~ Ms. Toshisangla, Asst. Professor FAC

Okila

‘Metaphor’ ta asüba ya Greek ojang ‘meta’ aser ‘phero’ tena lokteper ojang ka akümba lir. ‘Meta’ tetezü ‘alembanga’ aser ‘phero’ tetezü ‘abentsüba’. Anungji ‘metaphor’ yagi tapu ka indang tetezüji tanga ka indang tetezü alemdanga bener oa medemdanga tesendaktep adoka sayur. Iba metaphor ya simile dang nungi balaka lir sakasa tenaprong yagi oset mesüra langka tapu ana medemdanga sayur. Asenoki aiben metaphor aser simile ana ya mebendangi meyoktepa amshir saka tena rongnung tepila ita lir. Kodang medemdangba oren ka nung ‘ama’ ta lidir ibaji Simile asütsü. Tat: La Shirong ama tekülak. Iba kasa orenji kodang metaphor nung amshidir “ Laji Shirong lir” ta asütsü. Tenaprongla yagi tapu ana – ‘La’ aser ‘Shirong’ na tsüngta medemdanger ta angateter. Simile ya rhetorical device ka lir aser Simile ta asüba ya oset ana tsüngta medemdangba mapang amshir. Kodang medemdangdir ‘mesüka’ ‘ama’ ta amshir/inoker. Anungji kodang medemdangba oren nung ‘mesüka’ mesüra ‘ama’ ta amshia lidir ibaji Simile ta angateter.

Anogoshia libaliru tensa balala nung item anaprongla ya aiben kanga petpeta amshiba angur. Asen tetsü teboutemi asen oshi tezüluba nung makaba mapang nung item metaphor aser simile-tem kanga petpeta aser arokaroka amshiba indang angateter aser itemji tebang o agi melenzüka dang aru aser itemji tanü tashi asenoki angazüka benshia arur.

Aortemi bulua amshiba metaphor aser simile telemsa kar yamai tongmelang agi agütsür

A. Maparen aser mapang balala nung benshiba aser jembiba Simile aser Metaphor kar:

1. Pa nashi pongchi ama tashitait.

2. La ninang ama mazüngi inyaker.

3. Kü teka rüjep ama mokong.

4. Süngtemji shiti ama tulu.

5. La bangji tepela ayongbang.

6. Alokbaji kü taküm milen.

7. Pa mulungjangji tzüyim lir.

8. Ne tenükji petinu.

9. Temeimji ayi aketba naro lir.

10. Kü temangji tenla ki lir.

11. Pa otemji kü narong atema ken lir.

12. Tebuji kibong tongtiret.

13. Tanepbo ozü kidang kisemer anong ama apong.

14. Sobalibaji kin ka ayak.

15. Temetetba shisatsüji tashi.

16. La mulungjangji meranglung ama temerang.

17. Nisung ka arishiji sütaker süksen ama kara aor.

18. La mit mopungji yipru mesük.

19. La tenükji waro nük.

B. Lutsüa jembibayim (Insult) Tat:

1. Na ya tekatsü ar.

 2. Kü medemla ya ammang pokpo lir.

3. La koya ama ola mali.

4. Pa küra ama kanga anüalem.

5. Pa tuti ama jaksajaklemer.

 6. Narolaji lah ama tenük tapok.

7. La shijok ama kongrasüker.

8. Merenba nokji scütem lir.

9. Aiürlaji hiki asem dang.

10. Lar chipoji mojing ama naker.

11. Pa sentsüji ayaterem.

12. Pa tepuji koterang.

13. Tanurji tsüksü ama pungpapungpar.

 14. La nükjangji pokpo ama jokteter.

15. Pa tenütsüji lungpak manung anü poluktsü ama prangshidar.

16. La tenütsü nungji tsük tin ka yokshia sademsademer.

17. Pa mulungsentsüji waro ama tanak.

18. Pa bangsemoji minkong min ama tasak.

20. Pa bangsobanglem yimyaji Dalda pongdang nungi totzü yangshir ama.

C. Temenünütsü keta amshibayim (humorous) Tat:

     1. Pa yipden nungi shishitsübaji nashi scü nungi lungsang kentettsü asakba ama lir.

      2. Pa mang nung waka menembaji tsünami ama sashir.

      3. Tambusang tenükji süklep ka tarok.

      4. Ni asentzü nung tzü wadagi.

      5. La bangji oro ama telili.

      6. La olaji kangrang ola mesüker.

      7. Kü tenük tsüngsangdaki.

      8. Kü nükküptsüji garitsüng ama taret lir.

      9. Pa mitji tzü ama ajar.

Metaphor aser Simile ya nüngtugu Sangrojet aser Jilushi zülur William Shakespeare amalai aiben amshia angutsü tat: ‘As you like it’ Jilushi nung “Alima ya Jilushi sabang ka lir”. T.Senka Ao -i ‘Teronem Taku’ yimdangjem nung Aremla tobur ajungba rajemdaktsütsü atema simile aser metaphor yamai amshia lir; “La tetsüngtepenji leplu entsü ama tsüksemtsüksemer” , “La tebang mechiji yalem naro pongsen”.

