(Aor Tar Nunger Otsü Ka)
Alemli yim ka nung Sarilungli ta sür azümesen nisung ka liasü. Anungji parji kanga tepetzük aser leni mao sensaker kibong ka. Joko sensak timtem marem nung tesüsa pai ya bilemtet, “Oda meinyaki chiyungba lima ka akatsü akok, anungji aji bushia odi” ta sür nülak talangba bushia let ka nung janger pa kinungtsü dang o teperi shir meinyaki chiyungba limaji bushia apuso.
Mapang talangka agia meinyaki chiyungba limaji bushia nülak ajak sentema senzü. Alima ajak sentema senzüjen senzür pai iba limaji mangu aser joko paji kanga tambur küma nemzür pei yim menungraa bushia arunüa bilem.
Kenü anogo tsükpo ozü kati süngkolak nung mener aten. Iba olaji kinungtsüi tebuba tenüng “Sarilungli, Sarilungli” ta tetshir ama angashi nung lai tebubaji kanga menungra bilema kazür mejang.
Mapang kopi meli-i Sarilungli par ki bushia shilang. Saka asangwa mapang aoba tenük tepu ajak jena senzür arunung tenapronglai sorobangro aibelena kümer mereprangteti liasü. Joko nülakjia sentemer liasü. Saka tena mapang talangka agia otsü ajak jembi tashi nungang metetepa aküm.
Konung apuaniji lanuwa bilemteta otsü jembidang “Asüngbo ni süngkong ajendangdi, na-a ang indangang” ta jembi. Anungji pa süngkong ajenshitsü atema oktemba ajunga atutsü mesodang nung makok kidangi sasaseta meyipa aru. Kinungtsüjia ang indangtsü atema bangdongji tepi nung metonglok nung, tepi küp nung naloka ayuba agi ang meintet. Anungji Sarilungli-i kanga dang nemjema iba ken aten;
“Asaa mesami
Lempua mepumi”_
Idangji laia iba ken aten;
“Nia tanurata amelemlak anurata samiya”
Meinyak chiyungba lima bushia senzüdang atura taküm ajak süia nemzür talak tasang lanuwa bilemteta sasaseta liasü.
*****
The Nokinketer 