~ Mapula Lemtor & Wati Longchar

YSS ya züngsem 372 akümba sabang ka aser yangi arogo aser lokti tebilemtsü mapang shia sensaksem akar. Nov 1-2 tashi, “ABAM aser Arogo nung Tetsür nem tokolak menden agütsütsü mapang tongogo” ta onük nung ajemdaker sensaksem aka. Tanü shirnoksa lenisüba menden nung lir parnok maneni decision-making nung yarisemtsü asoshi sensaksem tebhong küma zülur lemsateper.

Iba ocet azüngdang ya meteta lidaktsünür. Sabangpur kari joko arogo nung toklang tenzüker shimba yimya ya melenshitsüla, guideline tajung ka nüngdak. Joko theological study yaa general study amai dang küma odar aser Aor theology azünger 6000 tema akümer aser tang tezüngdak 1000 tema lir. Bendanga agütsüba aser nendaka azüngba pur shima arogo anitaktsütsü mapangi tongogo. Tang amai yim, tzükong, kidong hisab nung dang tenzüker politics saia shimtep nungbo majungtsü. Arogo kar nungbo toklang tenzüker “Chief Guest” amai sentepi khenkhen dang aruba jenjang nung lir, aser item lenisüba kübok arogo kodanga maintsü aser ochimashi mapa aika adoktsü. Mungdang nunga tetsür tebur ta telemsa makai temsüa alir nembo tokolak menden agütsütsüla. “Conflict of interest” mali taintemi achayanga sensaksem ka aka nungbo ajungtsü ta ajungshi nung, ibai arok tebilemtsü ka ta bilema sensaksem onük  benoka jembiba  tebhong küma zülur lemsateper. Iba ocet shinga anema mesüra puküma zülu amai mangatetdaktsünür.

Iba onük tesademba aser tarokba jembitsü asoshi Wati Longchar, YSS Admin, temalen ashiba onük nung ocet ka zülua, tanü arogo aser lokti nung patriarchy ajanga tetsür lenisüba nungi jentokba ratettsüba den tanü alima jenjang koda melenshia aor, alima balala nung tetsür tokolak sür aoba zülua lemsatep aser iba ocet dakji ajemdaker sensaksem tenzük. Telok balala nung sensaksem akatsü atema ‘Nokinketer’ sabang Admin-i “Asen Ao Lima Asoshi” aser “Nokinketer” sabang, aser telok balala sabang nung prokshia inoktsü. Tir Yimyim aser Ao Milen nunga adoktsütsü agütsü. Sabang balala nung tebilemba lemsaba forward sütepa kanga dang constructive discussion den temetongshiba aser matongba ratetshia sensaksem agia temoatsü lemsatep.  

 Iba sensaksem mapang Aotsür pongui Dr. Bendanglemla Longkumer, Dr. Shiluyinla Jamir, Dr. Imnabenla Jamir, Dr. Lanusenla Longkumer aser Mrs. Maryangla Pongen-i international level nung o jembiba aser mapa ngutetba indang lemsatepa tenüngsang agütsütep.

Sensaksem telok balala nungi nisung 300 temai telangzüba arua liasü, saka tongmelang agi item olung ishika dang agiteta lemsateper:

(1) Mungdang nung Executive Secretary, Secretary menden balala, arogo nung Pastor shimba nung tetsür-tebur telemsa

(2) Male chauvinistic attitude melenshi nung dang lokti aintsü

(3) Kobala experience asüba Executive Secretary shimtsüla? mesüra kobala criteria nung ajemdaker shimtsüla?

(4) Shimba yimya koba melenshitsü? Koma inyak nung ajungtsü? – item olung dang lemsar.

Sabangpur ajaki Ao lokti nung ABAM Executive Secretary yaa kanga dang tongtibang mapa ka, aser arogo tsütsü nungbo Executive Secretary ya “Face of Ao churches”, “Face of Ao community”, anungji, Tsungrem metetba, ajemalu, lim arogo jenjang metetba, national aser international level tashi nung shilem agitettsüsa tekümküm, teyakyak lenir ka nüngdak ta ajaki lemsatep. Tetezü, Executive Secretary menden ya lim arogo sema Revival agüja senzütsüba mapa dangbo masü aser yamaji meimlatsüla.  Executive Secretary ya administration mapa ka. Tashikari inyaktsüba mapa ka. Tzüzüng ozüng metetba, külem tenzüker den team work inyaktetba lenir ka nüngdak. Aor kisüng  alir masüji  Naga lima, India aser alima tesem balala telok tentet tatsük-talem metetba aser ainkar ochi ola adoktetba, Tsüngrem o alima temelenshi  den putepa ratetba, aser organization den sentaktepa inyaktetba, lanurtem lenmang balala nung ajungshia aser lenmang tasen sayutetba lenir ka nüngdak ta nenshia aikadi shisem. Meimchir dang asünung item qualifications ajakbo malitsü, saka item qualification ji repranger shimtsü lemsatep.

