(Ne Senti Vote nung Alima Kümzüktsü Tashi Tulu Lir)

Tsüngremi pa mesükba nung yangluba taküm ka nület setoktsür nok agi tokong tangzüker mapa tajung ka inyaka takok tulu angu ama konang tulu bener oh hoi, oh hoi ta molushia tsüngsangtepba kin; atangji shiruru dena tamajungba jenjang nung aliba Naga kin (tongtibangsa Ao kin) dangi ajak metetsang Tsüngremi America nungi kotak tenyar ka ama Edward Winter Clark jateter tokong, tenem, lenten aser tzüyim ajanga anir arua Yisu tekümtet aser nüchi osang sangdonga asen nübur shiruru jenjang nungi nüchi jenjang melentsü.

Ammang kanga temelem, kati ka angutsü mokoki aliba mapang anüng nung petinu tila ka kinük külen ting ta adok ama, asen kin asoshi ibai shingaia magütsütetba tematiba tesangwa liasü. Iba tesangwa ajanga nükpok kin tenük lapoktsü, mangsa kin sobutsü tajung melentsü, ashimetet maka, asen kidanger Assam nungeria kanga nemja, tiluja aser menüja benshiba kin; saka tanübo alima kinük ajakleni oa atongsemtettsüsa temaba jenjang renemtsüogo. Iba jenjang ya Yisu-i bener aruba Khristan yimsü ajanga lir. Shingaia aji nunga ta meshitettsü kechiaser aji tsüngchi tatalokba lir.

Saka tanü asen kin nem nüchi agütsüba Khristan yimsü lendong tulu nung lir, amokmeren tulu nung lir. 2014 küm nungi India nung BJP aser RSS ajanga yimsü asütsü tenzüker India nung Yisu dak amangba purtem jenti rishikangshi tulu nung lir. 2023 küm tenzüker mezüng ita 8 tsüngta nung Yisu dak amanger rishikangshiba 525 ben tashi tatalokba liasü. Tetezü anogoshia tamangertem 2 tema dak rishikangshiba liasü. United Christian Forum ajanga ashiba agi 2023 küm India nung State 28 rongnung 23 nungbo tamangertem rishikangshiba liasü. Evangelical Fellowship of India ajanga ashiba agi, taoba küm tamangertem tongtibangsa pastor-tem yazü kuli yanglua 520 tashi police-i apuba liasü. Tanüa pastor-tem aika tepuokdak balala nung lir.

Kidanger Manipur ji reprangang, May ita 2023 nü nungi tenzüka kin ana tongtibangsa Hindu Meitei aser Khristan Kuki na tsüngta rara adoka nisung 100 tema taküm samaogo, yimtsüng 160 nung ki 4500 shi mitsü küma rungtokogo. Iba den tenla ki 253 rungtokogo. Tesüngmangtsü rongnung kaji Imphal yimti nung Meitei Khristantem tenla ki tashi rungtoktsüba liasü. Tetezü kin ana tsüngta raraba dang masü saka Yisu dak amangertem samatsütsü inyakba nükjidong tulu liasü ta iba tatalokba ajanga metentsür. Saka tanü tashi India Prime Minister Narendra Modi-i Manipur semdangtsübo toktsür tebanga melashii lir.

Ano asen kidanger Assam nung February 10, 2024 nü Hindutva telok Kutumba Srakshya Parishad-i missionary School-tem ajak nung Khristan tamaitsütem, Yisu aser Mary noksa dena agizüktsü amokmeren tulu agütsüogo. Iba den Assam nung tanebtsüba mapa meinyaktsü February 26, 2024 nü Assam Assembly nung renemogo. Item ajak ya Yisu dak amanger dak rangloker inyakbatem lir. Ibaji dang masü Khristantem asoshi tongtibangtiba anogo ana Yisu asoba anogo (Khristmas) ‘Good Governance Day’ asütsü sangdong, taküm Yisu shia aruba anogo (Easter Sunday) mapa inyakba anogo asütsü ozüng agütsü. Item tatalokba ajak yagi tanü asenok Yisu dak amangertem lendong tulu nung lir ta kuli tejangja angur.

Tanü Hindutva nükjidongji linük ka (one nation-in one State), sobaliba ka (one culture), tamangba yimsü ka (one religion), oshi ka (one language) lir. 2014 nungi BJP aser RSS-i yimsü süa arudang item nükjidongji atalokdaktsütsü mechi tashi ajak amshia India lima nung tanü lokti yimden (democracy) tebilemtsü jenjang tulu nung lir.

Iba tebilemtsü tulu agi asenok amokmeren dang, Yisu dak amanger ka ama asen teinyaktsü tulu lir. Naga lima nung Lok Sabha Election April 19, 2024 nü agitsü lir. Iba election nung Yisu dak amanger rishikangshiba telok nungi asen lima, asen nübur aser India lima ajunga kümzüka ayutsü ne senti vote dak tashi tulu lir. Anungji, 19th April, 2024 anogo nungji senso tajung ajaki tanü alima ajunga amokmerenba telok anema tasüita polling Station-i oa pei vote peii agütsütsü tasüita shilem agitsü mepishir. Tatem nung ya mamali, na aser ni shiruru jenjang nungi nüchi agütsüsang Yisu Khrista mamai iba election nung shilem agitsü ayongzüker.

~ Ao Baptist Pastors’ Fellowship