~Limatula Longkumer

Okila

Iba ocet nung Prayer Centre indang nung kü tebilemba kar lemsateper. Prayer centre, sarasadem tesep melentepa dang iba ocet nung amshir. Engraji o-a aika inoksema zülur, iba atema tazüngeri mejashitsü mepishir. Ajak ajungtsü nükjidong nung prayer centre aser arogo inyakyim medemdanga teyanglushitsü tebilemba kar yangi zülur. Iba onük nung asen lima prayer centre koma inyaka aor iba indangji kü shisatsü yari tongmelang agi tatsüka zülur. Yangi zülua aliba yagi prayer centre shinga maitsür, saka yimkong inyakyim (general) ajitetba nung kü tangatetba yari zülur.

Sarasadem aser tamang yimsü

Arogo otsütem lepa reprangra, sarasadem sep (prayer centre) ya tanü asen putu nung ajungbena poktetba ka masü, saka arogo tetenzük nungi tenteta aruba yimya ka lir. Tat. agi, Yisu Gathsemane atsüki nung sarasademba (Mat. 26; Mk. 14),Yisu kotaki meyipa tur, nütsüngtem Yirusalemi arur sarasademba (T.Mapa 1). Tejen Lai nunga lumia sarasademba otsü aika zülua lir. Anungji sarasadem ya Khristan yimsü nung teti inyakba mapa ka lir. Sarasadem nung ain lir, sarasasdemi ajak akoker aser iba tashi ajanga tamangtir ka kümdaktsür. Saka Laishiba nung lumia sarasadem asübaji arogo telungjem kübok inyaka aru. Alima nung aliba tamangba yimsütem balala reprangdangra, sarasadem aser lumiba ya yimsü ajak nung lir. Hinduism, Islam, Buddhism, yamala ajak nung lumia sarasadem yimya tajung aika sayur aser benshia arur. Talisa Muslim nungeri küm nung ita ka lumir. Iba yagi sayur, asenok kechi koda lidir liang, tatem nungbo meimchir ajaki Tsüngrem dak atemer. Takar-tulur, sensaker-tilar, tanur-tain ajaki timtem toushi, shisabulu khuret ajak nung Tsungrem bushir, aser taneptsü bushia Tsüngrem dangi meyiper. Lumia sarasademba ajanga tanela aser shi nung temoatsü, aser anisüngzük tepela angur. Anungji sarasademji meimchir ajak asoshi tongtibang yinzü ka kobai teyanglur Tsüngrem den tesentaktep adokdaktsür; aser iba jagi meimchir madak temaba teyanglur Tsüngrem ka lir aser Pa ajanga asenok alir ta angateter.

Sarasadem Sep ya Pentecostal telok nung adokba mapa ka

Tanü asen lima nung sarasadem tesep lapoka aoba ya “Neo- Pentecostal- Charismatic Movement” nungi adokba süngjang lir ta metetdi. Iba movement ya 1960s, 70s nungi tenzüka alima aika nung sashia odaki. Iba sarasadem tesep ya asen lima nung dang masü, saka alima ajak nung kong revival sashia adoker, yangji sarasadem tesep tenteta aobaji angutsü. Africa lima nunga asen lima nung adokba amai sarasadem tesep aika adoka odaki, kasaji Asia lima nunga tesem aika nung sarasadem tesep adokba angutsü. Iba ya 19th aser 20th centuries nung adokba charismatic movement dang nungi balaka lir. Iba Neo-Pentecostalism nung tongtibang asem arogo nung atalokba angutsü.

Itemji: (i) establishment of independent charismatic churches; (ii) charismatic transdenominational fellowships; and (iii) charismatic renewal groups within historic mission denominations. Asen lima nung sarasadem tesep nungji temalen shisema aliba number ana (2) aser asemji (3) inyakdaki aser number kaji (1) joko Dimapur town nungbo tenzüka meilongi odaki. Item sarasadem tesep nungji kecha tenokdangba makai kobai onüdir aotsü akoker.

Denomination balala telemsa and tetoktepba kecha sarasadem tesep nung madoker. Mesüra par kin, ozü kin-i lapokba ta telemsa kecha mali. Na asoshi koba tajungba ta südir mashi kati aotsü aser mashi mapang nung aotsü akoker, kechiaser 24×7 prayer centre lapoka alir. Tanabuba nung, prayer centre-tem ya tangar denomination kar arua tenzükba masü, asen nisungtem shirnok arogo nung züngsem tajungtem lir, parnoki tenzükba asünungji iba ya arogo nung asentenshi adokdaktsür telok ka amai lir. Saka item sarasadem tesep teloktemji jungjunga reprangdangra, independent fellowship ama küma odaki. Arogo nung asentenshi jangrar teloki lapoka aoba teseptem lir anungji shiangaia nokdangtsü makok. Saka tanü amai dang prayer centre inyakyim ya inyakyonga aonungbo, ashiko mekümdangra iba yagi independent arogo kümteta aotsü ana nung dang lir. Anungji iba indang ya junga shisadangtsü mapang ka tongogo.

