Mokokchung Municipal kübok ULB election-i aitsüpur candidate tetsür ana (2) nem June 7, 2024 nü Ward No. 4, Artang nungi Yongkongsangla R aser Ward No. 9, Majakong nungi Bendanginla O na nem Indian National Congress (INC) ticket agütsüogo.
INC ticket agütsüba aser meshitetba sentong Artang nung 25 Mongoya ACCC Bhawan kidang aser Majakong nung INC Candidate Bendanginlar kidang agia liasü. Artang ward yabo tetsür reservation küboki aiter saka Majakong ward nungbo reservation mali.
Sentong nung District Congress Committee (DCC), Mokokchung President, Watimongba Aier-i jembidang, Yongkongsangla R aser Bendanginla nati Congress nükjidong angateter Congress ticket meshiba asoshi pelaba den takok tajung angutsü moaja metetdaktsü.
“Tang India nung BJP-i aniba NDA sarkar akümtsüba lir, saka parnok tejak mesangwateti lir, anungji, NDA sarkarji kopika aotsü ashitsü makok, Tsüngremi dang metet. Saka iba sarkar ji talangkabo moutettsü amai bilemer. Ashiko India Block coalition-i ang sarkar akümtsübaji menua maliako.”, ta paisa ashi.
Nagaland nung ULB ajak agi 39 lir, item rongnung town council jenjang nung 36 aser municipal 3 lir. Town council o municipal tetsüngtaji tulu itta lir. Town council bo Kohima nung dang tembangtsü saka Municipal jibo jenjang tulu, anungji, Delhi leni oa mapatong tululu inyaktettsü lenmang aika lir. Tia junga taküm Lok Sabha election nung S. Supongmeren Jamir MP adoka lir, anungji, pa ajanga temoatsü jenti ngutettsü imlar, ta ashi.
Ashiko India Block-i sarkar kümra, S. Supongmeren Jamirji minister menden atatsü aser aji India Congress lenirtemi nangzükogo aser sorkar akümtsübaji teimla mesamai lir. Election mapang sen meshiba yimya to Congress party-ibo noktangtsü, sen agi vote malitsü, clean election nung ajemdaker aotsü, ochi nung terenlok mapatem inyaktsü aser kin lemsatsüsa kecha meinyaktsü. Anungji, tanba ULB election nung ya nüburtemi Congress candidate shimdaktsünür, ta DCC tirisa tayongzükba ka agütsü.
Sentong nung taoba MLA & PCC züngsem, Toshipokba Lkri mapang tatsüka agidang, Artang o Majakong ward ya 25 Mongoya A/C küboki aiter aser Lok Sabha MP S. Supongmeren Jamir ya iba constituency nungi lir. Anungji, ULB election nung iba A/C nungi Congress ticket amer adokertem atema tajangzük aika alitsü, anungji, nüburtemi Congress candidate yaridaktsünür, ta pai mepishia metetdaktsü. Paisa Congress party tangatetba kar lemsatepdang, loktiliba ochi (social justice), lirumedem (equality), nisung ajak sakuku tashi lemsaba, lenla abensa-a inyakba aser terelok item nungji ajemdaker maparen ajak inyaka aotsü asoshi paisa ayongzük.
Yongkongsangla R aser Bendanginla O nati Congress ticket agütsüba asoshi pelaba den tenapronglai ULB election nung noktakba nükjidong aser tejangrabatem lemsatep. Sentong nung Congress Party telen tabensa nungi meyongertem, Artang yimden, Majakong yimden, Süngratsü Senso Senden, Chungtia Senso Telongjem Mokokchung, Sumi Community Majakong nungi meyongertemi shilem agia liasü.
7th June anepdang 25 Mongoya ACCC president, Alemkaba-i Majakong Ward nung Congress candidate Bendanginlar kima Congress wako (flag) atsüketa yutsü.
The Nokinketer 