Langpangkong Senso Telongjem Mokokchung (LSTM) pur yimkong senden 25th May, 2024 nü yangi Mokokchung town hall nung takok manung kaogo.
Sentong nung Executive Engineer, PWD (R&B) Mokokchung, Toshikabai tayongzükba o jembidang, taküm liyonga aotsü asoshi United Nations-i 2015 küm ‘Sustainable Development Goals (17 SDGs)’ ta sür mangdang ka yanglua alima tesem balala nung maparen inyak tenzükogo, aser iba nungji tongtibang onük 17 keta lir. Ibaji junger ta sür India aser Nagaland-ia agizükogo. Onük 17 nung ya taküm libaliru ajak sentaka lir aser ibaji 2030 tashi nung atongtsü merangba ka lir, ta ashi.
Iba SDGs mangdang ya district level nungi tenzüka yimdak yimtsüng tashi nung meinyakra, iba mataloktsü. Iba dak rangloker pei yimtsüng, pei tzükong aser Mokokchung town atema langka kar inyaktetra alima ajungketba nung shilem agir kaka asütsü aser tangaria nükshia reprangtsü, anungji, iba dak sentakba nung shilem agitsü asoshi pai ayongzüka ashi.
Tanü sarkar mapa kanga ajema lir, saka tazünger teimba teimba akümer, aser tetoktepba sashira kümogo. Sarkar mapaji noklang shilem nung shilem ter-i dang angutsü. Tanübo taoba mapang amato masü ajak melenshiogo, sarkar mapa imlatsüba mapang to süogo, aser tazünger ajakibo sorkar mapa mangutsü aser tazünger aika pei azüngba den mesütep mapa inyakdar, anungji, asen jakdang kechi inyak nung ajungtsü ta tebilemdangtsü mapang ka arur, ta paisa kuli kar bener arua lemsatep.
Joko teinyaktsü ajak agi asen lima talisa Langpangkong lima ali peria lir aser ali tajung asünung tsünüsempong kechisarena ajak ajunger, anungji, ali dangi meyiptsüla, ta pai tayongzükba ka agütsü. Asenok perir ang tangar dang dena yoktettsüsa züsentettsüla, ta paisa shisem. 17 SDGs nungji shinga tesülen tetoktsü, ajak lirumedema anir/amer aotsüla ta shia lir, anungji, iba tangatetba nung lirumedema aotsü asoshi paisa ayongzüksem.
Sentong nung tepela o jembir Ao Senden tir, Marsanen Imsong-i jembidang, Langpangkong nunger aküm nung Ao kini pa nem Ao Senden tir inyaktsü yimli aser maongka agütsüba asoshi pelaba den nübur mulung chidakja Ao kin tejakleni anitsü mulungteter apusor, anungji, mapang ajak nung khuret tongittepa yariteptsü asoshi paisa mepishia metetdaktsü.
Langpangkong Tzükong Mungdang tenzükdang tsüraburtemi “lenmang aser telongjem” omen dak rangloker aru. “Lenmang” ta asübaji par tongmelang putu nung “motor lenmang” dak ranglok, saka tanü putu tasenba nung “lenmang aser telongjem” ta asübaji lenmang ajak nung – kaketshisatsü bushiba, rongsenketzüng, amalitepba, nungittepba, telongjem aser tekümtet lenmang, item ajak dak rangloker arur, anungji, asenokia iba nungji tongti shilem agitsü aser maparen ajak nung azüngashia inyaktsü pai ajungshia liasü.
Mokokchung nung terenlok tsütsü teinyaktsü wadang aika anendaka lir, itemji inyaka aotsü, anungji, nüburtemi shisatsü aser sarasadem nung nungittsü paisa mepishia metetdaktsü.
Langpangkong tzükong nung balaka (unique) ta asüba kaji Phom aser Chang yimtem densema lir, anungji, parnokji mezüngtoki maparen ajak nung amshitsü asoshi paisa ajungshia liasü.
2024-2027 kümsük asoshi LSTM ketdangpur itemi shimteta liasü – Tir – N. Imna Pongen (Asangma), Tatong Tir – Imkongtemsu Jamir (Chuchuyimlang), Tongti Zülur – Dr. Imliwati (Akhoya), Repsem Zülur – Moatemsu (Chakpa), Senotsü Zülur – Imaküm (Unger), Repsem Senotsü Zülur – Imlisunep (Kangtsüng) aser Senyur – A. Kika Jamir (Mongsenyimti).
*****
The Nokinketer 