“Framework Agreement” aser “Agreed Position” na ya “Shillong Accord” den kecha balakabo masü amai angur: Dr. Toshi Echa

Naga nüchiso asoshi noktakba (Naga national movement) asen shi, azü aser teret nung alibaji kecha agia aitoktsütsü makok. India nungeri Naga nüchiso tia raksaja Naga nunger ajemreptsü asoshi Naga nunger tepsetba, rishikangshibaji kodanga Naga nungeri amatoktsü makok. Iba o ya Dr. Toshi Echa-i Khensa Peace Camp, Yimyu Compound nung FGN/NNC Ao Region pur 78 buba Nagaland Independence Day 14^th August, 2024 nü amungdang metetdaktsü.

                Naga nüchiso nülaksü asür Osemjujang (Dibuia), Marnungtet (Ungma) aser Sümakchang (Mokokchung), par asemi 2^nd Feb 1965 iba tesem nung noktaker Naga nüchiso yimden telatet nülaksü India Foreign Secretary, Gundivia aser Member of Parliament on Foreign Affairs tsüngdang nülak asong. Iba nülaksü o Dalle Namo, Peace Mission Secretary ajanga meyip. Iba anogo Col. Aomeri (Japu) Commandant aser Capt. Senka (Longmisa) 2^nd-in-command liasü. Tanüa iba nülaksü otem taküm lir, ta Dr. Toshi Echa shiba NNC Ao Region nung Advisor lir, pai metetdaktsü.

                Naga nüchiso takutsüngsen (revolution) ya senso temeten asoshi shi, azü aser teret nung munger taküm bendanga agüja noktakba lir. Asen sobaliba, abensüoshi, sobusolemba, achiajem, tzü mopung, taküm yimya nung India nunger den saku masü. Yimlitem melentepa aor, putu melentepa aor saka yimli nüchiso memelenshir, ta paisa kuli kar dena agütsü.

                Paisa Naga nüchiso asoshi noktakyonga arudang alima otsüren nung mamatoktsüba kar lemsatepdang, 13^th century Ahom kini Kachari yimli matsüngtokdang, Naga nunger aser Kachari yimli yanglur Brahmaputra lenten lima yimli yanglur küm 600 lia arudang, Naga nüchiso yimdenyimli nung kecha timtem makai aru. Ajisür 1824 nungi Burmese yimaker arua Ahom yimli laodaktsü. Saka Naga nüchiso asoshi yimli nung timtem mali asü.

1842-1850 Governor Gen. Lord Dalhusie aliba mapang mezüngbuba alima ozüng ka Naga nunger sobaliba aser yimdenyimli nung mejangjungtsü sangdong (Non Interference Policy in Naga Hills). Aji saka, British yimsüsüba Naga limai tanem tanemi aita mangatetep adoka 1834-1879 küm 45 ben raratepa arur, 27^th March 1880 nung “No War” (meraratsü) yimjung tenangzüktep British sorkar meyonger Brig. General Nation aser Pelhou Dolie Mezoma nung nangzüktep. Ibai Naga nüchiso tamendakdak nükmen lir, ta pai ashi.

10^th Jan 1929 nü British Statutory Commission, Lord Simon-i anir Kohima-i arudang, ‘nenok yimsüsüba yimli kodang anendir onok akhi ama tokjang’ ta zülur agütsüba ya asen tsüraburi Naga yimdenyimli nüchiso asoshi inyakba tulubaji lir. Iba den 1935 Act ajanga Naga lima rangpen external nung yua (control/uncontrolled area) alibaji Naga nunger nüchiso temeten tajemetdak lir, ta ashi.

19^th Aug 1946, Jawarharlal Nehru, Prime Minister of India-i India anüdoklen aliba Naga nunger limaji tenem kin oda India nungera masü mesüra Burma nungera masü, aser tangar bendanger küboka maliba tenem kin ka lir. Iba oren yagi India rangpen history nung Naga nüchiso temeten sayur. 9^th April, 1946 British Govt.-i India-i yokba “Cabinet Mission” New Delhi nung, Naga Delegates-i Naga nunger dang masüngdangtepi onok Naga nunger tarutsü tia kecha melemtettsü metetdaktsür, ta zülur agütsüba British Parliament nung zülu (record) tang tashi taküm lir, ta paisa metetdaktsü.