Shirnok Sarasadem tesepi aor?

Prayer centre tangatetba tsütsü nungi reprangdangra, arogo nung asenok telok asem kümogo. Mezüngbuba telokji prayer centre nung dang temulung alemba aser temulungsentsü ajak agi bendanga yariba. Ashiko, item nüburtemji pei mother church toktsür prayer centre-iang teimba aoba nüburtem asütsü akok. Item nüburtemi arogo inyakyim aser sayutsüngiba yimya nungji temulung mesüi alitsü akok, aser temulung masüba indang jembibaji angur. Tanabuba telokji 50-50, tetezü nungdak mapang nung prayer centre-i aotsü saka arogo nunga member tajung ka ama regular sentepi oa shilem agiba telok lir. Asembuba telokji kodanga sarasadem tesep-i maor, prayer centre anema meinyaker, saka temulung nungbo prayer centre-ji keta sena mebilemer saka arogo benjatsüba telok ka amai bilem ya alitsü akok. Nisung telok lemsaba den külemi arogo rongsen-a lemsar ta metetdi. Arogo asüyonga, sarasadem tesep asüyonga tamang tenla agi jajaba telungjem tentet asünung tamangtir-i mulungsoa agütsüba tenla agi taküm liteper ta metetdi. Asenok joko arogo rongsen (sources) lemsaogo, sarasadem tesep karbo takar-tuluri rongsen jenti agüja terenlok aoba osangtem angashir. Prayer centre karbo India lima tesem aika nung mesem-a aoba osang angashir. Oda lia liabo arogo nunga telemsa adoktsü menua mali. Tamanger ajaki iba atema shi shia bilemtsüla.

Kechiba Sarasadem Sepi aor?

Ashiko kuli aika alitsü akok. Aika shi aser tanela nung taneptsü asoshi, timtem-khuret mapang nung telangzüba (answer) tangsa tang metetnüba agi sarasademer dangi aor. Shirnok sarasadem sepi aor parnok nüngdaktemji: exam nung takok angutsü, mapa angutsü atema, competitive exam nung takok angutsü, kibong akümtsü, election nung takok angutsü, temenen aritoktsü, yi jemer, mozü achir azüoktsü, mim mozü katitsü, shisabulu khuret, tashitak tapu aika bener taneptsü bushia arur. Arogo nung Pastor (toklang tenzüker) dangi masü teimba kadi prayer centre bushia item sarasadem onük balala bener senteper. Ya kechiba? Arogoi nübur tanela aser shi nung anisüngzük angutsüsa meyariteter asü? Arogo tenzüker dak temulung malemer asü? Mesüra tanela sempet akar bushia sarasadem sep jagi aor? Prayer centre nung taneptsü, aser sayatenya mapa aika inyakba osangtem kuli aika lir. Tsüngremer sayatenya tatalokba aika lir asünung iba ya nisungtem asoshi puatsü telok ka asü? Asen nisungi tangsa tang telangzuba aginür. Mangdanger aser shiner dang Tsungremi kechi tuyur ta asüngdanger. Anungji shiner aser mangdangertemji tia ashir amai, Tsüngrem ama kümdaktsür. Asen kija tamang Tsüngrem dak ayuba masü mangdangerji asen Tsüngrem kümdaktsür.

Prayer Centre inyakyim yimya

Pastor Bendangmeren, Kohima-i züluba ocet ka nung Prayer Centre 11 (ter ka) tashi lapoka aliba küm tersür ta tejaklen shisema lir. 1 Tangbo Nagaland nung prayer centre aika kümogo, aser aji Dimapur area nung teimba ka alitsü sȕdi. Kechiba Prayer Centre paika ya lapokyonga aor? Ya nüburtem onsara nungtepa aoba agi (demand) tali tali lapoka aor asü, mesüra Tanela Temeshi lenisüba mesüra ajungshiba ajanga lapoker, mesüra iba ya sen aahtsü (lucrative industry) ka akümer? Sarasadem tesep lapokba aser inyakyim ya alima aika nung mesüktepa angutsü, tongmelang agi Neo-Pentecostal movement tsütsü nungi inyakyim kar asen lima sarasadem tesep den medemdanga zülusemer.

