Aor oshi, kenozülu aser mulungzüng sobaliru onük nung anogo ka International Conference sentong 31st July nü yangi Fazl Ali College, Mokokchung nung takok ngua kaogo. Iba sentong ya Kohima Aor Pensioner Telungjem-i senotsü teyari agüja Ao Riju aser Language Translation Centre, FAC nati külem sür ayongzük.
Tanü iba sentong nung shisalen sayur Department of History and Archaeology, NU nungi tesayur Prof. Tiatoshi-i “revisiting the archaeology of Chungliyimti” onük nung ajemdaker pai Chungliyimti nung lungtrok indang, akhi nisung aliba tesemtem aser tanga mapa ali tua bushisüngdangba mapang ngutetba shisatsütem lemsatep.
Taoba mapanga yamala shisa tarok bushir archaeologist telok kati Chungliyimti nung bushisüngdangba kar agia liasü, saka iba nungji taginüba ama meinyaktet. Anungji, 2007 küm Dept. of Art & Culture, Govt. of Nagaland nungi project ka inyaktsü maongka ngua pai anir Chungliyimti nung bushisüngdanga mapa inyakdang akhi amshiba osettsüset tapu aika ngutetbatem noksa dena tesentepertem dang power point ajanga sayu.
Paisa Chungliyimti nung dang masü saka iba temeket aliba akhi tongtibang tesemtem – Kubok, Longdikimung, Sumanglong, Yimsenpirong tzüpu, Tzüsen tzüpu, Kurong aser tesem balala nung research agiba rasa-a ashiba den kuli dena sayu. Iba mapang kisüjensü yangluba yimya, parnoki ali atudang ngutetba azükjang, lung balala, merang oset, Chaplee, alipo aser ano aika sayua liasü.
Asenoki dang temulung agütsürbo Chungliyimti tesem ya alima nung research agidak tesem tongtibang ka kümtettsü ngujem lir. Chungliyimti aser temeket tesemtem nung ya ano research agitsü wadang aika anüngdaka angur, anungji, lanurtemi tang nguteta aliba dang nungi tajungba aser tejangjaba bushiloka aotsü merangtsüla, ta paisa tayongzükba ka agütsü.
Akhi jembiba oshi ka samaogo aser aji “Sangpu oshi” lir, anungji, oshioben tsütsü research agitsü jangrartemi Sangpu oshiji bushi nung junger aser bushidi süra lenmang karbo ngutettsü imlar, ta paisa shisem.
Nagaland University nung Research Scholar, Chubatoshi-i “Preserving Ao Naga Ancestral Sites: Oral Tradition as a tool” onük nung jembidang, iba ya tashishitsü aketba onük ka lir, kechiyong akhi otsü jembidang nisung aika mulung yirur, anungji, village council aser ali kiburtem nungi temelaba agir ang research mapaji inyaka aor, ta ashi.
Research agidang tongtibangsa tzüpokdak (source)-ji mulungzüng agi o belentepa jembiba ya dang. Tanü joko yimdakyimtsüng nung tesüi otsü meteter tantsür tambur ajak tesümar, anungji, tarutsü nungbo research aginüyonga tasüngdangdak makatsüsa tia kadi arutsü, ta pai tekümdangtsü ka ashi.
Paisa Chungliyimti nungi telok ka Tzüla apu ajanga Aonglenden aser Koridang bushia arur yang nung jagi yim balala küma aoba den ano telok karbo Tzüla apu majangi Chungliyimti nungi tanga lenmang agir yim küma aoba tengutetba kar lemsatepa liasü.
Tsüngdong arua shilem agir shisalen sayur – Research Scholar, Yimkotong S. Aier, Dr. Resenmenla Longchar, Asst. Prof. Dept. of History ICFAI University, Nagaland, Dr. Arenkala Ao, Asst. Prof. Dept. of Linguistics, NU, Dr. Arenmenla Jamir, Guest Faculty, Dept. of History & Archaeology NU, Mr. N. John Kuotsu, Asst. Prof. Dept. of Computer Science FAC, Wt. Toshisangla, Asst. Prof. Dept. of Ao, FAC, Wt. Repabenla, Asst. Prof. Dept. of Ao FAC aser Dr. Bendangrenla S Longkumer, Asst. Prof. Dept. of English, FAC parnokia onük balala nung paper presentation agütsü.
Tanep Institute for Archaeological Research University of Cambridge nungi tesayur, Dr. Roger Blench McDonald-i “Naga culture and language: Synthesizing new research” onük nung ajemdaker pa alidak tesem nungi online ajanga jembi. Iba den külemi ano online nungisa Dr. T. Temsunungsang, Asst. Prof. EFLU Shillong, Dr. Karilemla, Asst. Prof. Dept. of Philosophy, Savitribai Phule Pune University, Ms. Chibeni Merry, Research Scholar, The Assam Royal Global University, Guwahati, Dr. Lemtila Alinger, Asst. Prof. Dept. of English NU, Dr. Talisenla, Asst. Prof. Dept. of English NU, Wt. Wapanginla Aier, Research Scholar, EFLU, Hyderabad parnokia onük balala nung shilem agia liasü.
*****
The Nokinketer 