29^th May 1947 British Parliament-i yokba “Advisory Committee on Aboriginal Tribes” (Lisopur tenem kin) Kohima-i arudang, Naga yimdenyimli akhi ama dang alitsü ta zülur agütsübaji Naga nüchiso nüktang tulutiba ka lir. 27^th – 29^th June, 1947 NNC aser Assam Governor, Sir. Akbar Hydari Ali tsüngta ‘9^th Point Agreement’ ya Naga nüchiso temeten tulutiba, tang tashi India nunger lenirtemi ya merajemi lir, ta paisa ashi.

19^th July 1947 nü India nunger nüchiso tebu, Mahatma Gandhi-i “nenoki India union nung medenüra, Naga nungerji nüchiso yimli nung balaka asütsüji nenok mulung”, ta ashiba alima otsü nung teti alitsü. 14^th Aug 1947 Naga nüchiso yimli anogo alima dang sangdongba aser UNO-i iba osang agizükba zülu tang tashi mesamai taküm lir, ta Dr. Toshi Echaisa metetdaktsü.

9^th Jan 1950 Delhi nung aser 27^th Oct 1950 Shillong nung Dr. Rajandra Prased, President of India aser NNC delegates Naga nüchiso yimli asoshi akangakanga noktakba züluji asen tetsüng ajemetdak lir, ta paisa ashi.

Alima ka kin nüchiso noknü aser raraba hadir mamshi telemtetba agia yimdenyimli yanglubaji ajak dang tajungba Indo-Naga tsüngta nüchiso asoshi kin anapronglai mulungtep nung 16^th May, 1951 Plebiscite agi. Ibai Naga nunger aser India nunger tsüngta nüchiso asoshi arla. Iba anogo India nungi Observer B.N. Malik, Director Intelligent aser osangbener The Hindustan Standard kulisür liasü. “Naga nunger asoshi alima tsüngdang kuli tulutibaji ibai lir”, ta paisa shisem.

Alima kin ana nüchiso temeten indang jembidang, tongpang tulu jazüka nübur taküm, jenti lalua rarar tangatetep kadi arua kadi ka den yimjung bener arunür idangji cease-fire declare süa tongpang chitepba anener. Naga nunger aser India tongpang rara anentsü 6^th Sept 1964 cease-fire amenokba jagi Naga nungerji India nunger masü ta kuli sayur. Asen Ao lima nunga iba anogo Longmisa yimdak Assam Chief Minister, B.P Chalia arua Cease- Fire declare asü, ta ashi.

Cease- fire mapang 18^th Feb, 1966 Indian Prime Minister, Indra Gandhi den Naga Federal govt. nungi Ato Kilonser – Kughato, NNC Vice President – Imkongmeren, Foreign Secretary – Isak Swu densema yimden olemtep tenzük. Aji oda, 9 ben tashi amendang Indian Prime Minister, Indra Gandhi-i Naga yimden telemtetbaji India temzüng kübok dang agitsü, ta ashi. Iba osangji bener Vizol, Suiza aser Keviyali London-i A.Z Phizo dangi ao saka Phizo-i iba oji magizük nung Delhi nungi meyipa aru. Saka cease-fire camp ana – Chedema aser Khensa nung yanglu. Tanü Chedema Peace Camp kanga junga anepalua odar. Saka asen Ao lima Khensa Peace Camp yamai mejungi ayuba yagi Ao senso tajungtemi temulung magütsüba sayur, ta paisa sasaba olen ka lemsatep.