• Prayer centre ya tebilemtsü khuret pongtokdak (problem solving centre) ka ama lir, aser sarasadem tesep kibur aser counsellor-temji tebilemtsü khuret taneptsürtem (problem solver) amai lir. Sarasadem tesep nung counsellor-temji nisung aser Tsüngrem tsüngta o tongdar ama (spokesperson) inyaker. Nüburtemia sarasadem tesepi arubaji tanelai kechi ashir ibaji tangsa tang metetnüa asüngdangyar, aser Tsüngremer tetuyuba aser telangzüba kechi metetnüa arur.

• Prayer centre nung inyakertemji külen tia ashir ama, akhi Khristan yimli marudang Arasentsür dangi tia asüngdangi aoba yimya mesükba ka Sarasadem Tesep nung inyakdaki. Iba inyakyim ya traditional primal religion yimsü nung aliba to revive asür asü ta talisa temesüng nisungtemi (western churches) tang sashia research agidaki. Is it a revival of primal religious traditions which was suppressed by Christianity or part of Indigenous contextual Christian practice? Mesüra iba yimya ya tribal Christian tamangba yimya ka, asen context nung adoker? Inyakyim nungji temezünger arasentsür mapa den khen ashitsü nungbo mesükteper amai. Saka Tsüngrem tanela temeshi tenüng nung inyaker ta kuli lirji iba ya Tsüngremer sayatenya mapa ta nüburtemi nanga agizüker.

• Tsüngrem nungi sayatenya inyaktsü imlaa sarasademer. (Bible in hand and the miracle on the other). Tarutsü ataloktsü alibatem shiner aser tesüiba nung kechi asü iba indangjia ashitsü akoker. Anungji sarasadem tesep kiburji Tsüngrem amai kümdaktsür aser tushir. Arogo nung Pastor dangi mo-i Prayer Centre bushia nisung aika tia metettsü aser taneptsü bushia sendener.

• Prayer Centre nungji lumia hopta ka mesüra ana-asem, ita junga kar asoshibo lumitsü akanger. Lumiba ajanga Tanela Temeshi-i taküm nung mapa inyakba metettsü, lumia sarasademba ajanga taküm merükteta meshiteta sarasademer, mojing aser temenen tanela ajak aritokdaktsür. Anungji sarasadem tesep ki bushia lumia sarasademtsü asoshi aor.

• Prayer Centre nung ya sarasadem dang masü saka Bible study aser tekülem sentep-a dena agir. Anungji iba ya tenla kidang tekülem agiba yimya mesüka inyaker.

• Prayer centre nungji theological perspective ana amshiba angutsü: (i) theology of prosperity, (ii) theology of intervention. Tanela temeshi ain dak ajemdaker iba tashi ajanga timtem ajakji nokdangtsü akoker ta sashi sashia tanela tetuyuba agütsür. Prayer centre nung inyaker kibur aser counsellor-temji interventionist, Tsüngrem ama kümdaktsür, miracle performer-tem ama tushir. Anungji yamala telungjemji arogo tekülem sentep dang nungi kanga agi tesapuba akümer. Ano Tsüngrem dang meranga rongsen tenlara iba yari Tsüngrem nungi ali rongsen temoatsü tali züindaktsür ta asüba tesayuba sashia sayur. Ibaji sarasadem tesep nung dang masü saka arogo tesayuba nunga lir. Ibayongji ochi shia bendenba, ochi meshi-i bendenba ajak nungi asen nisungi meranga tenla abener. Nüburtemi tenla magütsü nungbo koda sür sarasadem tesep yamai aotsü?

• Sarasadem tesep kiburtemji züngdangyonga ora tetsüri lapokba teimba lir. Tanga bendanglima nunga sarasadem tesep kiburtemji tetsür teimba angutsü. Iba yagi arogo asoshi kechi tetuyuba agütsür? Arogo inyakyim yayim (structure) nung tetsürtem sadema meinyaktetba tuyur, arogotsür rongnung dangashi arogo yinti nung ano tetsürtem sadema meinyakteter. Anungji prayer centre nungji tetsür-tebur ajaki külemi pei akokba yari shilem agitsü lemang lapoktsür. Iba yagi arogo lenisüba nung tetsürtem nem tim shilem (leadership and partnership ministry) magütsüba tebilemtsü tuyur asü?

