~ C. Walu Walling

Ao oshi tenzükba aser renlokba indang angajemtsü asoshi tongmelang agi shilem asem küma lemsatsü merangdi.

Itemji zülu maliba mapang nungi mezüng Ao oshi nung zülu tenzükba aser iba atema Missionary-temi par mungdang nung telemtetba agiba.

Tanabuba nung iba telemtetba sülen Ao o zülua school aser arogo asoshi kaket yangluba, aser tasembuba nung Ao oshi terenlok asoshi mungdang aser lokti balalai shilem agiba.

Ao kina zülu malidang nungi oshi liasü. Tsüraburtemi parnok rongnung kasa oshi jembia sobaliba-a aru, ken tenyutepa jempitep, otsü-olang abensa-a aser rajema dang liasü. Anungji Ao kinji kenshioshi nung takar aser terajem liasü. Ibaji tanü asen kenshioshi bushibaren tzüpokdakji iba nungi tzüti ayong yimjen ayimtsü koka lir, oda aseni tzü atatsü aser ajemtsü jangara-a dang lirabang.

Mezüngbuba Shilem: Zülu maliba nungi Zülu dangi

Aor kenozülu kodang tenzük? ta süra, ibai 1878 Rev. Gudhula Brown-i mezüngbuba Osangtajung Ken kaket züluba nungi Aor kenozülu tenzük ta shitettsü. Saka tangar kin aika oshibo jembir, saka zülubo maka ta aruba ama Ao kina oshibo jembir, saka ibaji zülu ka makai lia aruba mapang 1872 asen limai America nungi Missionary-tem aru. Tanü asenoki Ao o zülua amshiba ya latettsü asoshi Missionary-tem kolak külemi ajenteper mapang agia latet ta otsü nungi angateter. Kechiaser mezüng missionary-tem asen limai arudang, asen den kiyonger Assamese, Bengali, aser Hindi bo jembiba aser tezüluba liasü. Saka item nisungtem den asen nisungtemji tereprangtsü dang masü, saka sobaliba, kentenmenü, achiajemba, abensüoshi, aser loktiliba khenyongi balala ta parnoki ajitet nung, Missionary mungdang aika nung kobala zülu ka nung asen oshiji zülutsü ta aiben shisatsü agitepa liasü.

Aji oda, Ao oshi atema missionary-tem aser British nunger yimsüsürtemi asen Ao oshi zülutsü zülujang tasen ka agütsü. Iba sülen Ao oshi zülutsü aser azüngtsü tenzük. Iba zülujang tasenji Roman zülujang liasü. Aji oda, parnoki Khristan kenozülu kimungji mesemtet.

Missionary-temji Yisu Osangtajung sangoktsütsü atema dangbo asen limai maru. Saka parnok nükjidongbo rangpen tekümtet nung rangloker aru ta angateter. Parnok mangdangjibo kangasa tesatem aser iba telemtetbaji ozülu atema dang masü, saka shilu kasa nüburtem dangi Osangtajung abentsübajia ibai ajanga dang takoktsü lenmang lir ta parnoki ajitet südi ta aseni angateter. Clark-i iba tebilemtsü benokba ya asadangra, iba mapang nung pabo Ao Dictionary zülutsü tenzükatoker liasü. Clark dak shisatsü tesatemba liasü ta par mungdang lemtet nungjagi  angateter.

Aji oda, Ao kin atema oshi terenlok aser kenozüluji missionary-temi tenzüka toktsüba dak ajemdaker tanü aseni asen oshi terenlok aser kenozülu renloktsü mapa inyaker ta angatetdi. Saka Ao oshi nung küm metsü dak tali asen nüburtem atsütepa aruba indang bilemdangra nüktzüa maluteti aser kolen kolen anga memeyipteti liasü. Oda asüku agi nenet ama alia arudang asen kin meimer aser kaketkeno nung temulung agütsür aikadi tasü aittsü indang o ashiba agi item tajungshiba aser tashi nung maneni asen nübur tenzüka aruogo.

Asen den anasatepa alir kin ka mungdang nung küm metsü nung Aor ajatettsü ta telemtetba ka agiba mapang, parnok rongnung kadi noktaker, “Küm metsü nungji Aorbo mejanga alitsü asü masü?” ta asüngdangba otsü ka asenok ajaki jembir. Tanü asenoki ibaji asangsang nung ajuruogo. Aseni sayuteta toktsüba kin aikadi asen kin ajatetogo.

