Mokokchung nung bakery tejen ‘MASCOT Store’ nungto Coffee machine ka amenoka ‘MASCOT Store & Café’ ta tenüng jar 18th May, 2024 nü lapokogo. Nagaland Legislative Assembly, Speaker kinungtsü Sentirenla Jamir-i iba dokan meraketa lapoktsü aser Mokokchung Town Baptist Arogo, Associate Pastor, Rev. Temsüwati Kichu-i ibaji meshitettsü.
Bakery-ji akhi amato alitsü saka tang tasen ka amenokbaji café ji lir. Jangratemtsü kaji iba café nung Nagaland nung adokba coffee dang angutsü. Coffee menu nungji – Espresso, Espresso Macchiato, Americano, Dopio, Piccolo, Cortado, Latte, Latte Macchiato, Cappuccino, Mocha, Affogato aser Irish Coffee-tem angutsü. Item coffee jenjangji senpak 60/- nungi tenzüka 300/- tashi indang angutsü.
Iba Café amenokba ya nüburtem rongnung coffee ajemtsü yimya sübadaktsütsü aser Nagaland nung Coffee lu ayimertem ajungkettsü nükjidong nung lapoker, ta Mascot Store & Café kibur tasenba tsürabur M. Süpong Longkumer jabaso Aliamoa S. Longkumeri osangbenertem den jembidang ashi.
‘Mascot Store’ ya 1996 küm lapok. Küm 28 tashi arudang Mokokchung nüburtemi kanga meima yaria aruba asoshi ozü kibongi pelar aser ano tang nungi balaka service tajungtiba agütsütsü merangtsü, anungji, nüburtemi maneni nungita yaridaktsünür, ta paisa mepishia ashi.
Nagaland nung adokba coffee ya kanga tajung aser organic lir aser Nagaland coffee-ji alima ajunga nung nüngtugu süa odar. Iba coffee machine ya department of land & resources-i agütsü aser iba machine amshitsü asoshi dept-isa hopta ana (2) training agütsü aser maparen tenzüka aotsü (Startup) atema senotsü teyari mechimenu ka agütsüogo, ta dept of land resources, Mokokchung DPO, Sentinungla-i metetdaktsü.
Taoba mapang ibai junger ta bilemer ‘Mascot Store’ ya lapokogo, ano tensa den apet sütepa aotsü nükla yur tenzüker. Tanü nungi iba Mascot Store & Café ya par jabaso Aliamoa S. Longkumer aser jala Sanentila S. Longkumer tena nem bendanga amoktsür, ta tsürabur M. Supong Longkumer-i metetdaktsü. Paisa café amenokba maparen nung yariteper aser Mascot lapoker küm 28 tashi arudang par kibong dang meimer ajak dang pelaba lemsatep.
Sentong nung Mokokchung Chamber of Commerce & Industry tir Tsükti Longkumer, MCCI Senior Advisor M.B Longkumer, land resources dept nungi A.I, L. Temsu, MTBA Assoc. Pastor (w), Shilula parnokia shilem balala agia liasü.
Mascot Store & Café ya medemertem coffee jema mapang intoka otsü longtepa kazütsü tesem tajung ka asütsü, mapa balala inyakdang khenkhenbo tokolok kanga belemer, idangji satoktsü (refresh asütsü) atema yangji oa coffee cup ka meshia ajem nung ajungtsü, aji oda, ajung majung metettsü atema khen danga or semdangangma. Iba café ya Mokokchung Imkongmeren Sports Complex anasa lir.
*****
The Nokinketer 