District Congress Committee (DCC), Mokokchung-i ayongzüka Indian National Congress candidate, S. Supongmeren Jamiri tawa tembangba 18 Lok Sabha MP election 2024 nung takok tulu ngutetba asoshi tenüngsang agütsüba den takok benjong sentong ka Yimchalu resort nung kaogo.
Iba sentong nung PCC member & ex-MLA – Toshipokba, DCC president – Watimongba Aier, DCC vice president – Lanusanen, DCC secretary – Nükshi I. Ozüküm, DCC Advisor, DMCC, DCC minority department, DYC aser ACCC nungi meyonga ketdangsürtemi shilem agia liasü.
Sentong nung DCC, Mokokchung president, Watimongba Aier-i jembidang, Mokokchung ya Congress nükmen ta jembia aruba ama, tanü atangji nung küm 20 sülen Lok Sabha MP election nung iba district nungi S. Süpongmeren Jamir-i takok ngutetogo, ta pelaba metetdaktsü.
S. Süpongmeren Jamiri party ajungkettsü asoshi kanga meranga inyaka aru, tanü pa adokba ya pai aahzükba lir, iba tsüngnep mesamai teti bener aotsü asoshi asenok khuret südi ta sentepa alirtem ayongzük. 2028 nungji Nagaland nung Congress sarkar akümtsü nükjidong yur tang nungi meranga inyaktsü asoshi paisa party pur ajungshia liasü.
Aji oda, tang aruya aliba ULB election nung shirnokisa Congress ticket agiogo, nenok ajaki takok angutsü imla-a atar aser maparen ajak nung party tenzükertemi yariteptsü mulunga lir, ta paisa shisem.
PCC züngsem & ULB Election Committee Convenor, Toshipokbai jembidang, ULB election nung Congress ticket agizüker ajak tenüngsang agütsü aser tanü India lima political mopungsem melenshiba mapang ka lir, anungji, takok nguang tengu 2028 dak rangloker party akangakanga yangertsü asoshi ayongzüka jembi.
ULB election: Candidate 8 nem INC ticket agütsü
Iba sentong nung tang aruya aliba ULB election candidate 8 nem INC ticket agütsüogo aser parnok tenüngtemji; Mokokchung municipal kübok Mr. T. Nungshitemjen Jamir (Ward No. 15, Yimyu), Mrs. Rongsenlemla Jamir (Ward No. 16, Marepkong), Mangkolemba town council kübok Mr. Zamok (Nokyu ward), Changtongya town council kübok Mr. Marwati (Longchara ward), Tuli town council kübok – Mr. Temsumenba Imsong (Mendenti ward), Mr. Imlionen (Tuliyong ward), Mr. K. Imlitemjen (Longpong) aser Mr. Imobendang Lemtor (Lukongmendang ward) ta alitsü.
The Nokinketer 