• Ano sarasadem tesep ki nungji kibur dang masü, saka counsellor-temji teimba ka theology mazüng, general education-a junga manguba rogo aika lir. Saka tanela sempet aka nungji (Qualification) parnok yamala centre nungji tenzüker. Takar, tulur, sensaker, tilar ajaki parnok tsüngdangi aor, aser sarasademdaktsür, Bible study aser counselling agütsür. Iba nungji Lai ratet aser tesayuba agütsüba nungji timtem aiben adoktsü akok, kechiba sȕra Lai ratetba nungji tanela lenisȕba denji Laishiba tapak angateta azȕngtsȕbaji tongtibang lir.

• Ashiko sarasadem tesep ya kar asoshi employment angudak ka asütsü akok. Amanger, ajaki Tsüngrem tanela tetuyuba nung centre lapoker ta kuli tejangja agütsütsü südi, saka jungjunga shisadangra iba ya industry ka, self employment amai mekümdangra asen lima nung lapoka aotsü. Theological college lapokbaji fashion ka ama khen mapang ka nung lapokogo aser tang prayer centre lapoka aor.

Prayer Centre aser Arogo

Arogo aser prayer centre tesentaktep kechi lir? Sarasadem tesep yagi arogo inyakyim nung jangjonger asü? Arogo aser Sarasadem Tesep tesentaktep nung timtem kar adoka ali asü? Mesüra arogo dang nungi parnoki ministry tajungba bener aor asü? Arogo asoshi sarasadem tesep ya teyarir tajung ka amai, arogo teinyaktsü aika parnoki inyakatoker asünungji arogo mapa pongpa kümdaktsür asü? Amanger tang tashi nungbo kecha telemsatep, tejashitep aser tashishitep malitsü südi. Saka kechiba külem arogo züngsemi arogo toktsür yamai fellowship tenzüka aor ta aiben bilemer. Arogotemi tenzükba wadang khen süoki ia bilemdangtsü mapang tonga aitogo. Ao lima nung arogotem kanga dang institutionalized süatoker, secular office ama dang küma odaki. Arogo ya kechi atema alir? Tsüngrem tenzükba tetezü khen lepa reprangshitsü mapang tongogo. Nüburtem asoshi tanela chiyungtsu prayer centre nungjiang angur asü?

Sarasadem Tesep Den Sentakba Nung Temelenshitsü Kar

Yangi sarasadem tesep nung temelenshitsü ta asüdang, iba nung ya sarasadem tesep aser arogo anaprongla nung inyakyim melenshitsü nüngdaker ta ajiteter. Anungji yangi yamai asünung jungdisü ta kü tebilemba kar lemsateper.

Prayer Centre Arogo kübok aita achayangtsüla: Prayer Centre ya local arogo kübok yutet nungbo tajungtiba asütsü amai bilemer. Iba ya arogo nung ministry tongtibang ka küma nüburtem tanela nung tsüratemdaktsü nungbo tajungtiba asütsü. Shitakba agi prayer centre-i inyakya aliba ya arogoi inyaktsüba mapa lir ta angatetdi. Mesüra Mungdang küboki anioka, guidance teperi agüja anepalu nunga ajungtsü asü ta bilemer. Arogo aika nung prayer mountain, prayer room, ta nüburtem sarasademtsü lapoka yuja lir. Yamalaji mesüka arogoi sarasademtsü tesem lapoktsütsüla. Iba jagi jentipur ajangzüktettsü aser tanela ain akettertema pei sempet amshitsü lemang sadema angur.

