Mokokchung Municipal kübok ward No. 13, Penli Ward, Mokokchung nungi aruya aliba ULB election 33% Women Reservation nung tokteptsü alila Moala Pongen er kidang 31st May, 2024 nü sarasadem sentong ka agiogo.
Moalai iba sentong nung jembidang, nübur tenzüktsü tejangraba tulu nung la election nung noktaker, ta metetdaktsü.
La ya sarkar tenzükba mapa nung küm talangka tenzüker pension aluogo. La ya Arogo nunga Sunday School tesayur aser Watsü Mungdang nunga shilem agia aruba nübu ka lir. La Longjang tsür aser kinungbuji Changki nunger Imliyanger.
“Tanü asen Mokokchung town aser ward nung teinyaktsü wadang jenti lir, anungji, kü nükjidongji asen ward nung kechi maparensa adokdir, ajak nung yimden aser kiyong nung aliba nüburtem den shisa lemsa-a inyaka aotsü, aser talisa ano lanurtem asoshi maparen balala inyaktsü temulungtetba lir”, ta lai ashi.
“Nenoki ni shim nung dang kü nükjidongtemji tonga inyaktsü, anungji, nenok tamang sarasadem den shisatsü agi akokba tashi yaritepdaktsünür, aser ajak dak alia nenok senti vote ji kü nem agütsüdaktsünür”, ta laisa tesentepertem dang mepishia metetdaktsü.
Iba sentong nung Penli Ward yimden, Penli Watsü Telen, Ward nung yimtsüyimbu kar den candidate-lar kinunger anati shilem agia liasü. Yimkhiung Baptist Chruch, Mokokchung Associate Pastor (W), Asola-i candidate atema mejeta sarasadem ka agitsü.
The Nokinketer 