Ungma Kosasanger yimsüsür Wb. Rarenbenba Longkumer Tatar-i Guru nüngja anguba sentong ka Langpanglenden, Ungma nung meraketa agiogo. Pai iba ‘Guru’ nüngja ya Ministry of Culture, Government of India, Guru-Shishya Parampara Scheme kübok angu.
Guru Rarenbenba-i iba sentong nung jembidang, pa lanuwa küm 6 asüdang nungi sobaliba kentenmenü tsütsü kanga jangrabangra angazüka aruba kar ashi.
Pa lanuwa tsürabur, teti nunger aser tantsü-tambu aser yimsüsürtem nungi sobaliba kentenmenü aser yartsüngsangtem angazükba den liyonga arudang asen lima aser India tesem balala sema sobaliba kentenmenü sentongtem nung shilem agia aruogo. Aji oda, tanü pai “Guru” nüngja ajangzüktettsüsa jenjang tongtetba asoshi pa den yariteper ajak dang pelaba metetdaktsü.
Tanü nungi ano tajungba aser temerangba nung lanurtem aser tangazüknürtem nem tsürabur sobaliba kentenmenü aser iba dak sentakba shisatsü balala sayutsü tejangraba aser tangatetba aliba paisa shisem.
Arishi küm 46 tain yimsüsür Guru Rarenbenba ya Ungma nunger asür Imtiakum jabaso lir. Kinungtsü Longkong tsür Wt. Imoyangla Jamir, tena nem jabaso 2 aser jala ka moaja lir. Guru nüngja angur rongnung Guru Rarenbenba ya tanubuti asütsü, ta osang ajanga angazüker.
Sentong nung Mokokchung District Culture Officer, Wb. Ayim Ao-i mapang tatsüka agidang, meranga inyaker iba jenjang tongtetba asoshi pelaba den meranga inyakertem atemabo ano maongka jenti lir, ta ashi.
Kechi mapa nung südir süaka, tagitarutsü rizüngba (documentation) ta kanga tongtibang lir, anungji, maparen ajak nung talisa tarutsü nunga sobaliba kentenmenü luyim tsütsü tejangrar ali nungbo documentation nung temulung agütsütsü asoshi paisa ajungshi.
Tang tashi nung Ungma yim nungi Guru nüngja angurtemji – asür Guru Sademmeren, Guru Sangyusang Pongen, Guru Senlitula, Guru Rarenbenba aser ano yakta par yim nungisa nisung kati Guru nüngja angutsü osang tejangja kar.
Iba sentong nung Longtrok Senden Ungma, repsem zülur, Kr. Limasenla T. Longkumer menden liasü. Sentong nung Wb. Temsüzenba Tatar, Guru Sangyusang Pongen, Wb. Lipokzülu Tatar parnokia o tatsütsü agia jembi. Ungma Baptist Arogo, Pastor, T. Wati den temoatsü meshia sarasademer tenzük aser Assoc. Pastor (W), Rev. Talijunglai tenüngsang agüja sarasademer sentong tembang.
*****
The Nokinketer 