Mokokchung town nung otsü asütsüsa kodanga matalokdangba kitsük kirung lendong tulu ka küm tetenzüklen 3rd February, 2024 aonung ajurua liasü. Ibaji Mokokchung Municipal Council shopping Complex nung atalok aser iba aonung dokan 59 metsüngrepa rungtok aser dokan 30 dak tali teraksa ajurua liasü.
Item dokan rungtoker nem teyari agütsütsü asoshi Mokokchung Chamber of Commerce and Industry (MCCI)-i ‘fundraise’ sentong ka ayongba den temulungertem nungi senotsü bendentsüba ajak senteper sen 6, 76,700/- (six lakh seventy six thousand seven hundred) saruteta takoksa ajurur nem 18th July, 2024 nü MMC conference nung sentong ka agia amoktsüogo.
Iba sentong nung MCCI tir, Tsükti Longkumer-i jembidang, iba sen ya ‘nenok takoksa ajuruba alang temenok agütsürba masü, saka nenok timtem nung MCCI-a dena lir ta temeim sayurba dang, anungji, pelashishia agizüktsü mepishir’, ta metetdaktsü. Iba teyari ya yakta agütsütsüba asü saka koda masüba kar denjia menur agütsüba asoshi sasaba olen ka ashi.
Lendong mapang nisung taküma samar, saka asenokbo mi lendong tulu atalokaka tasü-tama kecha majuruba asoshi Tsüngrem dang pelar. Iba kirung lendong dak sentakba nung mezüng anogo nungi MCCI-ia maparen balala nung yaritepa arudar aser ano maneni yariteptsü mulunga lir, ta ashi. Takoksa ajururtemi teimla mesamai ano pei wadang maneni meranga inyaktsü MCCI tirisa ajungshia liasü.
MCCI-i teyari agütsüba ₹ 6, 76,700/- nungi dokan rangben rungtoker nem ₹ 4,50,000/- aser terara raksar nem tanüngba ₹ 2,26,700/- ji lemsar agütsü. MCCI-isa lending mapang aria bilem sayua tenla agütsür ajak dang pelaba lemsatep.
*****
The Nokinketer 