Oshi kaji odang jenjang ka nungdangbo malir, saka ibai meimchir lokti yimsoshiba den külemi peta renlokyonga aor. Iba indang Ronald W’ Langacher-i yamai shia angutsü, “A Language is a complicated system that changes slowly through the centuries. It is basically a psychological phenomenon. To understand the changes that occur in such a system, the linguist must first have some knowledge of the structure of the system”.

Iba jagi kechi kin südir süaka oshiji takar küma renloker. Missionary den külemi inyaker asen tsüraburtemi item jenjangi angateta kaketkeno zülua sayua aru. Missionary-tem arudang asen oshiji tezüluba mali nung parnoka kodaka timtema asen kin asoshi kaketttemji zülur alitsü ta bilemer. 1872 nungi ang parnoki asen limai atua mapa inyak tenzük, saka 1878 nungbo asen oshi nung osangtajung ken kaket ka adoka amshi. Yihova Tsüngrem dang Aori kechi ajar ta asüngdangdang, paji ajak dang tematiba nung alir asünung “Loongkeezinba” Tsüngrem ta ajar ta ashiji, Clark o Gudhula nati kibuba Yisu-i sayuba sarasadem züludang iba oji amshiba angutsü. Saka tesülen arur Missionary-temi Aori ajaba Tsüngrem tenüngtemji mojing ta aitsüba ajanga itemji melenshi.

Shilem Tanabuba: School aser Arogo asoshi kaket zülutsü tenzükba

Iba shilem nunga Ao oshi terenlok asoshi missionary-temi tongti shilem agiba angutsü. Aor kenozülu teraji bushira mezüngbuba nung Khristan tamang tsütsü nungi ang ibai tenzük. Aji oda, iba tangatetba nung tasayutsü asoshi kakettemji zülu. Iba den külemi school nung azüngtsü asoshi mezüng A, B, C, kaket aser mezüng ashiba kakettem zülu. Iba mapang Mathi, Mark, Luk ta parnoki azüngba jembitepa liasü. Yosef otsü tashi azüngba tashijibo tuluka aser aika azüng ama parnoki bilem. Ao lima nung arogo junga metenzükba tensa ka saka Mathi, Mark azüngertemji arogotem nung Pastor mapa den repa School-a lapoka idakji tesayur mapa-a inyaktsü parnok tejangraba aser temulungtetba tulu liasü. Item indang arogo otsü nungji tejangja angutsü.

Kin ka tejakleni aotsü atema Yisu Khrista dak tashi agi sota amangba den kaket shisatsü angazuktsübaji kanga tongtibang ta par mapang nung tangatetba shisatsü tesatem yur aji oda mezüng tamanger aser A, B, C, angazükertemi taküm tenla tulu agüja, pei temang nung tashitak agi amena bener, tarutsü pututem asoshi parnoki Pastor mapa den tesayur mapa nung kanga nendaka tenzük. Tanü putuia parnoki inyakba ama inyaktetra, asen lima koda tajungba süla ta bilemer.

Ano Tasen Lai 1929 küm meyipa nüburtem atema takok tuluka ngutetba mapang ka liasü. Iba maparen nung tsürabur aikadi yaritepba den tongti shilemji Rongsennüken Molungyimsen, pay agia ibaji inyak. Parnok item Laishibatemji tenük agia manguba dang masü, saka English Laishiba-a King James Version-a süngla anarongtena ang nguteta, iba nungjagi parnoki tesangwabo maka den pei nüburtem asoshi taküm tenla agüja inyak.

1878 nungi tenzüka Ao oshi nung kaket züluba nungji spelling aika Assamese, Hindi aser Bengali olasü nung Laishiba aser school nung azüngtsü züluba kakettem nungji angutsü. Iba tashi parnoki inyaktetba ya kecha dena medemdangtsü makokba tamaren mapa ta tanü tazünger ajaki angatettsü nüngdaker. School aser arogo züluba kakettem nung spelling liru medemtsüba dang nungi mapa tuluba kaji kodasür asen nübur atema kaket aika adoka züngdaktsüstsü ta asübaji parnok nükjidong tuluba liasü.

