Mokokchung Municipal kübok Ward No. 7, Kümlong Ward, Mokokchung nungi Wapangnaro Pongen-i 23rd May, 2024 nü la ULB Election-i aitsü asoshi tenüng sangdongba sentong ka lar kidang ayongzüka agiogo. Kumlong ward ya tetsürtem reservation küboki aiter.
Lai iba sentong nung jembidang, ya civic body election ka asünung, sorkar o Kümlong nübur tsüngta otongtar ka aser tesentaktep tajung apular ka asütsü aser nübur tenzüktsü tejangraba aser temulungtetba nung election nung noktaker, ta metetdaktsü.
Loktii nübu aginüdang lar kibongi akokba tashi pei sempet tenlaa tenzüka aruogo, ano alu wadang tasen ka nung lar kibongi Kümlong ward sanger tenzüktsü tejangraba tulu lir, ta lai ashi.
Tetsür nem menden mekazüka yutsüba “33% Women Reservation” atema ya Naga Mothers’ Association–i anir lokti balalai kanga meranga noktakba ajanga tanü asangsang nung iba temoatsüji mapa akümer, iba asoshi pelar. Aji oda, “nüburtemi ni shimtetra tetsür nem reservation agütsübaji shitak agütsüogo ta shitettsüsa ni inyaka sayutsü mulungtetogo aser aji kü nükjidong lir”, ta lai ashi.
Kümlong nüburtemi yaria adoktsüra, tetsür tebur ta kecha tebendang melii arok ajungtsü atema 18 ward councilor-tem den külemi amteper pei ward aser Mokokchung Town rangben asoshi inyaktsü mulunga lir, ta laisa teinyaktsü kar lemsatepdang metetdaktsü.
‘Municipal Act 2023’ ya asenok asoshi act tasen ka asünung, ibai inyaka aodang Aor sobaliba nung tetsükdaktsü majurutsüsa timi inyaka aotsü tejangraba lir. Koba mapa inyakdir inyakaka kija bilemba nung masü ward yimden aser nüburtem den shisa agiteper ang kechisarena inyaka aotsü aser mapa ajak ochi shia inyaktsü, ta lai ashi. Inyakyim tasen ka inyaker asünung, nükmen maitsüsa tarutsü asoshi tsüngsü tajung yutsütsü merangtsü, ta laisa shisem.
Asen ward tejakleni aser terenlokleni anitsü, takar sensaker kecha mebendangi ajak den sakuku ser lirumedema inyaktsü, ta lai shiogo. Item ajakji nübur teyari medeni meinyaktsü, anungji, Kümlong sangeri la nem yimli agütsütsü asoshi laisa mepishia metetdaktsü.
Laisa ruling party dang temepishiba ka ashidang, “maongka ngura ni mapa tajung inyaktsüako, anungji, ni temsüa lira ruling ticket-ji kü nem agütsütsü mepishir” ta metetdaktsü.
“Asenoki shitakba lenmangji shimra, tarutsü anogotemji tesangwa lir. Asenoki aiben temelenshi indangbo jembir saka mapa agi meinyaker. Tanü ni election-i aiba ya temelenshi mapa agi inyaka sayutsü asoshi noktaker”, ta lai ashi. “Nenoki ni temsüa lir ta bilemra aser nenoki kü dak temulung lemra yimlibilema ni yariangma”, ta laisa mepishia metetdaktsü.
Wt. Wapangnaro Pongen (arishi 52), kinungbu tenüng S. Panger Ao (Molungyimsen). La ya Jubilee Memorial School nung tesayur aser school ketdangsüba mapa küm 20 shi inyakogo. La ya kaket shisashiba nunga secular aser theology azüngba takutet nübu ka lir.
Sentong nung Kumlong Baptist Arogo Pastor, Kumlong Ward Chairman, Ungma nungi yimsüsür, Yimjenkimong Senso Telongjem Mokokchung aser Mokokchung Molungyimsen Senso Telongjem nungi ketdangpurtemi shilem balala agia liasü. Kumlong ward nung election-i inürji ano tangara ana (2) lir, ta osang ajanga angazüker.
*****
The Nokinketer 