Union Minister of State for Home Affairs, Government of India, Bandi Sanjay Kumar-i Nov 19 nü Mokokchung semdanga Deputy Commissioner indang senden kilem nung Mokokchung district kübok sarkar telen balala (district machinery) aser mulungtet teloktem den sensaksem tajung ka menogo.

                Iba senden nung Mokokchung district kübok sarkar telen balala den State Bank of India (SBI) densema mulungtet telok Ao Senden aser Watsü Mungdang nungi ketdangsürtemi inyakyim balala nung timtem aser tebilemtsü ajuruba den nüngdakbatem lemsatep.

                Iba senden nung Union Minister of State for Home Affairs, GoI, Bandi Sanjay Kumar-i mapang tatsüka agia jembidang, Mokokchung nüburtemi pelaa agizükba den sarkar telen aser telok balalai sensaksem mapang koba tebilemtsü ajuruba den nüngdak balala lemsatepogo, itemji bener or central sarkar den lemsatepa tim lenmangtem bushitepa Northeast India songjen terenlok asoshi inyaktsü, ta metetdaktsü.

                Iba senden nung Mokokchung DC, Thsuvisie Phoji-i mapang tatsüka agia nüngdak ka lemsatepdang, Nagaland nung Industry tulu kecha maka asünung Corporate Social Responsibility (CSR) teyari mangur, anungji, Industry/Corporation tulu nungi talisa Mokokchung district renloktsü asoshi CSR teyari lenmang bushiba nung tongtibang agütsüdaktsünür, ta mepishia metetdaktsü.

                Ao Senden Tir, Marsanen Imsongi shilem agidang, küm talangka jembia aruba Naga yimden tebilemtsü ya “Framework Agreement” aser “Agreed Position” nung ajemdaker tekaratiba nung telatetba agütsüdaktsünür, ta ashi. India o Myanmar na yongzü (Naga nunger litsü) nung artsü atsü yanglutsü asalentong atongba, artsü tebilemtsü dak sentakba nung – Mokokchung district kübok Kangtsüng yim lushi ‘Septsüyong Lu’ nung Assam Police Commando Bn. Camp yanglutsü asoshi Union Ministry ajanga temelaba agüja mapa inyakdaktsüba, ano Mokokchung district kübok Tzürangkong range nung Union Ministry ajanga M/S Vedanta Limited (Division cairn oil & gas) nem totzü atsütsü temelaba agütsüba, Armed Forces Special Powers Act (AFSPA) agiintsü, item anema tezüluba nung kuli tejangja densema Ministerba nem amoktsüogo. Iba den Ao Senden Tirisa Mokokchung nung tzü agi nüburtem timtemba indang lemsatepa liasü.

                    Watsü Mungdang tir, S. Arenla Longkumeri mapang tatsüka jembidang, destitute women pension scheme ya küm talangka nungi temelenshi kecha maka asünung, tajungba renloka aotsü atema ashi. Iba den Mokokchung town telungtet aser yimtsüngtem nung gari lenmang majungba indang aser Mokokchung nung aonsotsü ayoker talisa tetsürtem tayokdak tesem maka, anungji, parnok asoshi tesem (maket) tajung ka nüngdaker, ta laisa metetdaktsü.    

                Sarkar telen PHE puri Mokokchung nung tzü tebilemtsü indang, Medical puri doctor agi anüngba aser ambulance nüngdakba, education puri tetsür hostel nüngdakba indang, SBI-i yimdak yimtsüng nung internet junga maliba ajanga mapa junga meinyaktetba, PWD puri Mokokchung nung PWD office mapang talangka merenemtetba, lenmang anepalutsü atema senotsü nüngdakba, Power puri staff meperiba, ITI ajanga skill development renloktsü atema nüngdakbatem, Food & Civil Supplies ajanga godown tasen nüngdakba, Social Welfare puri internet junga maliba ajanga mapang shitak nung mapa meinyaktetba, Mokokchung Municipal Council nungi counselor kadi Mokokchung nung Music Academy aser electric crematorium nüngdakba indang aser Forest dept-i Assam den artsü dak sentakba nung tebilemtsü ajurubatem ashi. Yamaji ano telen balalai tebilemtsü ajangshiba den nüngdakbatem lemsatep.  

Iba sensaksem senden temer külen Minister Bandi Sanjay Kumar-i Dr. Imkongliba Memorial District Hospital (IMDH), Mokokchung nung tang teinyakdak central-i teyari agüja yangluba mapatong kar semdanga project ketdangsür den sensaksema liasü.  

*****