Shilem Asembuba: Ao Oshi terenlok asoshi mapa inyakba

Joko Aortem rongnung kanga khuret akakba aser pei kin meimba nübu tajung aika adoka tangar den toktepa zünger arogo aser yimden maparen balala nung lennir tajung jenti Tsüngremi moatsü nung, Ao oshi terenlok aser tejakleni odaktsütsü tangatetba nung Mungdang den Sorkar mapa nung inyaker Aor tanishirtemi Ao kin kenozülu timi ketdang süa mapa balala inyaktsü asoshi 1949 küm Ao Literature Committee tenzüktsü atema Ao Naga Baptist Arogo Mundang (ANBAM) Kangtsüng tuluba arogo nung November 5-8, 1949 küm lemtet.

Ao Literature Committee Tenzükba

Ao kin ajak atema kenozüluji Impur nungi adoka iba jagi school nung amshitsü kaket balala adoka nüburtem ajak tiptema kaket shisatsü den külemi Tsüngrem O nung tazüngertemji sayuteta liasü. 1919 matongdang Ao Literature tenzükera alitsü akok, saka item indang zülu tejangja mengutet nung tang asenoki yua aliba tezüluba nungi Ao Literature Committee-ji nüngdakba, parnok teinyaktsü lemtetbaji 1949 Ao Naga Baptist Arogo Mungdang (ANBAM) Kangtsüng tuluba, November 5-8, 1949 küm nungi Literature Committee ji Mungdang Temzüng nung inoktsü lemtet.

Joko Ao kin asoshi iba mapa inyaktsü khuret ajak iba Committee nem nungloktsüba den külemi parnok lenisüba kübok school nung azüngtsü kakettem den tamang yimsü atema kaket balala zülua nüburtem tenük sakdaktsü. Ibaji Ao kin asoshi itemji dang tazüngtsü kakettemji liasü. Committee membertem ji par ana dak alaka parnok ajak Sorkar mapa nung kanga tongtibang mapa inyakertem dang liasü. Naga nunger ano tenük junga melapokba nung ajak nem kasa education agütsütsübaji parnok nükla tongtibangba sür Sorkar mapa nung bendanga agüja inyakba den parnoki anepdang aonung Ao kin asoshi mapa jenti inyak.

Ao Temeshi Laishiba 1964: Ao kin Asoshi Tamaitsü Lung Azüngba Küm

Item rongnung 1964 Ao Temeshi Lai adokba ya Ao kin otsü nung Yisu maru tashi amatoktsü makokba mapaji alitsü. Kechiaser iba yagi Ao oshi tera tonga bushiba dang masü, saka English nungi Ao O meyipzükdang parnoki asen kin sobaliba nung tetezü taroktem jenti bushiteta zülu. Lai meyipdang tapet ojangtem aser oren payim bushiba ajanga Ao oshi tajungba zülutsü lenmangji lapoktsü. Iba mapa nung Committee pur ajaki pei tajungtiba agi Ao kin nungita yaritep. Ano parnok rongnung talisa Mangyangnokcha, Nokdenlemba aser I. Ben Wati par asemi shilem tuluba agi. Iba Ao oshi züluyim latetba nung Arrla tulutibaji alitsü südi.

Missionary mapang nungi tenzüka 1960 meta tashi ka School nung azüngtsü kakettemji Impur Mission Centre nungi adoka aru, aser itemji aseni sayutetba asen anasatepa aliba kintem atema mapang kabo itemjia amshia liasü. Item ajak Ao Committee den angatettepa aru ta 1924 Ao Mungdang Lemtet nungjagi angateter. Asen kin kenozülu telatet maka tashi Ao oshi züluyim ajak nung liru medema tanishirtemi kobabo melenshi nung ajak atema tajangzük asütsü, ta tangatetba nung asen kin tenzüka aruogo. Item asoshi aseni lennirtem tenüng asangtsü tetemsü.

Ao oshi Roman zülujang agi züluba aser kenozülu nung amendaker Chungli oshi amshia Ao oshi ka tenzükba ajanga Aor rongnung telungjem adokdaktsü. Ano iba den külemi Chungli oshi Mongsen oshi ana ama aliba Chungli oshi dak amendaker Ao oshi ka adok, aji tanü asenoki Ao oshi ta jembir. Anungji, Roman zülujang agi Ao oshi zülutsü tenzükba Chungli oshi aser Mongsen oshi ta masü, saka Ao oshi ta jatetbaji asen kimung tamendakdakji lir.

