~Dr. R Zulu Jamir, Kumlong Baptist Arogo

Alima putu ajak nung Yisu Khrista dak amangba agi amokmerenba aser rishikangshia südaktsüba ya kechi tai ajanga ta bilemer? Roman yimli merena aliba mapang Tsüngrem chir Khrista alimai aru. Herod chubai anir yimsüsur ajungai Tsüngrem chir Yisu Khrista atsüngtoktsü tasa aika asa. Roman yimli nungsa Nero yimsüsüba mapang 54-68 AD nung Yisu Khrista dak amangbapur ajak samatsütsü nükjidong nung rishikangshia südaktsütsü tasa balala amshia inyak. Yisu nütsüngtem Yohan dak alaka tanüngba nütsüng ajak rishikangshia südaktsü.  Saka rishikangshi koma tuluba liasü, yamaji Khrista yimsü tuluba jangrua ao. 313 AD nung Roman yimli nung yimsüsür Constantine-i Yisu Khrista agizük, iba sülen Roman yimli nung Khristan yimsü senso ajak asoshi tamangba yimsü asütsü agizüktsü sangdong. Ibai Tsüngremer ain mapa tulu jungkai adokba rongnung ka lir.


1933-1945 mapang Germany nung Adolf Hitler lenisüba kübok Nazi telok tashi kanga ulua aküm. Adolf Hitler yimsüsüba tendak Germany nung Arogo meyi terti (eighteen thousand churches) liasü. Item rongnung Arogo meyi asemi (3000 churches) Hitler-i aniba Nazï telok anem. Kodang Hitler yimli Germany nung amenok, pai item Arogo nung Pastor-i anir amangbapur ajak tepseta intok. Adolf Hitler tsüngrem ama kümer yimsüsüba mapang küm ishika tsüngta nung tai maketba Yihuda nunger million 6 tashi tepset. Hitler ama shibai pei yimsüsüba mendenji ajak madak tematiba küma tashi amshia noktak, mapang tatsüka tsüngta nung tsüngrem kümnüsang yimli jenjang makai sama.

Tanü asen India nung küm aika Yisu dak amangba agi rishikangshia südaktsüba zünger mezüngdangma ajangshia arur. Khristan school rungtoktsüba, tenlaki rungtoktsüba, aser pastor taküm aser kibong den amangbapur jenjang makai samatsüba item temeten kong lir? India nung Khristantem kecha tai makai rishikangshia südaktsur telokji RSS Hindu tamangba yimsü ya lir. Tia kangasa maka iba Hindu tamangba yimsüi tentetba political party ajanga küm ter tashi India ajunga amokbanga yimsü süa arur. India nung RSS teloki dang ano maneni yimsü süa ora, India senso tajung tali majungtsü. Anungji, tamajungba agi memenep dang mera tajung agitsü mapangbaji tang ya lir. Tanü democracy lima ka nung senso ka temeten ajak nembanga yutsür, ozüng tenük tapok kümdaktsür tashiyim mapa inyakba ya tetamatsü ulura. India ama democratic lima ka nung prime minister aser legislative assembly member ajak nüburtemi shimteter. Saka tanü ruling political telok ket nung; Reserve bank of India, Supreme Court, Media-Technology aser Military tashi ajak amshia yimsü asüba ajanga tanüngba nüburtem jenjang aser temeten maka. Temeim Khristanpurtem, asenoki shimtetba political tashi amba telok  kati asenok khristantem aser minorities telok balala rishikangshir süra, kechiba rishikangshir telok ka nem asen temeten agütsütsü? Iba ama tetsübutsü aketba telok ka nungi kümzüka alitsü asoshi Khrista dak amangbapur shiai; mangdang akaba, sobaliba, kin kidong, aser tamangba yimsü ajunga kasa meimba lenir nem asen meyongnem agütsüdi. India lima ajunga nung Khristantem dang masü, saka tamangba yimsü balala den Hindu nungeria pei nübur anemba kanga bulua angur. Ya India lima nung temelenshi ka arur südi ta bilemer. Anungji, shirnoki na aser Yisu anemer, parnok asoshi asen temeten magütsüli. Mapang aser tensa tamajungba agi memenepdang, item telok nem yimsü asütsü yimli aser sabang memelatsüsa noktangdi.


Temeimbatem, Daniel 1:8, nung shia lir, ‘Saka Daniel-i pei mulungba nung chubar chiyungtsü tajung mesüra pai yi ajemba agi pa sasa pa memenentsü ta mulungtet.’ Asen taküm aser lokti nunga temelenshi asoshi temulungtetba ka dang nüngdaker, aser aji ne telemtetba tajungji lir. Tanü Khrista dak amangbapur shiai temenen inyakyim matsüngdang iba o ya tasü itta ashitsü nungdaker. Asen lima nung Yisu meimba pur jenti tenüki angur. Arung ochiji yimdong nung laoa lir, asenoki iba ochibaji mesodi. 13th April 2024, anepdang 3:49 am süia aodang asen Aor asoshi Tsüngremi mangdang tejangja ka sayu. Mangdangji yamai liasü; asen Aor telok tulu ka tzüyim ka ajangdanga aotsü kecha lenmang makai lia, ola kati ashi! tatsüka or iba tzüyim ajangdangtsü lenmang ka lir, anungji iba jagi oang ta ashiba den iba tzüyim ajangtsü lenmangji ngua tzüyimji atendanga ao.

Temeimbatem, Tsüngrem mezüng chir ka ama asen Naga nunger rongnung asen Aortem Pai shimtet. Tanüa asen Aor ajanga Naga kin tejakleni anitsü Tsüngremi asenok amshinür. Israel nüburtem tejaklen temerem tzüyim, aser tesülen Egypt nunger kor talungtsü nung aria arur ta asüba tensa ka nung, Tsüngremi tzüyim ana küma sadanger Israel purtem anitetba ama, asen Aor asoshi Tsüngremer sentong tulu ka lir. Anungji, iba temoatsü aosu memeküptoktsüsa Tsüngrem sentong dangi ka küma lungjemshidi. Asen senso temeten aser asen kümtetdakba Yisu kecha dena memeyoktepli. Atangji tongpangji tulu, Yisu-ia Yohan 16:33, nung shia lir, ‘Alima nung nenok timtem tekangshi kar, saka tasü itang ni alima kokogo.’ Atangji timtem tekangshi jenti liaka asenokia tongpang ajak Yisu tenüng nung koktetsü.

*****