Yamai pei pei jurila fellowship tenzüka modaktsüi, arogoi tanela sempet akartem, aser sarasadem nung tejangrartem ya telong junga anitener amshitsüla. Parnok nem guidance peria agütsütsüla. Ashiko sarasadem tesep lapoka aoba ya arogo nung sadema shilem magitetba ajanga asütsü akok. Pastoral ministry nung asentenshi nüngdaker: Prayer centre tenzüka aoba ya arogo nung pastoral ministry nung tashi mait akümba tamaitsü ka asütsü akok. Arogo ya nüburtem asoshi alir ta metetdi. Nüburtem tanela aser shi nung ajungmesotsü, ajungshitsü, metongshitsütsü, anepalutsü aser achayangtsü, aser Tsüngrem o nung tera yanga anitettsü asoshi alir. Mungdang aser local arogo anaprongla nung nüburtem, talisa maka maitertem, anepalutsüba ya tera senzüka aor amai nibo ajiteter. Tenzüker kwikadi pei santem timtem tia meteta lir? Asenok arogo nung toklang tenzükertem küm tepiyong program achayangba nung mapang teimba ka intoker. Ministry ya kanga mejungi institutionalized süatokogo. Hau, arogoji Institution ka lir, saka ibaji rigid institution küma ora nübur taginübaji mabensatettsütsü akok. Arogo nung temzüngji nüngdak tiptema aotsü asoshi saka ozüng nungji onsara ora ministry nung aiben tetsükdak adoker. A. P. Nirmal, India nung theologian nungtugu kadi India nung pastoral ministry indang yamai shia lir “pastors are functioning like pujaris, caretakers and chowkidars of the mission compound and church traditions and neglect the essence of pastoral ministry”. Ochi shia dang ashir pastor aika kiboksem nung tashi mait, aser ibaji nüburtemi teti mepelai jembir. Pastor dangi sarasademjang ta arutsübaji aiben arendaka bilemer kechiaser parnokji kanga dang mazüngi aliba nisungtem lir, saka prayer centre-ibo mapang mashi ka nung oteter. Asenoki metetdi, pastoral ministry ya 24 hours a day and 7 days a week. Tetezü, tenzüker kaji nübur asoshi teti azünga aliba, yarinüa aliba nübu ka asütsüla. Tanü tensa den putepa, nüburi aginüba ama ministry issue based nung yanglushitsüla. Tanü Mungdang staff-tema akhi ama arogo sema jajaba ajema kümogo, arogotemi aobaji teimba ka local arogoi sentong nung ajadang aoba lir. Yamai dang aonungbo Mungdang nung tenzükeri local arogo tia memeteti akümtsü akok. Mungdang nung tenzükertema nüburi aginütsüsa aser shisatsü agütsütettsüsa alitsüla. Iba denji Mungdang nung tenyaba mapa nung putu den apet inyaktsü asentenshi kanga nüngdaka kümogo.

Sarasadem teloki arogoi inyakba mapa duplicate masütsüla: Tajungtibaji arogo kübok sarasadem tesep alitsüla. Saka yamai dang independent süa aotsü asünungbo aser sarasademtsü asoshi lapokba süra iba sarasadem nungji nendak nendaka sarasadem tesep-temi inyaktsüla. Arogo aser Mungdangi inyakba mapa kasaji meinyaktsüla. Angashiba agi centre aika nung Bible study, tekülem sentep aser training agȕtsür ta angazüker. Pei teinyaktsü arrtsü meteta inyaktsüla.

Arogo nung lenisüba inyakyim (leadership structure) melenshitsüla: Kechiba sarasadem tesep aika akümer? Prayer centre nung kechiba tetsür teimba kibur asür? Counsellortem teimba ka lay people nungi adoker? Iba yagi arogo nung lenisüba aser arogo inyakyim sayur asür ta metetdi. Iba ya structural and leadership crisis den sentaktepa lir. Asenok Baptist tamendakdak kimongji, Priesthood of all believers lir. Saka iba ya noklang nung noklangbo asenoki tang tashi meinyaktetter. Arogo nung class telemsa – takar-sensaker, tulur-tilar tebendang kanga lir.

Sensakertem lemteplemra nung anasai maruteter, tekülem nung shilem agitsü peria mangur. Tetsür-tebur tebendang inyakyim nung ulura lir. Ao arogo nung tetsürtem arogo inyakyim nung sadema aita mali. Kodasür tetsür ta bilemba mulungsentsü ano temulungjang nungi metugui lir. Prayer Centre nung free süa shilem agitsü mapang angur. Tang ABAM teinyakdak inyakyim nung ya women department aser Christian education dak alaka tetsürtem inyaktsü kokteta lenmang lapokja lir. Zülu nung tebur dang agitsü ta mali saka tanga department nungjibo tang tashi tebur dang inyaka arudaki. Anungji leadership structure nungji temelenshi tajung marura, ashiko tangbo prayer centre dang lapoka aorako, saka tarutsü nungbo arogo balala pakzüka aotsü ana nung lir. Tanü prayer centre ya arogo nung leadership crisis temaitsü ka lir ta nibo bilemer. Iba tamaitsü ya lendong ka ta meteta arogoi meinyakra, tarutsü nung tebilemtsü adoktsü ta metetdi.

Olepzüng

Iba ocet nung sarasadem tesep aser tang arogo teinyakdak yimya anaprongla repa züluogo. Ibai asen lima nung tongtibang tebilemtsü ka lir ta metetdi. Ajak ajungtsü mechi ajaki külemi shisatsü agüja arogo aser sarasadem tesep anaprongla yaritepa aotsü mapang tongogo. Süra tangatetep nung külemi Khristar tenzükba wadang bener aotsü. Anapronglai Tsüngrem mapa inyaker, nüburtem tajungtiba nung yaritsü meranger. Anungji sarasadem tesep aser arogo tesentaktep tajung alitsü nüngdaker.

*****