Mokokchung, 14th Dec (www.nokinketer.in): Ongpangkong Mungdang-i ayonga ‘Ongpangkong Zünket Naklu’ ta sür Ongpangkong tzükongsanger Union Public Service Commission (UPSC) nung takok nguteter nem tetushi agütsüba sentong ka 14th Dec, 2024 nü Aongza Ki, Mokokchung town nung kaogo.
Iba sentong nung tajunshir Dr. P. Kilemsüngla-i jembidang, zünket naklu agizüker ajak nem tenüngsang agütsü. UPSC ya India lima nungbo tematiba jenjang lir, yimsüsüba tsütsü ibai tongtiret lir, alima aser kin ka tejakleni aotsübaji zünketer ket nung tashi lir, ta metetdaktsü.
Nenok dak koba tokolok shisatsü aser sempet tajung lir, itemji amshia nübur tenzüktsü aser ochi nung inyaktsübaji mezüngbuba teinyaktsü südaktsünür. Pei ajung atema masü saka kodasür nübur tebilemba aser sarkar taginüba tongdaktsütsü ta asüba dak rangloker inyaktsü lai ajungshi.
‘Tanü rongsen ang Tsüngrem kümdaktsür ochi laoa lir, aser iba jagi nübur kangshir. Tanü asen lima nung dang masü India lima ajunga nung ochi agi anünga lir’, ta lai ashi.
Tanü yimden yimsüsübaji reprangdangra “teraksa nung terayanga lir aser iba nung amendaker yimsü asütsü meranger”, ta lai ashi. Sarkari nüburtem asoshi senotsü teyari kanga yoker saka iba jagi nübur ket matonger, item temenen anema raratsübaji kanga tongtibang, ta laisa shisem.
Zünketertemi anir alima yanglutsüla aser ochimashi mapa anema raratsüla. Aji oda, parnoki ochimashi anema noktakaka nüburtemi parnokji menungitra iba tongpangji makoktsü. Yamaji zünketertemi tashi meitra nübur tashi mait akümtsü, anungji, ochimashi temenen tongpangji külemi raratsüla, ta laisa ajungshia liasü. Tanü alimai ochishir zünketer nüngdaka lir, ta lai shisem.
Aor nüngtugu nisung aika adokba ya asen tsüraburi tamang yimsü agizükba ajanga lir, anungji, temeshibai kin ka ajungketer ta asüba to asenoki mamatoktsüla, ta laisa ayongzük.
“Zünket jenjang nung alirtemi ajemalua pei sobaliba aser Tsüngrem tamatok” ta laisa ajungshia liasü. “Kodang ochi nung lidir aser ochibaji nok o nüji südir kechisarena akoktsü. Asükümer Tsüngremi noktanger aser Pa metetba nungji tapu ajak itaka lir”, ta laisa shisem. Laisa zünketertem atema sarasademtsütsü aser parnok mapa nung nungittsü mepishia metetdaktsü.
Zünket Naklu agizükertemji; Alemtemshi Jamir IAS, 1977 (Longsa), C. Lima Imchen IPS, 1977 (Longkhüm), asür L, Supongwati Longkumer IRS, 1981 (Küpza), asür P. Tiatemsü Pongener IRS, 1999 (Ungma), Imkongla Jamir IAS, 2002 (Chungtia), Sallong IRS, 2002 (Aliba), Imlimeren Jamir IRS, 2004 (Ungma), Unil Kichu IPS, 2012 (Khensa), Moatenla IRS, 2012 (Mangmetong), Aotula T. Imchen IPS, 2014 (Mangmetong), Imsennaro Walling IFS, 2022 (Khensa) aser Imsürenla Longkumer IA & AS, 2023 (Ungma) par 12 liasü. Parnok rongnung Alemtemshi IAS Rtd, C. Lima Imchen IPS Rtd aser Aotula T. Imchen IPS par asem dang tsüngtong arua aden.
Züngket Naklu agizüker nungi Alemtemshi IAS Retd-i jembidang, nisungi kodang tetushi agütsüdir, idangji tenzükba mapa nung tali ajungshir. Iba sentong ya zünketer ajungshiba dang masü iba ajanga Ao kin rongnung zünketer jenti adokdakjang ta moaja metetdaktsü. Iba tetushi sempet ya chirnur semchisemnur tashi amangyonga aotsü, ta paisa shisem.
C. Lima Imchen IPS Rtd.-i jembidang, takok ngur külen mezüng anogo nungi khuret bena nübur tenzüktsüla. Nisung aikadi rongsen dang bushir, anungji, yamaji mesüi ochiba tenzüktsü lanurtem ajungshia liasü.
Aotula T. Imchen IPS-i jembidang, iba sentong ajanga onok mapa nung tali tenendakba nung nübur tenzüktsü ajungshir. Yangi tsürabur aser senior-tem ya onok asoshi tajungshir kaka lir, kenübo parnok amaji akümtsü ta sür meranga azüng. Ano lanur zünketer jenti adoktsü ajungshidi, ta ayongzük.
Iba sentong nung nung Ongpangkong Mungdang tir, Lipokmeren Jamiri tarur ajak pelaa agizük, Prof. Lanusashi Longkumeri züngket naklu sentong tenzükba ratet lemsatep. Telok kadi tsürabur T. Senka Ao-i züluba aser Temsuyanger Jamiri mejemba naklu ken “yimsowar” aten. Iba sentong Rev. Talijungla Longkumeri temoatsü meshia sarasademer tenzük aser Rev. Pongen Longchar den tenüngsang agüja sarasademer tembanga liasü.
*****
The Nokinketer 