Yongkongsangla R

Tanü alima nung ochishir, jembiba ama mapa küma inyakba aser nüburtemi tamang katetba lenir tensai akanger, ta shisateta iba maongka tajung agia ULB election nung noktaker, ta Mokokchung Municipal kübok Ward No. 4, Artang Ward, Mokokchung nungi candidate Yongkongsangla-i osangbener senden ka nung metetdaktsü. La dang ajaki R. Asangla ta dang ajar. Mokokchung ULB election nung Artang Ward ya tetsür reservation küboki arur.

                R. Asangla ya Süngratsü nunger asür Repakokbar jala lir. La ya Christian Higher Secondary School, Artang Ward, Mokokchung nung tesayur mapa küm 20 shi inyaker. La ya tenendak tesayur ka lir, iyongji la sempet tajung ajiteta 2015 küm Sub-divisional Teachers Award aser 2021 küm State Teachers Award senpetja lir.

                Nüburtemi yaria la adoktsüra, “kechi mapa südir süaka merüka (transparency lia) Artang Ward yimden tawabangba kübok nüburtemi mulungba nung ochi shia inyaktsü kü tejangraba aser telemtetba lir”, ta lai ashi.

                Mokokchung town ya taoba mapangbo town committee ka dang liasü, tang ya jenjang tera ajungketer municipal council nung bener aotsüba den ano tetsür nem yimli agütsü nung, iba maongkaji agia alima yanglutsüba nung tetsür shilem tulu lir ta angateta ochi tangatetba nung inyaktsü mulungtetba indang laisa shisem.

                Municipal Act ya asenoki jembiba dak alaka ano mapa inyak metenzük, ibai Act tasen ka asünung, ward songjen tajangzük angutsüsa tim lenmangtem asadanga, nübur taginüba ama inyaktsü la nükjidong lir.

                “Kiyong nung tetsür jenjang aser tia balala asadanger tensa den apet maparen karbosa inyaktsü kü tejangraba lir”, ta iba osangbeneri tetsürtem atema kechi inyaktsütsü tebilemba lir? ta metetnüa asüngdangba ka langzüdang metetdaktsü.

                “Ner kiyong atema kechisa inyaktsü?” ta asüngdangdang, “teinyaktsüji aika lir saka tenüng teta mashir saka tensa den apet nungdakbatem apiteta inyaktsü aser sarkar nungi kechi terenloksa arudir, nüburtemi aginüba ama ochi shia inyaktsü”, ta lai ashi.    

                Iba osangbenerisa “ticket karbo bushidar asü”? ta metetnüa asüngdangdang, “Congress ticket meshidar”, ta lai ashi. “Kechiba Congress ticket?” ta asüngdangdang, “Congress ya secular party ka lir, Congress tangatetba (ideology) nung takar sensaker aser tanak temesüng kecha tebendang meli-i inyakba party lir”, ta lai langzü.     

                “Nüburtem dang teshinüba kar ali asü?” ta metetnüa asüngdangdang, “clean election nung ajemdaker ne senti vote-ji asen lima yanglutsü tamendakdak südaktsünür”, ta laisa ayongzük.