“Asayar kaji libaliro aser achiajemba nung azüoktsüla”
Alima ajunga nung sports ya kanga tongtibang ka kümogo, ya nübur ajaki sapuba taküm nung asaya shilem ka lir. Ao o nung iba dangi saisapong ta ajar.
Iba saisapong ya zünger mezüngmai lir, ano aika tasen purateta aotsü. Ibai akhi alemli nungi peipei kin asaya balala benshia arudagi, iba denji tanü T.V, paper aser internet balala ajanga pi lima nung tang kechi asayar item ajakji ngua arudagi aser tangsa aji agizüktsü meranga arudagi aser yamaji inyakteter.
Saisapong ajak ya tazüokba temzüng ka yur asayar, iba tazüokba temzüngji kanga shisa kaa tabensa temzüng mesüra yangji rarabangsen adoktsü/lendong adoktsü ana nung lir. Iba saisapong ya temang arakzüa ainba nung kanga tongtibang aser ano ibai tetoktepba yimya asü nung takok angutsü meranga asayateper, iba toktepba yimya yabo tongpang rara mesüka lir saka iba rara yabo tazüokba yimya tajung nung, yimjungren ka nung amalitepa aoba, kadi ka den metettepa aoba, shir kin, shiba tajungba ajak meteta akümer.
Tilateri saisapong aika lir, ajakji tongtibang saka tang alima nung asaya tongtibang rongnung table tennis, badminton, cricket aser football etc…ibaibo tanü T.V nung anogo shia sayia aruba angur aser asen ground nunga asayaba asenok ajaki repranger, anungji, iba nung ajitetba ka tongtibangsa asayartem asoshi ya shinür.
Mezüngbuba nung asayar ya asen ground nung intetba asen club member aser yimer/ward sanger nungi adoktsüla tetezü kodangsa MDFA trophy aser cricket tournament amala ka asayadir meyonger tangar ward/yim/club nungi mesüi player tajungji asen atep nungi adokdaktsütsü merangtsüla. Meyonger player tajung ajanga takok tulu bener arutsütsü akok saka tanga limai aotsü tajungtiba asayar shimdang meyongerji dang ner club nungi yokra aji ner atep nungi adokba masü, idakji aküm/tajangzük maka ama ajiteter. Player tajungia ner kiyonger/Club/yimeri ne nübu aginüa lira ner kiyong/yimer/club-ji asaya nung aden tashibo naia tangleni maotsüla.
MDFA asayaba ya tan anasatiba asayamung ka tembanga alinungji, ibai tatishitsü ka agidi; iba asayamung nunga club karibo player tajung karbo tanga kiyong/club nungia anir arua asayaba lir. Ibai association-ia mela-a lir, yangi kecha taitsüba mali, saka player tajungtibaji pei atep nungi adokdaktsütsü merangtsüla ta shinür dang. Takokba arishir asü nungji champion angutsü meranger, saka tangar aniloker akokba nungji tepela mabensar. Lanur asaya meimer, jangrar sempet tajung aketer jenti lir. Anungji, asayar tajungtibaji ner club/ner association nungi kokaka-mekokaka mejameja sayitet nungbo aji kanga agia mera taketba asütsü ta bilemer.
Lanur tajung asünungji player-bo ajak tajung dang lir, saka tajungtiba akümtsü asoshi tesayur tajungji tangalen nungi nenoki shiba dak mulung alemer iba nisungji anir arua coaching agiang, saka asayamung mapangbo tangar anir arua pei telok nung masayadaktsütsüla ta nibo bilemer.
Asayar ka asoshi asayaba temzüngji kanga tongtibang lir, asayar ajaki aji meteta dang lir, saka nisung shia jakla yimya balala asünungji, tazüokba temzüng amshia aseni asen sasa pei jaklaji azüoktettsü merangtsüla. Shiruru dang süaka shiti tulubaia Noa rong nung aitsü meranga pai pa temang azüoka kanga kangshia itetba ama, player tajungtiba ka kümtettsüsa ajemalua azüoktettsü merangtsüla. Asayartem ajaki meteta lir, nai yellow card achitsüba jagi tangari ne jakla yimya meteta akümer aser ano ner team-a menena kümdaktsür.
International player tem asenoki meteta lir, Maradona, Messi, Ronaldo aser ano aika lir, parnok asayaji koma ajung, kara asemba aser discipline koda ajung, parnoki Yellow Card achiba bulua mangutsü, parnoki alima dang pa-a asayar tajung rongnung ka ta sayutsü meranga asayar.
Ano asayar kadi meteta alitsüba kaji achi ajemba nung kanga asüngteta alitsüla, aji ta mesüra nai ne temang azüoka ainba nung balance shitak malitsü. Asayar ka temang moko-sali aser yi aser temesepba chiyungtsü nungi pila-a litetera, ajiang shitakba player tajungji sütettsü. Asenoki asayabo jangrar saka moko-sali aser temesepba chiyungtsü nungi mejenbura ajagi pi (tangar) lima den medemdanga asayatsü makoktsü. Western country den asen India ya aso-ajen balala, ano asen Naga nunger/North-East nisungtem ya India nung tangar state nisungtem dena tera balala (aso-ajen nung), anungji, asemtepba nung memeneper asayabo tajung saka tangar ajateta mouteter. Ano ibai tulutiba kaji; achiajem mazüoktetba agi temang telunglen poknung timtem aser tenük telen nunga tashi maitba agi tangar memeneper ta ajiteter.
Anungji, shibai asaya meimer aser sempet tajung keta lir, parnoki ya angateta temang aser achi ajemba nung azüoka tarutsü taküm jenjang yanglutsü merangang ta temulung ronga bilemba khuret ka lemsateper.
*****
The Nokinketer 