MLA & Advisor to Water Resources Department, Government of Nagaland, Tongpang Ozüküm-i Oct 31st, 2024 nü Phangsang nung ‘PWD Rest House’ ka lapoktsüogo. Iba kiji Phangsang Pastor, L. Tochi-i meshitettsü. Iba ki asütsü asoshi Phangsang nung alir Imkongsadang-i kimung angati tenla.

                MLA & Advisor, Tongpangi iba ki lapokja jembidang, sarkari nüngdakba ki yangera yutsüogo, anungji, ibai tajangzük akatsüsa nüburtemi timi ketdangsüa pei meyong ama meima amshidaktsünür, ta mepishia metetdaktsü.

Tesüiba mapang asen tsüraburtemi Phangsang area renloktsü asoshi kanga meranga inyakba otsü tajung lir, saka aji süiren otsü ka dang kümogo, anungji, “joko Phangsang area aintsü asoshi ni anir tanü lenirtem kwika lir, asenok khuret asütsüla”, ta ashi. “Tesüiba otsü dang jembira asenok tejakleni maotsü”, ta paisa shisem.

                Tanü amai ali tenlara tarutsü nunga terenlok mapa balala bener arua inyaktsü merangtsü, ta paisa ali tenlar Imkongsadang dang pelaba lemsatep.

                Phangsang nung Govt. High School tia indang khuret süa lemsatepdang, yangi tazünger melira iba school ya jenjang ajemzüktsü kecha temenu maka, anungji, asenok ajak senteper iba school ya wazüka ayutsü aser ibai tejakleni bener aotsü temulung agütsütsü asoshi paisa ajungshia liasü.

Tanü Nagaland nung government school onsara, saka tazünger mali küma aor, iba den tanga district-tem den medemdangra Mokokchung district ya-a tesayur nüngdakba dang nungi teimba aliba district rongnung züngsema lir, anungji, tia tamajungbai maitsü asoshi tekümdangtsü olen ka paisa lemsatep.

                Sangküm 2025 March nungji Phangsang nung tesayur atema ki ana (2) sütsütsü, ta pai metetdaktsüogo. Phangsang area renloktsü atema inyaka arudar aser ano maneni inyaktsü sentong lir, anungji, nüburtem nungi amalitep aser tenungitba nüngdaker, ta paisa mepishia ashi.

                PMGSY sentong kübok yim o yim sentaktepba lenmang kar yakta tenzüktsüba lir, PMGSY ya tanga mapatong ama masü yangibo temenok kecha magütsür, aji oda, ali magütsüra asenok takoksa asütsü, aser iba lenmang ya technology tasen amshia inyaktsüba lir, anungji, ali kiburtemi aser yimden tawabangba nung iba lenmang tajungtiba yanglutettsü asenok ajak khuret südi, ta paisa ayongzük.

Iba rest house ya 2023 June ita asü tenzükba June 2024 nung tembang. Iba mapa ya M/S Alemthy Jr. nem lakh 54 (estimated cost) agüja südaktsü. Iba ki nung taktang 6 lir – VIP taktang 2, tetsür aser tebur atema taktang kaka, kitchen ka, dinning aser reception ta lir, ta executive engineer, PWD (H) Mokokchung, Er. Nungsang Jamir-i ki asüba osang lemsatepdang metetdaktsü. Iba ki ya tongtibangsa PWD aser tanga dept nungi ketdangsür/staff-tem duty senzüba mapang anisüngzüktsü nükjidong nung asüba lir. Iba ki ya public nüngdakba nunga amshitettsü akok, ta paisa shisem. Paisa PWD (Housing & Mechanical) Minister, P. Beshangmongba-i bener yokba shiti ka telok dang zünga metetdaktsü.

                Sentong nung Phangsang Area Telongjem tir, A. Lipok Jamir-i tarurtem pela-a agizük, Phangsang Vice Chairman, Imtizulu aser EAC Sangpangchang Longkumer nadi tepela o tatsütsü lemsatep. Imtiyanger Imsong, S.O. PWD (Housing) Mokokchung iba sentong nung menden liasü.