(IMDH mozüki tasenba block ‘A’ renemtsü atema Cr. 3 aser CCU atema Cr. 2 agütsütsü)
Nov 20, 2024 nü Nagaland Health and Family Welfare Minister, P. Paiwang Konyak-i Dr. Imkongliba Memorial District Hospital (IMDH) Mokokchung den Sabangya (Chungtia) nung tang tesüdak Ayush Hospital aser Mokokchung nung angoh aser mozü ayokdak (pharmacy) tesem kar semdanga liasü.
Tesem balala sema jajar külen IMDH conference hall nung mensem ka akadang, Minister Paiwang-i jembidang, IMDH nung inyaker doctor, nurse aser staff-tem pei tata mapa shitak inyaker-meinyaker, tang teinyakdak sorkar kisüjensü mapatongtem koda aor, nübur anema aliba tsütsü shih-angoh shitak ayoker-mayoker, mozü ayokdak ozüngi memelaba mozümora ayoker-mayoker mesüra pharmacy nung amentsüpur shitakba amener asü-masü, mesüra dokan nung foreign chiyungtsü temelaba makai ayokba, itemji meita reprangtsü atema yangi aruba lir, ta metetdaktsü.
Angoh ayokdak tesem kar semdangogo aser item angoh nungji miim aketba mozümora ali-mali tetendangba agitsü aser mozümora inoker yoka lira tapet mera agia merenshitsü mesüra item chiyungtsütemji shibangtsütsü, ta ashi.
Pai Sabangya nung tang tesüdak Ayush Hospital semdanga liasü, yangji gari lenmang aser tajemtsü tzü aser electric light tebilemtsü atema khuret süa lemsatep. Tang koba IMDH mozüki tuluba küma yangludar, Block ‘A’ tekaratiba nung renemtsü asoshi sen crore 3 (three) agütsütsü, ta metetdaktsüogo.
Iba den külemi paisa IMDH nung tang tesüdak Critical Care Unit (CCU) tekaratiba nung renemtsü asoshi crore 2 agütsütsü, ta shiogo. Ano nurse hotel nung koba tzü agi timtemer ibajia tekaratiba nung reprangtsütsü, ta paisa ashi.
Nagaland nung doctor kanga ajema lir, doctor noklang dak tema nüngdaker. Covid-19 mapang doctor shirnok shima liasü, parnoki alima koda masüba lendong tulu mapang bendanga tenzükogo, anungji, parnok atema ‘special recruitment’ ka agitsü sarkar sentong liasü. Saka doctor kari okadak abenba ajanga ibaji khen thitema lir. Iba ajanga asenok tang timtemer saka kopi malii okadak kenoji temdir special recruitment ji agitsü, ta Minister-isa shiogo. “Koda masüba mapang parnoki taküm bendanga agütsüogo, anungji, nüburtemi aji mamatoktsüla”, ta paisa shisem.
Department nung tang doctor-tem mapa tazüng kar lir, iba dak sentakba nung tatidang tapu ana küma lemsar agitsü sentong lir, ibaji ‘specialist’ aser ‘non-specialist’. Iba asayameyangji sarkari agizükra, mapa tazüng atemaji tatidang yakta agitsü, ta paisa ashi. MBBS renemertemji state sarkari agitsü ta MBBS kaketshirtem den sarkari tezülutepba yanglua lir, anungji, M.O agibo manüngtsü saka specialist atema tebilemtsü lir aser tang nüngdakbaji ‘specialist doctor’ lir, ta paisa shisem. Ita ishika tsüngta Nagaland nung specialist doctor aika mapa nungi sodi angutsü lir, aji oda, mozüki aika nung specialist malitsü, ta paisa khuret kar lemsatep.
Iba senden nung Ao Senden lenirtemi Minister Paiwang dang tang tesüdak IMDH ki tasenba ya tekaratiba nung talangka amshitettsüsa kanga junga yangludaktsünür aser IMDH nungi taoba ita ishika jakdang doctor pezü transfer aoba atema tekaraba nung temelen yokdaktsünür, ta mepishia metetdaktsü. Minister Paiwang Konyak den par department nungi sarkar tongtipurtem aika anitaka jajadaki. Par telokisa CMO aser IMDH staff-tem den jurila senden ka mena sarkar sentong dak sentakba nung shisa lemsatepa liasü. Nov 21 anepdang Ministerbar telok ya Tuensangi aitsü aser iba sülen ano tanga district kar sema jajatsü sentong lir.
*****
The Nokinketer 