AKKOR Tenzükba

Lokti ka atema maparen balala nung ketdang asütsü tenüngdaktsü ta angateta 1968 ABAM Literature Committee lenisüba nung Ao Kaket Ken Oshir Rogo (AKKOR) ta tenüng jateter tenzük. Joko School-tem nung azüngtsü atema Text Book zülutsü aser Class balala tanur den apet komala kaket zülutsü, item khuretji iba telok nem nunglokja, parnoki mapa kanga meranga inyaka aruogo. Naga nunger rongnungbo asen kinji ajaki meteta alinung, yakta dang Class 10 final tashi nung Ao Oshi agitettsüsa iba Committee lenisüba nung jenjang tongteta aküm. Ao lima nung arua azünger tangar kini ang Class 10 final tatidang nung Ao oshi nung mark temaba jenjang anguba indang asenok ajaki meteta kar. Nisungtemi memetet iba Committee kanga meranga mapa inyaka aruba atema par tenüng mesangi melitet.

Text Book Section Directorate of School Education aser AKKOR

Kodang Nagaland state education department language section ajanga school nung azüngtsü atema Text Book yanglutsü tenzük, lennirtemi pei kin oshi nung terenlok aser temelenshi nüngdak ta bilema spelling temelenshi aika benok. Ashila, lenirtemi itemji nüburtem den angatetteper inyak asübo kanga jungla. Saka temaba bangdak tashika agi dang school nung amshiba kakettem nungji temelenshi bener aru nung nüburtemi ibaji magizükteti kümatok. Ibai 1980 nung Ao oshiji “tonal language” ta tangari sayuba dak ajemdaker melenshitsü tenzük. Nüburtemi ibaji magizüktettsüsa liasü. Anungji, AKKOR aser Ao Kaketshir Mungdang (AKM)-i ibaji mamshitsü ta jembi nung, department nungi lennir kar arua 1984 Mokokchung nung sensaksem tajung kar nüburtemi mulungba odi ta angatetteper 1985 küm department ajanga kaket ka adok, “Ao Spelling Temelenshi Tesayurtem Asoshi.” Iba kaketji jili O nung yamai zülua angutsü; “Primary nungi Class VI….1980 nungi Glottal Stop nung vowel sülen ‘h’ zülua aliba indoker…tesayuri ibai medemdanga sayutsü.”

Küm 100 sülen asen kin oshi nung tatalokba kar

Oshi ka yanglutsü mesüra zülutsü atema mezüngbuba nung item tongti maparen ya mamatsüla: Historical linguistics, Anthropological linguistics, Psycho linguistics aser Socio linguistics. Küm metsü dak tema asen kin oshi terenlok asoshi mapa inyakertemi komala tzüpokdak nungisa tzümesü/tzüla yanglua terenlok asoshi inyak, itemji asenok ajaki meteta kar. Kechi kin südir süaka, oshiji par meyong dang masü, saka ibai tatem tashi par senmangji lir. Yamaji masü asübo missionary-temi asen dang oshi kar sayur lila, aser idangjibo asen kin sobaliba tajitettsü kechi agi tangar den balaka, item ajakji samar lila ta khenbo bilemer.

Joko alima shisatsü ajaklen terenlok aser tasen ngutetba tensa ka nung oshioben nunga temelenshi adok. Talisa ibai asen den melisemer, aser asen kin oshi ojang ishika shimteta kar nungi angazüka alir kari asen oshi atema kinük lung ka ama kaket kar züluba nungi adok. Item kakettem nungji Ao oshi classified asübaji missionary-temi latetba Italian sound system nungi khenyongi dang sound system balaka dak ajemdaker zülu. Tatishitsü ya ajiang. Ao Naga Phonetic Reader p. 57-58, Table 2 nung yamai zülua aliba ya ajiang, “The exercise in providing the sound symbol correlation between the Ao language and Nagri script will not only provide the point made in connection with the adoption of Roman script for the language, but also help writing the Ao language in Nagri Script and help the teaching the language using Nagri Script to Ao speakers. The following table gives the closest equivelants in Devanagri for the phonemes of Ao-Naga.” Iba kisüng jagi asen nüburtem kanga kangshiogo.

Oshi kaji tezüluba oshi akümtsü asoshi ozülu lirumedem ka latettsübaji kanga tongtibang. Joko Ao o zülu pezüben punguben arur jenjang ka tonga aruogo. Ibaji Ao yimkongi amshir, zülur aser azünger. Ano Ao kin puti aser puin tsütsü nungi kaket balala zülutsü asoshi ajaki merangtsüla. Iba jagi dang kin ka oshiji tejangleni otettsü. Asen lipok kenshioshi nung itemji zülutettsüsa aseni mengujemba ojang aser oyim jenti kar.

