Sb. Alemtuba Imsong-i tang aruya aliba ULB Election nung Sangtemla Ward, Mokokchung town nungi tokteptsü sangdongba sentong ka 14th May, 2024 nü osangbener senden ka Hotel Whispering Winds, Mokokchung nung ayonga akadang metetdaktsüogo. Pa ya Longmisa nunger Sangtemla ward nung alir Wb. Imosanen Imsonger jabaso lir.
Nüburtemi ni adokdaktsüra tongtibangsa lanurtem dak rangloker parnok jenjang ajungkettsü asoshi inyaktsü tejangraba tulu yur ni election nung noktaker, ta pai metetdaktsü.
Tanü alima ya kanga kara ainer aser iba denji asen libaliru aser maparen lenla ajak nung tsüngkang medema aotsübaji tensai akanger aser tanü alima ainba den medemdanga lanurtemi shilem tajung agitsüji kanga nüngdaka kümogo, anungji, lanur nem maongka agütsütsüla, ta pai ashi.
Sangtemla ward nung kibong 770 dak tali lir aser nütsüng yongsük ajak agi 2670 shi lir. Yangji lanur 1550 shi lir. Nursery nungi high school tashi azünger 1000 shi, higher secondary azünger – 70 shi, college nung degree balala azünger – 50 shi, master degree agir – 40 shi, Laishir – 5, lanur mapa mangur – 260 shi, Govt. sector nung lanur – 45 shi, private sector nung – 40 shi, lanur hajira oa alir – 30 shi lir. Sangtemla nung nütsüng yongsük asadangra lanurtem noklang nung 58.18% shi, liso masür (non locals) 23.44% shi aser teintet kibong 18.36% shi lir. “Tanü ni ULB Election-i aiba nükjidongji item nübur telemsa balala asoshi lanur tashi nung mulungteter noktaker”, ta pai ashi.
“Lanur ka dang asünung, tashimait aika alitsü akok saka kü tashimait dak merangloki nenok nungi temoatsü aginür. Ward nüburtem asoshi kü taküm ajak tenla-a tajungtiba nung shilem agitsü ni nangzüker”, ta paisa mepishia ayongzük. ‘Tamakoktsü mapabo ni menangzüker, saka nenok nungi shisatsü aser tangatetba tajung ajanga telungjem nung inyaktsü tejangraba lir’, ta paisa shisem.
Sb. Alemtuba dang iba osangbeneri “na koba ticket nungi tokteptsü?” ta asüngdangdang, “NDPP ticket bushidar, ni ya NDPP nung active member ka lir, anungji, ticket ji ni angutsü imlar”, ta pai langzü. NDPP ticket rakteperji pa dang masü ano tangara ka lir ta angazüker.
“Na adokra nai kechi nungsa tongtibang agütsütsü?” ta metetnüa asüngdangdang, teinyaktsü aika lir saka item rongnung tongtibangsa lanurtem pei sempet metetdakja itemji renlokdaktsüba ‘skill development’ tsütsü temulung agütsütsü, micro financing nung ya maongka jenti sentaka lir, anungji, iba nungjia temulung agütsütsü aser talisa Sangtemla ward ya commercial tesem ka asünung, aiben janaona tebilemtsüsa arur, anungji, janaona koda anepalutsü (waste management) item nung temulung agütsütsü, ta paisa teinyaktsü kar lemsatep.
Arishi küm 34 tain Alemtuba Imsong ya Sangtemla Youth Association (SYA) tenteter rongnung ka aser mezüng vice president lir. Iba sülen SYA nung tir inyak, Longmisa Students’ Union nung social service inyak aser tang-a sanen luden züngsem ka lir. MTBA A&B Youth Fellowship nung vice chairman, MTBA youth department nung Finance Secretary aser MTBA Youth Board nunga züngsem ka liasü.
Candidate tenüng sangdong den repsema ano ‘Shisalen Tasen : Tarutsü Asüngsashitsür’ ta sür tanü asenoki ajuruba tebilemtsü/teinyaktsü indang onük balala nung shisatokden sentong ka aka aser iba nung tongti shilem agirtemji – Imlimanen Jamir, Toshibenla Imsong, Imsuwapang Jamir aser Moasunep Pongener parnok liasü. Tejembirtemi teshisadangtsü onük tajung aika bener arua lemsatep.
*****
The Nokinketer 