Tanü alima kanga karaa ainba tensa ka nung asenok alidang takum libaliru temaba jenjangi atur. Tsürabur nungi angazükba agi, par putu alima tazü aser tongmelang liasü. Aji asünung alu ayimtsüji dang par shisatsü agi aru nung “shiri alu tuluba ayimer mesüra tsük teimba arur” ta asentsü sena akialu mapa nung takum arishi temdaktsü. Par mapang, taka-taiter aser sensaker, makar ta tebendang ajiteta liasü. Aji oda, sensakertem pei tepok aser kibong mesütsü lenmang kanga satemrabo maliasü. Ozü tsüraburi senbo toktsür, jang, metsü-mersü tashi kiyonger-kidanger dang apudena onok mesütetba temulung ayanga bilemteter. Kümtem süitema arudang, alima ainba anogoshi meteter. Asen Naga lima nungbo Kohima aser Dimapur ji kanga takar lima ta jembia aru saka asen Mokokchung-a joko nüburtem kechisarena nung pi bendang menepa atuba angur aser iba jaki ashir, alima ainer.
Asen tsürabur mapang mangsa tia liasü, yongji temang anebaluba nung, sobusolemtsü nung, achi-ajemba nung aser takum libaliru ajak nung rongsenketzüng (economic life) tsütsülen kangarabo tejakleni moi “tanü poksüng” nung dang rangloker liasü. Saka tanü ibaji khenyongi melenshiatokogo. 1990’s tema nungi shir asortemi alima manger mesangwa dang melenshia ainba ya kangarabo memetettsü südi saka iba jakdang asor shia alima ainba indangji kuli sütettsü. School-i aodang, tanü ama taxi/bus nung amentsüjibo toktsür anogoshia school kaket Kg 5-6 bener Km 4-5 tetsüng agi anogoshi naya metsü (20 paise) sa bener, oli aruli ta senzüba menungra-a bilemteter. Item anogotemji tanü anogo den asadangra tetsüngta tulu agi tongdanga lir.
Tsürabur mapang aluyimer timba liasüji, rongsen meintoki pei teka agi züsentetba agi kibong mesüa aru saka tanübo aluyimer 20–30% dang aküm nung nüburtem market nung dang metaloker alitsü tensa kumogo, aser market jenjang kechi nung lir asenok ajaki meteta lir. Asen taküm nung angati ajak agi o ya dang liasü saka tanübo iba o tashi alizüker ang jembir. (Mobile/ T/phone). Tetsüng agi dang senzüa liasü saka kima ayazükli nungi gari nung amener (totzü/para). Kidang TV angati (Dordashan) repranga liasü saka tanübo cable mesüra satellite TV repranger (koba nung ita shia cable fee agütsür/recharge asür). Angati anguba osettem – azü, süra, aser jara ta yong mechir ki yanglua litep, saka tanübo kojal (nail), merang, lisem, lung item amala sen agi alia ki sür alir. Arem nungi süng bena atsük saka tanü LPG (gas) amshir, mi nung tzü molua ajem saka tanübo light (power) ajanga molur mesüra filter sür ajemer (Bio-pure/aqua guard/mineral water etc.). Iba dak alaka ano aika lir.
Iba ama angati anguba kechia maliba putu ka nung asenok alidang asen tsürabur sobaliba tajung aser awashi nung alitsü kanga tongtibang ta tanü ni yangi shinür. Market nung asen nüngdakba tuluba nungi tilaba tashi angur. Asenoki zübazüba dang tenyatenko asür mesüra meshimetsür, saka iba nungji nai shiba tenyar/shiba dang meshir, pa/la bo teintokba (expenditure) dena lir ta metetang. (Tat. Mobile nung jembir, taxi/gari nung or arur/oset alioka aliba agütsür ano aika). Iba nung ya asenok tebilemdangtsü ka lir ta nibo bilemer, aser ibaji “asen sobaliba tajung awashi” ya lir. Iba awashi ta asüba nung ya tapu aika dang sentaka lir. Tanü iba “awashiba” yimya ya nisung ka taküm nung kanga tontibang kümogo. Awashi maliba takümbo, na komala ka ka-a itaa aser shia meteta liaka, nüburtemi naji jangratema majitsü. Hau! alima nung shinga tabensaba mali saka kadi ka den angazüktepa aor. Anungji, asenok ajaki tabensabaji arishia aotsü merangtsüla.
*****
The Nokinketer 