dak alia Naga kin asoshi temeten aika lir. Süra item temeten wazüka ayutsü asoshi Naga kin koba tashi kümküma lir? Tanü Indian political tashi bener yimsüsüba sorkar ajanga India lima ajunga tamangba yimsü ka asütsü, sobaliba ka akümtsü, sobusolem ka asütsü, oshi ka asütsü, aser kechisarena ka dang asütsü ta yimyim sangdongba mapang asen Naga nunger terenemba kechi? Ya senso tajung ajaki kangasa aroka shisadangtsü nüngdaker. India lima ajunga nung Khristan purtemi dang masü, saka Hindu, Muslim, Sikh, Buddhist, aser tanga tamangba yimsü ajunga agi RSS teloki tentetba sorkar anema ola tesashi adokdang asen Nagaland kong Khristan teimba lir, yangji lenirtemi anir nüburtemia koba tashi iba tashiyim amshiba sorkar anema rarar?
Temeim amangbapur tajungtem, item ajak dang alia asen Naga nungeri Khrista tsüngdang tenangzükba tulu ka atemzükalir. Aser iba tatemzükbaji; ‘Nagaland for Christ.’ Iba ya amatokra Naga nunger asoshi Tsüngrem tsüngdang aiatai asütsü! Asen Naga nungerisa 1989 total prohibition Act passed süa Naga limaji Dry State asütsü Tsüngrem tenüng nung renem. Ano küm ter tejakdang asen Naga nungerisa Clean Election Campaign tenzüka election tongpang rara-a arur. Naga kin ya Tsüngremi kangasa meimba kin ka ta asenoki bilemtsüla.
Tsürabur tendak mangko agi konang naroküm azüker liaka, Yisu senti azü agi asenok alangzüka nüchi kümdaktsüogo. Tajung meliaka Tsüngremi asen kin shimtetbaji tesüngmangtsü ka lir. 1 Peter 2:10, nungshia aliba ama, ‘Khen mapangbo nenok Tsüngrem nübur mesüi liasü, saka tangbo nenok Tsüngrem nübur kümogo. Khen mapang nenoki Tsüngrem taochi magizüki liasü, saka tangbo nenoki Pa taochi agizükogo.’ Temeim amangbapur tajungtem, asen ajungba agi masü, saka Tsüngrem angati temeim aser taochi ajanga asenok alangzük aser ya tashi Pai asenok anir arur. Temenen lima ka nung alir asünung asen tamang anokshitsüsa tensa tia balala ajurutsü, saka kecha nunga temulung ajema melili. Galatia 5:1, nung shia aliba ama, ‘Nüchiba asoshi Khristai asenok nüchi kümdaktsüogo. Anungji tanaben alar tapuba süngra nung tapu.’ Yisu-i ashi, “Alar kidang teti malir, saka techirbo teti alir” Yohan 8:35.
Temeimbatem, asen lima tejakleni aotsü, yimji-yimjung tzülok ama ayimtsü, satok-satoka amangtettsü, pei taküm aser kibong asoshi sobaliba tetsükdak malitsü, yimsüsüba tajung, tesünep, tepela, aser temeim nung iba tobur tajung Naga tenem, tarok aser lenten nung tasoshia jangratema alitsü temulungjang ajak arakzüa iba ocet ya zülur. Naga kin rongnunga asen Ao kinjiTsüngremi balaka jatetba ta meteta pei shimang, tanela, aser shisatsü ajak arakzüa Yisu tiyongtsü südaktsür telemtetba shitak agia jajatsü ayongzüker.
*****
The Nokinketer 