Artang Ward nung ULB election-i inürtem den Watsü Mungdang-i ayonga mensem ka Artang Community Hall nung amendang candidate-tem (mena alirtem) den Watsü Mungdang ketdangsürtem aser Artang Ward yimden tenzükertem külemi tangokba noksa nung angur. 28th May, 2024

Watsü Mungdang-i ayonga Mokokchung Municipal kübok tetsürtem nem menden noklang shilem nung 33% shiteta yutsüba ward-tem nung election-i inür candidate-tem den mensem balala mena arudar. Kasa sentongji 28th May, 2024 nü Artang Ward nunga menogo.

Artang community hall nung iba mensem akadang Artang nungi candidate asem (3) – R. Asangla (Süngratsü), Bendangkokla (Ungma) aser Mapujungla (Longkhum) parnoki election-i aiba nükjidong den adokra maparen balala inyaktsü kar lemsatepa liasü. Mokokchung Municipal kübok Artang ya Ward No. 4 lir aser ibai women reservation küboki aiter.  

Sentong nung taoba Watsü Mungdang lenir, Wt. Süpongla Lemtur-i Nagaland nung aser Mokokchung nung 33% Women Reservation atema maparen koda inyaka aru, iba indang otsü kar lanu asensortemi mamatoktsü atema tongtibang tatalokbatem lemsatepa liasü. Laisa timtem tekangshi ajurubatema kar shisem.

ULB dak sentakba nung election magiteti küm 20 jungnüa arur tanü iba election 33% Women Reservation dena asangsang agitettsüsa maongka bener aruba asoshi pelaba metetdaktsü. Tetsürtem nem menden balaka shiteta yutsüba (reservation agütsüba)-ji amajok mekümdaktsüi tajungtiba nung ochi shia, tasü itta aser timi inyaktsü merangang, ta lai tayongzükba ka agütsü.

2011 küm ABAM-i koba “Clean Election” yimyim ayimokja lir, iba yimyim ayimoktsür külen election kar agiogo, saka tanü tashi iba yimyim mapa mekümteti arudar. Anungji, “nisung ka vote ka” inyakyim nung talisa tetsür nem menden mekazüktsüba ward-tem nungbo ochi shia shilem agidaktsünür, ta laisa inyakdaktsünüba olen ka metetdaktsü.

Taküm ULB election ya Aotsür aser Naga tsürtem atema otsüsütsü ka asütsü. Nenok mapa ajanga Ao tsür wangshidaktsütsü, anungji, temelenshiji nenok dak nungi tenzüktsüsa ochi shia inyaktsü taoba Watsü Mungdang lenir, Dr. Anungla Aier-ia mapang tatsüka agia tajungshi o lemsatepdang ashi.

Iba mensem nung Watsü Mungdang tir, Arenla Longkumer menden liasü. Artang Ward Chairman, T. Ati Mongro-i tayongzükba o tulu bener arua lemsatep.  Taküm Mokokchung Municipal kübok tetsür nem mekazüktsüba mendenji ward trok (6) nung lir. Itemji; Ward No. 1 – Alempang, Ward No. 4 – Artang, Ward No. 7 – Kumlong, Ward No. 10 – Sungkomen, Ward No. 13 – Penli, Ward No. 16 – Marepkong.

*****