Metaphor tapu pezü indang terasa yamai

1. Standard Metaphor (Indang-indanga Medemdangba):

Iba metaphor yagi oset mesüra taküm aliba tsüngta meputepi aliba medemdanger aser x ji y ta ashir.

Tat: (a) La kü taküm tesangwa.

        (b) Mapangji auür.

        (c) Taküm alibaji teimla.

        (d) O ji taküm.

2. Indirect or Implied Metaphor (Meküna Medemdangba):

Iba yimya nung ya metaphor jagi meputepba tapu ana tsüngta medemdanga sayur saka tapu ka jibo tenüng teta mashir.

Tat: (a) Tetsü jagi lar jala dak asanglokja meren. Yangi tetsüji azü den medemdanger saka oren nungji “azü” taji shia mali.

Tat: (b) Jala kiyi aoba anogo nung tebu tenibong nungi ayongnu ka tanemi yimzüka alu. Yangi tebu nüktzüjia yongnu den medemdanger saka oren nungji “nüktzübo” shia mali.

Tat: (c) Longkongla temeli agi yimertem nem mim agütsü. Yangi Longkongla ya per den medemdanger saka per ta shia mali.

3. Visual Metaphor (Noksa agi Sayuba):

Noksa mesüra tamaitsü kar sayuba ajanga terepranger nem angatetdaktsüba dang noksa agi sayuba metaphor (visual metaphor) ta ajar.Iba ya teimba ka film, art aser advertisement nung amshir.

Tat: (a) Milendong jagi tesangwa bener aruba sayur.

        (b) Posü jagi yimjung sayur.

        (c) Süngdong tila jagi ainba sayur.

        (d) San chanu jagi Yisu Khrista tamaitsü sayur.

4. Extended or Sustained Metaphor (Moraloka aoba):

Sangro mesüra otsüolem nung oset mesüra nisung balala ana tsüngta medemdanga oren mesüra pongtem nung amshiyonga aser amshiloka aoba dang extended metaphor ta ajar. Tat: T. Senka Ao-i züluba ‘Taküm Tzütok’ sangro nung yamai shia angutsü.

“ Ayongküm Tzütok ama, kü rishi mangkonang dang”. Pai pa takümji tzütok ka den medemdanger. Iba tzütokji arishi kanga tatsü, oda mongpu ka dang ta ashir aser sangro tarensena alu dang pa taküm tatembang kati arubaji tzütok rarema akümba den medemdanger.

T. Senka Ao-isa züluba sangro “ Senso Atsüki” mezüngbuba tejong nung yamai zülua angur. “Kibongji atsüki ka lir”. Pai kibong kaji atsüki den medemdanger aser tanabuba tejong nung yamai shia angur. “Par atsükiji tsürabur”. Iba taren ajanga sangro züluri ‘kibong’, ‘tsürabur’ aser ‘atsüki’ item tesentaktepji medemdanga züluba angur.

O Tembang

Ao oshi ya metaphor aser Simile amshiyim nung kanga takar ta bushiteter. Kechiba süra Ao oshi nung anapronglaji tensa balala nung kanga peta amshiba angur. Iba tebushiba ya ajanga Ao oshi tarokba nung angatettsü aser samaya aliba ojangtem aser item amshiyim rizünga ayutsü tasatem metettsü. Ao nung amshibatem English nung amshiba den medemdanga bushitsü tongtibang ta angateter. Iba den tarutsü nunga iba shisaluyim nung maneni bushiloka aotsü teimla lir ta apiteter.

MEDEMDANGBA KAKETTEM (Bibliography):

  • Ao, T.Senka. “Teronem Taku” (Tribal Development and Communication Centre Mkg) 2017.
  • Ao, T.Senka. “ Süngti Berem” (Tribal Development and Communication Centre Mkg) 2018.
  • ASLB. “ ArokOsep” Kohima: NV Press, 2019.
  • Ao, T. Senka. “ Ao Oshi Tensenyim” (ASLB Publication) 2022.

TEZÜLUR INDANG:

Wt. Toshisangla ya Longsa tsür aser la ya Fazl Ali College, Mokokchung nung Ao sayur. Iba onük ya lai July 31st, 2024 nü FAC nung ‘One Day International Conference on Language, Literature and Oral Tradition of the Ao-Nagas’ (Aor Oshi, Kenozülu aser Mulungzüng Sobaliru onük nung kenü ali kintem mungdang sentong) nung jembiba ka lir.