2nd August, 2024 nü Chuchuyimpang yimdeni par yimdak Tsüngremmung sentong tulu ka ayongzüka mungogo. Iba sentong nung Nagaland Lok Sabha M.P, S. Süpongmeren Jamir tongti tesemdanger liasü. Sentong nung kishikina yim balala den ano Mokokchung town nungi tanga Naga kintem aser Chuchuyimpang nunger bendang balala nungi lenla tabensa nungi jaoka kanga longsoa munga liasü.

                Supongmeren Jamir-i iba sentong nung jembidang, pa lanuwa Fazl Ali College nung azüngdang aser talisa 1982 election nungi tenzüka politics nung ajemoker arudang, Chuchuyimpang nunger den tesentaktep kanga junga arudar, yamaji Chuchuyimpang nüburtemia par senso dang nungi taliba meima aruba den tanüa pa nem maongka tulu agütsüba asoshi pelaba mezüngbuba metetdaktsü.

                ‘Kong telongjem lir yangji takokba lir aser kong telongjem lir idakji temoatsü jenti sentaka lir, anungji, senso nübur longjema alitsübaji kanga tongtibang aser longjema alibajisa tajungba’, ta pai ashi.

Tanü MVC Capt. Imliakum Ao-i konang bener aruba nüngtem sepoy tulurtem, district nung tokolakpuri anir lenla tabensa nungi telok paika ya Chuchu lima adenshia iba amai Tsüngremmung meraketa aser longsoa mungtepba ya talisa nenok longjemba tamaitsü lir, anungji, ibai amajok mekümdaktsütsüla, ta ashi.

Longjemba maparen dak sentakba nungbo “tama – tesü, aser “tuluba – tilaba” ta kodang tar asadangba onük tali jembidir meputepsa adener, anungji, aji mejembiba tajungba, kechiyong iba jagi puteptsü melena meputep ang tali dendaktsür, ta paisa tekümdangtsü olen ka ashi.

Tsüngremmung benjong ya pei taküm kibong merükteta amungba den Tsüngrem nem tenüngsang agüja aser yimertem putepshiba mapang ka, meranga inyaktsü azüngashiba den tongtibangsa tajung dangbo tajunga ta kadi ka tushiteptsü aser tashimait lira itemji metongshiteper aotsü asoshi paisa benjong tayongzükba ka agütsü.

*****