Meimchir libaliru ajungkettsübaji rongsenketzüng dak tulu ka amendaka lir. Rongsenketzüng aser libaliru naji apu ani ama, ka mejungra ka melitet. Tetezü nüburtem libaliru tajungba kadi melenshia aintsübaji rongsenketzüng ajungkettsü nüngdak. Saka rongsenketzüng ajungkettsü asoshi mezüngbuba teinyaktsü kaji nübur mulungsentsü melenshitsüla, tensa melenshiba amaji nüburtema lirumedema melenshitsüla. Aji oda, tang asen nüburtemi nüngdakba tongtibang aika rongnung rongsenketzüng jenjang yanglutsüba wadang ya ka asütsü. Rongsenketzüng nung asentenshi bener arutsü asoshi asenoki taoba mapang, tang tia aser tarutsü tia indang shisadangtsüla. Rongsenren nung asentenshi adoktsü asoshi mezüngbuba asenoki shisa lemsateptsü nüngdak aser nisung shia khuret lir ta angateta shilem agitsüla. Mokokchung market jenjang asenoki nguogo, aikadi temulung masütsü akok saka ano tip külen reprangdangra karibo junger ta ashitsüsa inyakdar. Kechi mapa nung südir süaka mezüng yongi mapa tulu tenzüktsü masüji ya tashi inyaktetba agi danga mulung asür. India nung state aika nung reprangdangra liso nisungtemi dang teimba market amokbanga inyakba angur, saka asen limabo tzümartemi takok ngua inyakba amaji asenokibo meinyakteter. Asenok dak tashi mait kaji aji asütsü. Liso nisung karibo kanga junga inyaker, itemji asenoki nungittsüla aser tenüngsang agütsütsü tim. Tzümartem par lima ayangdak maka asen lima aruagi jangratema aahteta alir. Tanü putu ya kadi ka dak angazüktepa aoba putu ka asünung, joko asenokia tangar libaliru tajungjibo angazüktsü merangtsüla. Asenoki sen ya meteter ano mapang talangkabo masü. Sen tamshi mashi, rizünga muyuteter, ano kar ket nungbo senbo lir sernung timi ketdang mesüteter. Asenok aika dak business inyakba mapa yagi dangbo teti tepok sünga melitettsü ama arendaka inyakba angur. Mapang intokba mapa ka ama dang aikadi zübazüba inyaker, temulung muluteter asünung, business takok ngua meinyakteter. Sorkar mapa inyakbaji dang mapa ama bilemer. Business inyaktsüba ya mapa temelabo masü, yangi tapu aika sentaka lir. Rongsen dang masü taremzük, temulungtetba, tanitebelem, shisatsü, ochishiba aser tongtibangsa mapa meranga inyaktsüla. Rongsenketzüng tashi ita melira town, yimtsüng, lokti  mesüra linük kaji kodanga merenloktsü. Mapang ka oboula nunger mangko bushia nokinket mapa inyak, kika süchi toktep aser sobaliba metsünga reta benshi, mapang ka Ao lima Khrista yimsü agizükba den asentenshi milak tulu arua tamanger jenti züin aser arogo tenteta ao. Iba den külemi asen lima shisaluyimba nung asentenshi tulu arua tashi temeteter aser tulur jenti aküm. Yamaji mapang balala nung putu tensa den apet temelenshi aruba otsü angur. Tang putu ya rongsenketzüng nung temulung agütsüba mapang ka lir. Tanü joko nüburtemi rongsen nung nüchiso angutsü mazüngi meranga inyakteper.  Ao kinji lenla aika ka nung mezüngpur ta pi kini züngshir. Aji tim. Kechiyong Naga lima political movement asenoki anir tenzük, education aser Khrista yimsü asenoki mezüng sangoktsü, state politics nunga reprangdangra mezüng shilem agirtemji asenok lir, saisapongba tsütsü nunga yamaji. Asenok dang ya mezüngpur (land of pioneers) ta ajabaji tim nung ajar. Ajangla tanü putu nung asen nüburtemi rongsenketzüng jenjang yanglunür süra asenoki kechi inyakla? Mokokchungji temelenshi bener aruba lima ta pi kini züngshir süra kechiba rongsenketzüng nunga? Akhi shisatsü nung dang odi ta süra asenoki koda tangar anitsü, anungji, mejanga aliba nungi saktsüla. Akhi asen tsürabur senmang amanga maneni ano Naga lima rongsenketzüng nunga temelenshi adokdaktsütsü merangdi. Naga kini Ao kinji teti mezüngpur ta züngshitsüsa asenoki maneni mapa agi sayudi.

*****