Revive Mokokchung Prayer Movement (RMPM) teloki tan January ita 9-12, 2025 anogo pezü nü tashi yangi Imkongmeren Sports Complex, Mokokchung nung ‘Revive Mokokchung Youth Crusade’ sentong tuluka ayongzüka lir. Iba osangji Jesus Calls Prayer Tower, Longkumer Kilem nung osangbener senden ka ayonga amendang RMPM teloki metetdaktsü.
Iba revival ya talisa lanurtem dak rangloker akar. Tanü lanur jenti sentepi aotsü mejangrar, yimya tamajung (addiction) balala agi tonger lir. Kar mozümora achiba, yi ajemba, mobile phone amshiba aser game asayaba, lanurtem aika teimla makai nemzübapurtem lir. Anungji, item dangi atongtsü nükjidong yur iba asendenshi sentong ya akar, ta RMPM Core Committee Convenor, Pastor Imliwapang Jamir-i metetdaktsü.
Revive Mokokchung Prayer Movement ya 2020 küm denomination mesüra nisung kecha mereprangi Mokokchung nüburtem rongnung asendenshi aser temelenshi ka adokdaktsütsü tejangraba nung sarasadema tentetba ka lir. Sarasadema ataba mapang Tsüngremer tejembiba nung iba youth crusade sentong ya ayongtsü lemtet, ta pai ashi.
Iba sentong nung Tsüngrem osang abenertemji – Rev. T. Meren Jamir, Rev. Kilang Jamir aser Rev. Shan Kikon par asem jaoka lir. Item sayutsüngirtem ya Tsüngremi amshibapurtem lir, anungji, tejangrar ajak arua Tsüngremer temoatsü agitsü ayongzüker, ta paisa shisem.
Nagaland nung 1952 küm revival tulu ka adok, iba sülen ano 1976 nung Nagaland rangben nung revival milak jangruba otsü lir. Tenüngsang Ken 85:6 nung aliba ama onok tanüngba olaji lir, anungji, Tsüngremi iba revival nung mapa tulu inyakang ta amangbapur ajaki sarasadem nung nungitdaktsünür, ta paisa mepishia metetdaktsü.
Tanba iba revival ya lanurtem dak rangloker agir, kechiyong lanurtemji tarutsü lenirtem lir, ta Core Committee züngsem tsürabur M.B Longkumeri ashi. Iba revival agitsü atema rongsen nüngdak saka teka nung senjang kata mali tenzük, saka tanübo nüburtemi rongsen jenti bendentsüdar, imlar budget yangluba dang nungi teimba arutsü aser revival sülena ano follow-up sentonga agitsü tebilemba lir, ta paisa shisem. 1976 revival indang temoatsü tanü tashi agia arur rongnung paa ka lir, ta paisa menungraseta lemsatep.
Iba revival mapang T. Shirt aser Sweatshirt (hoodie) tola-tem ayoktsü, iba nungi tajangzükba anguba senji revival maparen nung amshitsü, anungji, iba nungjia nüburtemi nungitdaktsünür. Iba den ano tsüngtong maruteter atema osang tajung kaji revival sentongren ajak ‘Live’ yoktsü, ta Core Committee züngsem, Majem Longkumer-i metetdaktsü.
January 9 nungi 12 tashi sentong ajak Imkongmeren Sports Complex, Mokokchung nung aonung 5:00 ako nungisa tenzüktsü. Jangratemtsükaji January 11, Honibarnüji taneptsüba (healing crusade) sentep temeja ka alitsü. Iba sentongjibo lanurtem atema dang masü tejangrar ajak asoshi alitsü aser ibai youth crusade ka süaka sentep ajak nung tsüraburtema pela shishia jaoker, ta tayongertemisa metetdaktsü.
*****
The Nokinketer 