Longsa Village Council-i Lok Sabha MP, S. Supongmeren Jamir nem “Chuba Aksü” sentong Longsa yimdak ayongzüka kanga meraketa aser temsüa tushiogo.
Wb. S. Supongmeren Jamiri iba sentong nung jembidang, pa nem Longsa yimdeni maongka aser yimli tulu agüja ak sütsüba asoshi pelaba mezüngbuba metetdaktsü.
Tanü pa Nagaland nungi Lok Sabha MP ka akümba ya yimertem, Ao kin, Naga nunger aser tamanger ajaki sarasademtsüba ajanga Tsüngremer sayatenya atalokba lir, anungji, amangbapur aser nübur ajak dang pelaba pai lemsatepa liasü.
“Tsüngrem akümtsübua kü maparen aser mangdang ataloktsü asoshi merangtsü, anungji, nüburtemi kü nem shisatsü agüjang aser maneni ni atema sarasademjang aser lenla ajak nung ni nungita yaridaktsünür”, ta pai temepishiba olen ka metetdaktsü.
Yimden temaotsü agiba aser yimdeni temoatsü agütsüba nung maongka jenti sentaka lir. Aji oda, Longsa yimdeni pa nem yimli tulu agütsüba asoshi pelaba lemsatep.
Paisa taoba Longsa nungi lenir – asür Takomeren, asür Imtimeren, asür N.I Jamir, R. Lepden, Merentoshi R Jamir, Metsübo Jamir parnok ajak nem tenüngsang aser akümtsübu agütsü, parnoki len pipoka jenjang yanglua yutsüba yong tanü pai iba temoatsü agir, ta ashi. Iba den Longsa lima tamangtir/Tsüngrem tenzüker ajak nem tenüngsang agütsü aser ano maneni Longsa lima, Aor aser Naga nunger arok asoshi tamang nüktzü akangba ka paisa tayongzükba agütsü.
Longsa village council chairman – Talichuba Tatar, council secretary – Opanglemba GB, NPCC working president – Khriedi Theünuo, Dept of Law & Justice Addl. Secretary – Imtiakum Jamir, ATI Jt. Director & Longsa Gazetted Officers’ Union President – Dr. Rongsennungba, Akangjungshi Tatar aser Rongsenmongba Tatar parnokia shilem balala agia liasü. Aksü anküp sentong magidang tanep Akangjungshi Tatar aser Nungsangtemshi Tatar ki maka akhi tsürabur yimya nung sobaliba ken tenyutep.
The Nokinketer 