Tebang o ya tezüluba kenshioshi kimung aser nükmenji lir. Otsü züludang akhi tarnunger otsü atongba yimya (narrative style) amshitsü akok. Keno züludang lipok ken tenyutepba mesüra tenyuba yimsü (poetry structure) amshitsü akok. Tatishitsü ka, Aor keno (Ao traditional Poetry) zülutsü atema English Poetry ama rhyme, stanza, metre, etc…. tabensa amshitsü menüngdaker. Saka Ao lipok ken ka den medemdanga ken mejemtsü nüngdak. Kechiaser oshi shia kensü yimya balala lir.

Ao Oshi  aser Ao Senden

Tanü Ao Kin madak tematiba lokti sendenji “Ao Senden” ya lir. Ao senden nung lennirtem shisa talang, asen kin lokti sobaliba, jembishinü aser libaliru ajak aroka asadanger, nüburtemi koma sünür ta kinük ajaklen nungi asadanger, nüburtemi aginüba aser jembia züluba ama asen kin kenozülu aotsü par Tsüngremi shisatsü agütsüba agi telemtetba tajung agir. Par tanishirtem danga pelar, aser shirnoki asen kin oshi atema mapa meranga inyaka aruogo, parnok nema tenüngsang agütsüdi.

Zülu ka makai Yisu Khrista Osangtajungji tebang kisüngi jembiba nungji jenjangmung mali ta angateta mezüng arogo tamburtem den Clark aser Godhula tenati ashiko Tsüngrem dang kechi ajar ta asüdang teka agi anünglen ajakji aser kilem talangji tuyua idakji alisang dang kechi ajar? ta asüngdangdang parnoki Oh paji ‘Longkitsüngba’, mesüra alima yangluba indang teka agi sayua iba dang shiba ajar ta asüdang, Lijaba ta, Assamese agi: ahuk dang Ao o agi koma? ta asüngdangdang ‘arung’, ano aika. Anungji, Tsüngrem dangi arung ta sayudang parnoki Longkitsüngba dang arung ta asen o agi meyiper zülua sayu. Tenyar Paul-i ashi, “Osangtajung asoshi ni maaker….tamanger ajak kümzüktsü Tsüngrem ain lir” (Rom 1:16), ama iba ain jagi Clark aser Godhula tena daka arung südi.

Iba sülenbo Ao Tazüngtsü kaket 1;2;3; ta züluba den Osangtajung Mathi, Mark, Luk, Paul shititem ta meyipa school nung sayumeso. Mezüng school nung azüngertem atema na class kwi azüng ta masü, saka kechi azüng ta asüngdangtep dang ni Mathi azüng, Mark azüng, Luk azüng ta jembitepa liasü. Yohan azüngerbo ano tangar dang nungi temaba ama par mapangbo liasü, tesüiba otsütem nungjagi menungraseta bilemer. Tanübo Ao kin nungi süngsang balala nung Master degree dang masü, saka Doctorate degree angur paikadi adoka aliba ya item süngjangji ta asenoki shiteter.

1964 nung Ao Temeshi Lai adokbaji Ao oshi atema kaket tulutibaji liasü. Missionary-temi kaketshiba agütsüba ajanga asen kin tenük lapokdaktsü, aji oda, azüngba jenjang nung asen kin mezüngpur küma aru. Azüngtsü aser zülutsü shia meteterbo asen Aor tashirtemi tarnunger tebang o otsütem züludena kaket küma adoktsü tenzük. Ibakji Ao oshi terenlok koda aru aseni angateter. Tatishitsü kar idaki: Etiben O Jena, I. Sashimeren; Aor Tatakrutsü, Imtilepten; Pendochepchep Ritsüng, W. Chubanungba Ao; Ao Kin Temzüng Ozüng aser Ken, L. Imti Aier; Aor Tarnunger Otsü Kaket, N.Talitemjen Jamir; Junior Ao English Dictionary, Dr. Renthy Keitzar; ano aika. Item dak ajemdaker tanübo asen nüburtemi süngsang balala nung amshitettsüsa kaket tajung aika züludena kar. Item ajakji asen kin senmang ta züngshidi. Par den atongtepa tanübo kaket zülur tajung aika adoka, tatishitsü agi: Prof. A. Lanunüngsang, Dr. Wati Longchar, ama den Anogoshia atema Ao Milen, Tir Yimyim Osang ajanga asen oshi renlokdaktsüba ya koda jangratemtsü.

