Küm 8 shi Süngkotenem Beat Contest mekateti arur, tanaben asendenshia sangküm January 10, 2025, nü akatsü lemtetogo, ta tayongertemi osang ka ajanga metetdaktsüogo. Iba sentong ya 2001 küm tenzük, aser iba ya Nagaland musician-tem pei sempet arangshidak sabang tajung ka liasüba tanaben asendenshia ayonger.

Iba sentong ya 2016 tashi agia liasü, aser Covid-19 wara ajanga khenpika mayongteti athi. Iba sentong taoba mapang dang nungi tajungba nung shilua arua ayongtsü tayongertem tejangraba tulu lir.

2025 Süngkotenem Beat Contest nung senpet sen ajak senteper ₹1.5 lakh alitsü. Takoker nem sen ₹80,000 aser atongdakba nem ₹50,000 agütsütsü. Iba den ano alakteta sempet alirtem nem juri senpet agütsütsü tayongertem sentong lir.

Iba sentong ya Mopungchuket yimdak akatsü. Iba beat contest ya tetoktepba ka dangbo masü; ibai lanu asensor kentenmenü jangrar nem pei sempet arangshitsü asoshi sabang lapokja ajungshiba maparen ka lir. Iba sentong nung Nagaland nungi band balalai arua shilem agitsü imlar.

Tejangrartemi item dokantem nungi form agizüktsü akok; (1) Food Crate Arkong Ward, Mokokchung, (2) Biryani Corner, Alongmen Ward, Mokokchung aser (3) Urban Hub Café, Dilong Ward, Mokokchung. Iba dak sentakba nung osang tejangja metetnürtemi iba phone number – 8837051223/8794269121 ajanga tayongertem tongtettsü.

*****