(Watsü Mungdangi Nagaland Governor dangi takangba ka agütsüogo)

Facebook sabang tenüng agi, “Patriotic Nagas” ta sür ka nung kari Aotsür rangben tiluja aser Padma Bhushan Dr. S. C Jamir anema mezüngmeshia züluba dak sentakba nung tejashiba sayua 27th November, 2024 nü Watsü Mungdang-i ola madok yimdong süa jajaba sentong ka ayongzüka liogo.

                Tanep Aor Kilem nung adenshia yangji sentong ka agir külen iba nungjagi Mokokchung Deputy Commissioner office tashi yimdong süa or Nagaland Governor dangi takangba zülu (memorandum) ka Mokokchung DC, Thsuvisie Phoji nem amoktsü. Watsü Mungdang lennirtemi iba zülu Mokokchung DC, nem agütsüdang, pai (T. Phoji-i) iba züluji tanüsa Nagaland Raj Bhavan tongtsütsü ta metetdaktsü.

                WM-i züluba nung shia aliba agi, Facebook telok “Patriotic Nagas” nung Aotsür rangben tiluja aser Padma Bhushan Dr. S.C Jamir tenüng menüktsüba dak sentakba anema Ao Senden-i 13th November, 2024 nü Nagaland DGP, Rupin Sharma IPS ajurua teinyaktsü tim inyakogo, aser Dimapur Ao Youth Organization (DAYO)-ia iba mapa anema Cyber Crime Police Station, PHQ, Kohima nung FIR agütsüogo, saka tanü tashi terenlokba kecha mangur. Anungji, iba dak sentakba kenoji reprangdaktsünür aser aibelenerji aputsüla, ta WM Tir, S. Arenla Longkumer aser Tezülur, Sungtireben nadi governor dangi mepishia züluogo.

                Banner nung “Patriotic Nagas (Facebook)-i Aotsür aser Padma Bhushan Dr. S.C Jamir tilutsüba anema onoki yakta action agitsü akanger” ta zülua bener nisung shia teka nung sü tanak agi mesür (sü tanak mesüba tetezü mepelar aser mulungku sayuba tamaitsü lir) Aor Kilem nungi Mokokchung DC office tashi ola madoki jajayonga or takangba züluji Mokokchung DC nem agütsü. Kasa züluji Nagaland CM, Dy. CM, Ao legislators, Chief Secretary, Nagaland DGP, Mokokchung DC & SP, Ao Senden, Central Naga Women Association aser Dimapur Ao Youth Organization (DAYO) dangia yokogo, ta WM ketdangpurisa metetdaktsü.

                Aotsür aser Padma Bhushan Dr. S.C Jamir tilutsüba anema Headquarter – Mokokchung nung dang masü Nagaland aser India lima tesem balala den bendang lima tashi nung lungkak aitba sentong ayonga agiba WM ketdangpurtemisa metetdaktsü.

                “Aotsürji masüngtet ta luja aser asen lenir Dr. S.C Jamir anema züluba dak sentakba nung Ao Senden-i anir telok balalai ola adokogo, saka tanü tashi kecha telangzüba maka. Iba ama Aotsür/Aor sensaja aser mezüngmeshiba yabo odang ajemajema kazütsüla masü ta tejashiba sayua tanü iba sentong ayongogo”, ta WM tiri metetdaktsü.

“Tanü Nagaland Governor dangi takangba ka agütsür, iba sülen telangzüba kecha melira mapang nung tanabuba meraji agitsü”, ta laisa renema alitsü asoshi olen ka metetdaktsü.

                Iba sentong nung Ao Senden tir, Marsanen Imsong-i jembidang, tanü koba Facebook telok “Patriotic Nagas” ta sür kadi Aotsür rangben sensaja Ao kin dang tetuyuba agüja aser asen lenir Dr. S.C Jamir mezüngmeshibaji Ao kini maremer, ta metetdaktsü.

                Nov 4, 2024 nü iba osang ya media balala ajanga angu aser Ao Senden-i iba FB group Admin dang iba ya shibai zülu anogo tenet (7) tsüngta tenüng agüjang ta sangdong, saka iba FB telokjiang shibang aser nisungbo magütsü. Anungji, tanabuba meraji Nagaland DGP, Rupin Sharma IPS ajurua tim nüngdakba inyakogo. Iba maparen dak sentakba nung WM, AKM, CNTC, CNWA, DAYO aser lokti balala shirnokisa ola adokogo, parnok ajak dang AS tirisa pelaba lemsatep.

                Tenüngbo “Patriotic Nagas” saka kin ka rangben ajemshiba dang “Patriotic Nagas” ta majar, item dangji “Anti-Nagas (Naga nunger anemer)” ta ajar, ta paisa ashi. Naga nüchiso bushiba nung Ao kin nungi mezüngbuba tir, T. Aliba Imti lenir sür tenzük, tanüa Aor aika lir aser inyaka aruogo. Anungji, “Patriotic Nagas ji nüchiso bushir telok asü, kechi telok memetet, saka kodang putetdir, Aor sobaliba dak ajemdaker tim mera agitsü”, Ao Senden-i lemteta lir, ta AS tirisa shisem.

                “Tiyazü kuli amer shibai/shirnoki o agi süshia mesüra mapa agi süshia Ao kin mezüngmeshidir, Ao kini tatok magütsütsü”, ta Ao Senden tirisa ayimoktsü. Tanü koba WM-i governor dangi takangba züluogo, iba ya Aotsür/Aor ajaki züluba lir, ta paisa ashi. Ibai tekaratiba nung tatembang kadi arua asen temeten wazüka ayutsü imlar, ta paisa shisem.

*****