NAGA YIMDENYIMLI NUNG ASENOK SASA ASEN TETSÜNG ATEMBA

India lima rangpen nung National Emergency June ita 1975 sangdong. Naga nüchiso asoshi noktakertem pua tepokdak ayu. Talisa NNC Vice President, Imkongmeren aser Gen. Saniba pur temai anir adok. Ano lenir Vamazo, Huska, Dalle Namo aser Chalie Nowgong jail nung puoka ayu. NNC aser Federal Govt. nung tanishir pua alir rongnungi Naga underground tenüng nung India Govt. nungi Governor L.P Singh tenangzüktep ka koba dang “Shillong Accord” ta ajar, ibaji 11^th Nov., 1975 zülutep. Saka A.Z Phizo-i magizük. Isac Swu, Foreign Secretary aser Th. Muivah, NNC General Secretary tenadia magizük. Tenadi anir NSCN tentet. Saka 1988 nung NSCN tsüngta mangatetep adoka ana paksa. Oda-oda lia arudang, telemsa adoka tangbo telok 25 shi kümogo. Naga nüchiso shi aser azü tangatetba nung inyaker mali, kadia ka dak mulung malemer, kechiaser linük asoshi taküm tenlar masü saka sarusajia libalirotsü, kisüjensütsü aser rongsen benbuba telok, tebang o mapa na mesütepi alir dang kümogo, ta paisa tesasaba o kar lemsatep.

Naga National workers tsüngta kadi ka arishitepa azü tokshitep mapang 1990s zülu reprangra 1997 nung Aor lanur taküm 97 sama, 1998 nung lanur 23 sama aser 1999 nung Aor lanur 19 taküm sama. Kechiba telok balala rara nung küm asem tsüngta Aor lanur 139 taküm sama ta süra kadi ka arishitepba nungi tesama adokba lir, ta pai bushitetba kuli kar metetdaktsü.

1955-1975 (20 years) tsüngta asen Aor 61 taküm tenla-a tsükchir den tongpang raradang nokinketer ama asü. T. Aliba Imti NNC nung mezüngbuba President liasü saka asen Aor samanir sür 1959-1960 nung NNC tạrak adokdakja Naga Peoples Convention tentet. Ano 1970s nung asenokisa Naga Burma nung NNC pelepsa taküm jenti amajok nung sama. Naga Mothers’ Association Aotsüri anir tentet saka atsüngzüka atar, NSF Aori shilem tulu agia tentet saka mapang kabo asenok atsüngzüker liasü. ABAM asen Aor tentet tajungtiba nung asen sasa komo anakteter ama angur, ta paisa temulung shirangba o kar ashi.

“Framework Agreement” 3^rd Aug., 2015 NSCN (IM) aser Govt. of India zülutep aser ano “Agreed Position” 17^th Nov., 2017, 7 NNPGS Working Committee anaprongla ya telung miim zülubangluji shisadangra, 11″ Nov., 1975 Shillong Accord den kecha balakabo masü amai angur. Kechiaser Agreement asemprongla India Union kübok inyakyim asütsü ama ajiteter, ta Dr. Toshi-isa lenla balala nungi asadanga jembi. “Tang nungi danga asendenshir asenoki len jimia maotsüsa ochi nung Naga nüchiso asoshi tarutsü lanu asensor nem shisatsü peria amoktsüdi”, ta paisa ayongzük.

Sentong tenzüka maodang tanep NNC AO Region President, Senli Imchen-i Naga National Flag atsükettsü. Sentong nung NNC President, Gen. Retd. Viyalie Metha-i yokba osang NNC Ao Region Advisor, Takoyaba-i zünga ashi. NNC Ao Region Court Chairman, Kikum Pongen iba sentong nung menden liasü. NNC Sub Region Ongpangkong President – Tongzük-i tarur pela-a agizük aser NNC Ao Region, Tatar Tinu-i melepzüng o lemsatep. Rev. K. Temjen Longchar-i Laishiba zünga temoatsü meshia sarasadem. Temenungratsüka tang teinyakdak pur den taoba mapang linük tenzükertem, temulungertem aser osangbenertem kar densema iba nüchiso anogo meraketa munga liasü.

*****