Mokokchung ya education tajungtiba anguba tzüpokdak tesem ta akümtsü asoshi merangtsüla aser ibaji ataloktsü asoshi riju ka ajungba kisüngi mesütet saka kaket riju ajak theological riju densema sakuku lirumedema atutsü nüngdaker. Iba o ya Mokokchung Deputy Commissioner, Thsuvisie Phoji-i People’s College, Mokokchung pur Mezüngbuba ‘October Fiesta’ benjong ‘breaking barriers’ omen dak rangloker Multipurpose Indoor Stadium nung jembidang metetdaktsü.
Nagaland nung Mokokchung district ya education tsütsü mezüngpur lir, aji oda, yangi nungi dang Christianity tenzük aser iba den formal education densema talisa anüdoklen alirtem den iba temoatsüji lemsatep, ta pai Ao kin tenüng sanga ashi.
Tanü alima kanga renloka aoba den technology tejakleni aoba ajanga medemer, adianu, kinunger aser külem inyakertem tsüngta tepilaba akümba angur. T.V, Internet aser Smartphone amala asen limai marudangbo asenok ajurutepa sensaksema liasü, saka tanü joko akhi ama ajurutepa sensaksemba kanga ajema kümogo, ta pai technology timi mamshiba ajanga asenok tepilaba kümdaktsüba kuli ka lemsatep.
Iba den ano Naga nunger ya kin onsara, iyongji lenmang aisü nung asenok tebilemba balala asür, anungji, kadi ka tongtettsü asoshi iba ama sentong ayongba den education tajung agütsüba ajanga omeni aginübaji ataloktettsü imlar, ta pai ashi.
Mokokchung nung kaket riju kwika lir, item ajak nungji kaketshir tokolok techirapur talisa koda masür kibongtem asoshi scholarship agütsütsü maongka lapoka yutsütsüla. Kaket rijutemi iba ama maongka lapoktsüra nungdakbapur tajangzük angutsü imlar, ta paisa ashi.
Mokokchung district nung aliba kaket rijutem nükjidong balala alitsü, aji oda, riju balala tsüngta tetoktepba nela (competitive spirit) lidaktsünür, ibaji nisung kar ajemzüka yoker kar temabai atutsüba indang ashir masü saka tanela tajung nung tetoktepbaji alitsüla, ta pai ashi. Tanü alima ya tetoktepba agi süngogo, yamaji rijutem rongnung tetoktepba kodang lidir, memeteti Mokokchung nung aliba rijutem ajungkettsü aser külemi aintsü, ta paisa shisem.
Mokokchung ya kanga dang teimla akaba tesem ka lir, anungji, ibai nübur education tajung anguba tzüpokdak tesem ka kümdaktsütsü merangtsüla, iba nükjidong ataloktsü asoshi riju kar ajungba agi majungtsü, Mokokchung tejakleni onüra tajungtiba asoshi renemtsü nungdaker, ta paisa tebilemba lemsatep. Secular rijutem dang masü saka theological riju densema liru medema atutsüla, jenjang ka kodang tongdir, tangalen nungi Mokokchung-i shisa aneti arutsübasa, ta paisa shisem.
Iba ama riju ka lapoka alima shisatsü arentsü lenmang lapoktsü nungdang Aor aser Mokokchung district ajangzüktsü nükla yur iba college ya asensa tenzüker. College ka anepalua bener aotsübaji mapa temela masü, yangi teinyaktsü aika sentaka lir, aji oda, iba riju tejakleni nükjidong ataloka aotsü asoshi nüburtem nungi amalitep aser sarasadem maneni akanger, ta People’s College kibur tenüng nung RD & SIRD Minister, Metsübo Jamiri metetdaktsü.
Iba riju ya tanga rijutem den tokteptsü asoshi lapoker masü, saka riju tajungba lapoka ao nung dang kaketshirtem tsüngta tetoktepba akatsü aser iba ajanga kaketshir tajung adoktsü teimla nung tenzüker. Iba riju lapokshiba ajanga Mokokchung district nungi tangar atoksa kaketshir tajung karbo adoktsü tamang akar, ta ashi. Aji oda, iba riju nungi kaketshir tajung kar danga adokra Aor aser Mokokchung district asoshi temoatsü asütsü, ta paisa shisem. Mokokchung district nung alirtem talisa koda masür kibongtem bendangleni moudaktsüi pei atep nung education tajung agütsütsü nükjidong tulu lir, aser Mokokchung nunga college tajung ka lir ta asütsüsa aser Mokokchung nung alirtem nem bendangleni rongsen jenti intoka meyoki tangalen education agütsüba ama kasa maongka lapoktsütsü nükjidong lir, ta paisa metetdaktsü.
The Nokinketer 