Mungdang nung Executive Secretary aser Secretary menden balala, Pastor, aser Deacon ya teburi dang Ao arogotem nung inyaka arur. Ya Lai tesayuba masü, aser Baptist distinctive nunga teburi dang inyaktsü ta ashia mali. Ya patriarchal culture (tebur yimli hisab nung arogo yimden yanglu)  inyakyim ka dang lir.  Iba patriarchal culture ajanga tetsür toloklak menden ta süra makoktsü, metemsü amai bilemer. Saka tanü secular mapa balala nung melenshiogo. Ibai lokti temenen (social sin) ka aser melenshitsüla. Iba patriarchal culture ajanga arogo nunga tetsür Pastor shimtsü ashishir, Mungdang nung President shimtsü ashishir (kodanga tetsür meshimdang), tetsür telok Secretary dak alak tanga Secretary post yabo tebur indang dang amai bilemer.  Tetsür-tebur mali Tsüngrem mapa nungbo shimtsüla ta jembir, saka mapaibo mesayuteter. Ya melenshitsüla. Tsüngrem tenzüktsü tajaba tejangja den sempet aka, experience aka pa/laji shimtsüla ta tangatetba tajung lemsatep.

Tekolak menden ta süra teburi sensena/rataa bilemtsüba. Kodang telok menden ta südir risk aika lir, aser ibala timtem aketba mapajibo tetsür nembo meinyaktsünüi sensena bilemtsüba (tajung amai saka majung) tebur mulungsentsü nung aliba ajanga kodang tokolak ta südir `Tebur’ asoshi ta dang bilemer. Yamaji putu aika nungi Ao lima benshia aru. Ya headhunting culture nungi adok. Tatishitsü ka: Sabangpur kadi yamai sensena bilemtsüba olen ka zülu “… aiben practical inyakdang physical nung anibelem tulu lir aser tensa kar nungbo serious risk agia inyaktsüsa tensa agi  ajurutsü lir. Iba mapang ama nungji teburi inyaktetba ama physically tetsür jagi meinyaktettsü.” Sabang Admin-i,  iba oren ya patriarchal mindset tajung ka, aser tetsür atema sensena bilemtsüba dangji  “male chauvinism” ta ajar ta melentsü.  Ibai  headhunting context peta liasü, saka tanü Cyber-AI world nung alir. Alima tesem balala nung tetsürtemi tebur den saku – rara, economic development, airplane, ita tashi atur nung koda… Admin den semloka tanü putu nung tetsür-tebur saku takok ngua inyakba lemsatep. Tetsüri tsübua mebilemer nung kechiba teburi rata-a bilemtsür ta lemsatep. Iba male chauvinistic mindset, patriarchal mindset nungi joko adoktsü nüngdak ta ajungshitep.

Executive Secretary experience – Kechi mapa südir süang, experience ya kanga tongtibang. Ao arogotem nung inyaktsüba asünungji Ao arogo tatsük-talem metetba, tetezü arogo nung inyakdanger ka shimtsüla. Theological teacher aser NGOs nung inyaker shimba agi arogo tashitak memeteter ta shisemba onük ka nung talangka atsütepa jembi. Pastor mapa inyak nung dang arogo tia metettsü ta tangatetba ya kanga ilara kechiaser tenzükba mapa balala aika lir.  Theological College, Bible School, Missionary mapa, Christian literature mapa, Christian NGOs balala, ano aika, ajak ya tenzükba wadang. Arogo jenjang metettsübaji nisung nisung dak aket. Ashiko pastor karibo pei arogo jenjang memetet, administration memetet alitsü nung koda? Executive Secretary kaji lim arogo kisüng khuret metetba jagi mepirir. Mapa balala nung amokdang inyakba nüngdak. NGOs balala nung inyakeri dang tanü lokti kechi temelenshi nüngdak aji meteter ka karibo shisem, kari national and international level nung committee balala nung adenba aser jembiba agidang alima koda aor aji meteter ta lemsatep. Anungji  arogo nung tenzükba mapa balala metetba, inyakyim metetba,  timtem metetba nübu ka nüngdak ta jangjashitep.

Arogo nung tenzüker shimba yimya – Mapa inyaktsü Baptist, Methodist arogo amala nung “calling system” ya amshir. Tetezü theology zünger külen mapa bushia maor, saka arogoi tazüngerji bushia aor/arutsü atar. Application, interview, probationary system mali, transfer mali, nisung karbo retire süa  kasa mapa aser jaka nung dang inyaker. Lemang ka nung junger, saka nübur aika temoatsü mangur aser kokra iba yayim melenshitsüla aser akangshia yanglushitsü mapang ta lemsatep. Arogo tenzüker shimba nunga Professional süa inyaktsüla. “Search Committee (SC)” shimba tetezü nübu bushitsüba/ayimtsüba. Tanga arogo aser organization aika nung level asem-pezü tashi inyaker:

(a) Criteria yanglur Post Advertise asütsü aser application bendentsü. Candidate shia nükjidong züludaktsütsü, confidential reference nisung asem nungi meshitsü. Application ajakji bendener SC-i screen sür, candidate tajungtiba asem-pezü ka interview ajatsü.

(b) Search Committee asünung parnoki nisung item yagi inyak nung ajungtsü ta bilemba/ajitetba nübu dangia oa asüngdangtsü. Iba sülen candidate tenüng appointing body nem agütsütsü. Saka appointment ajak küm ka lir külenang regularize asütsü. Yamaji tanga arogo nung inyakba ama inyakdang nung, tenzüker shimba nung temelenshi adoktsü südi ta lemsatep. Ano iba sentakba nung arogo nung pastor transfer system, co-pastor system, ano aika taoba mapang YSS nung jembiogo.

Iba sensaksem yagi arogo kar danga temoatsü ngudaktsür ali nungbo iba jagi teperi. Tsüngremi moajang.
*****