Ano Dr.Clark, Ao Dictionary, 1911 nung adokba yabo oshirajemertemi Encyclopaedea ka amai lir ta ashir. Atangji tazüngertemi iba kaket azüngdang Clark dak komala shisatsü tarok aser tesatem agi iba kaket ya zülutet ta angatettsü. Iba kaket nung Clark-i Ao oshi Chungli aser Mongsen oshi-a bushiteta ratettsüba den ano bendanger oshi tsütsü den koma medemdang itemjia shisema angutsü. Iba tia jagi marudang Dr.Clark-i kechi koda Ao oshi ya komasa jembir ta Ao yimtem sema senzüa, Chungli-Mongsen oshiji koma balala aser temesüktep ali, item ajakji asateta liasü.

Taoba mapang Ao kini spelling tsütsü Ken Kaket aser Temeshi Lai aliba ama ta jembia aruogo. Saka idakia spelling meputep ta aikadi tuteta agütsüogo. Mezüng Lai meyipertem nükjidong tematibaji kodasür asen nübur nem Temeshi Laiji züngdaktsütsü ta asüba khuretji liasü. Saka tanübo Ken Kaket aser Laishiba ta masü, saka nübur ajaki agizüktetba spelling ta jembia item kakettem nungjia temelenshi agiyonga arudaki, aser lirumedema melenshiyonga aotsüji asen ajak teimla aser nükjidong asütsüla.

1872 nungi tang tashi nung Laishiba aser Ken kaketji ajak bangpet o ka ama tai meyipa lir, spelling tai ta yamalaji jembiba dang masü, saka Osang kakettem nung zülutep aser bangtsük o aikadi agütsüogo. Iba den ano Ao Osep tilaka adokba atemaka kasajisa züngshia aruogo. Shinga tabensa mali ta angateta iba atema tejashiba masü, saka tepela ang pelar. Kechiaser iba jagi asen kin oshi nung renloktsü atema dang tuyur. Saka pi bendanger oshi nungi asen kin oshi agi meyipzüka zülutsüba ya mapa temelabo masü, oda taoba mapang lennirtem nem ya Tsüngremi onsara shisatsü tarok aser tangatetba agüja item maparen ya inyakogo ta parnok tenüng sanga par sülen aruogo.

Aikadi Ao oshiji sensaker ta jembir, saka aseni mamshiba agi asen sasa sansaker kümdaktsür. Ashiko ibai English nung ojang kaji asen oshi agi ojang ka nung memeyipteter ta asüba tangatetba nung jembir südi. Tanü ama dang ora ashiko küm tenem shi nung Ao oshi ya mejembiba oshi rongnung züngsemtsü. Aor lipok keno, otsüolang, libaliru yimsü aser tamangba nungi tanü aseni angazüktsü jenti kar. Itemji angazüka amshira kodasür Ao oshi sensaker asütsü? Oda aseni mangazük aser mashiba agi ati.

Missionnary mapang nungi tenzüka tanü tashi nung Ao o nung Aori züluba kakettem ajak bendena kaketnang ka nung Ao Senden Literature Board-i rizünga ayutsü tenüngdaktsü ta ajiteter, aser item kakettemji koma tajungba küma yanglushir asen kin nem züngdaktsütsü ta iba wadangji ASLB mapa küma inyaktsüla. Item maparen terajemba nung inyaktettsü nükla südi. Aji süra Ao oshi terenlok aoshi asenok ajak nüktang tajung kaka akümtsü.

Otem

Temalen shisemba ama asenoki item otsütem ya tatongi aser tarensena zülua yudi ta süra tezülubatem den medemdanga tabensaba nung zülutsü lenmang sadema lapoka kar.

Ao kin amua aoba nungi saaktsü mapang tongogo. Niba, naba ta masü asenok ta jembia teka amteper asen kin oshi terenlok asoshi tsüngkang medemshir mapa inyaktsüla. Tebang agi dang jembia aruba otsü tajung aika samaa odar. Itemji tanü putui zülu nung ayutsüsa kaket züluri mapa meranga inyaktsü nüngdaker. Ao kin otsü kaket ka nungdangbo mezülumatsüsa alibatemji: Tebhong 1, Tebhong 2, Tebhong 3… ta lemsar zülutsüla.

(C. Walu Walling ya taoba ABAM Literature & Education Secretary. Pa ya kaketzülur tajung ka lir)