~ Wati Longchar (Ekhranipathar)

Clean election, NLTP issue, aser Naga yimden latetba maparen balala nung arogoi shilem magitsüla ta aiben jembiba social media nung züngshir.  Tanela tekümtet asoshi dang inyaktsü arogo jatet ta Lai kuli mali aser aji Yisu Khrista tesayuba anema lir. Lokti teraksa mapa nung arogo shilem mali ta asübaji “heretical teaching and understanding” lir aser yamaji odi süra arogo kulisüba iba lima yanglushiba nung nüngdak mali akümer.

Arogo Kimung aser Alima

Taküm aliba Tsüngrem  shiba pei ajaso chir Yisu Khrista alima meimchir tekümtet asoshi kangki nung meta, asü aser anogo asembuba nung shia aru, aser shiba asen den lir, aser Pa tanaben o bendangtsü arutsü ta amangba kimung nung arogoji yanger. Taküm Tsüngrem aser Yisu Khrista züi alangzükba puri akümba arogo asünung putu balala nung tiyazü tesayuba, tetepsetsüba,  aser rishikangshi  ajanga arogo samadaktsütsü merang, saka arogo tashi taitba taitba dang küma alima kin ajakleni prokshia ao.  Yisu Khrista taküm aser ochi tesayuba nung arogo kimung yanger asü nungji arogoji, meimchir tashi mait aika liaka, temeshi aser tokolakji Yisu Khrista ta angatetba nung arogo maparen ajak inyaktsü aja ta angatetdi.

Iba lima nung arogo yanger aser iba lima yanglushitsü jatet.  Tekümtet, nüchi kümdaktsüba, taneptsüba mapa, ochimashi lenir anema ochi ayimoktsüba maparen balala inyaktsü Tsungremi arogo nem nungloktsü.  Ibai Tejen aser Tasen Lai nung kuli tejanga angur. Yisu Khristai Pai alimai yokba nükjidong, koba dang ‘Nazareth Manifesto’ ta ajar (Luk 4:18-19) nung jangja janga zülua angur. 

Nazareth Manifesto nungji Arogo tenyabaji tanela asoshi dang masü saka temang rangben asoshi ta sayur.  Temang rangben tekümtet ta asüba nungji lokti taküm, yimden, tamangba maparen aser rongsenketzüng ochi inyakba ajanga dang bener arutet. Tsüngremi arogo nem alima dangi teimla, yimjung aser tesünep bener arutsütsü tenyaba mapa nungloktsü.  Tashiyim, sen, ashi-külak maparen aser tiyazü olulu agi masü, saka ochi mapa, temeim mapa, bendanga agütsüba, aser kechisarena nung Tsüngrem tiyongtsü sür tenyaba mapa inyakra arogoi alima dangi temoatsü bener arutsütsü. Arogoi tanela mapa nung dang temulung agütsütsüla ta süra ibajibo Lai tesayuba masü ta angatetdi.  Lepshia ashir: Arogo jatetba tongtibang kaji sama-a aliba purtem tekümtet dangi anitsü, shisabulua, temulung zürepa aliba pur nem teimla agütsütsü, jentoka aliba pur dang nüchi kuli sangoktsütsü, shirang-shiko, asü-ama mapang rongjenseta aser shisabulua aliba mapang anisüngzük o, aser tanela nung azüla oa alirtem dang Tsüngrem o tim sayua indaktsütsü arogo nem khuret agütsü.  

Yisu Khristai nungloktsüba tenyaba mapa nungji tetsür-tebur, tanur-tain, takar-sensaker, temenenpur-temeshipur, tabensa-matamabensar, Yihuda nunger, Samaria nunger, Greek nunger, Rom nunger, kin-kidong balala, oshioben balala ajak züngoka lir, ajak kasa dang aser tebendang mali.  Iba tenyaba mapa nungji Yisu dak amanger ajak dena lir aser Tematiba Tsüngrem nungi tajabaji arur asü nungji meimchir shingaia shinga Tsüngrem ochi kulisüba nungi noktangtsü makok. Alima yimden-yimli ama arogo yangera, alima tashi agi anokshitsü aser laotsü. Alima tashi, rongsen agi arogo manokshidaktsünüra alima sobaliba yimden-yimli inyakyim benoka mamshitsüla aser tenzuker ochi agi kuli asütsüla.

Alima Yimli aser Kotak Yimli Tesendtaktep

Nisung aikadi tanela aser shi taküm ya tesentaktep mali amai jembir saka aji Lai tesayuba masü. Alima yimli aser kotak yimli anaji sentaktepa lir. Tsüngrem meimchir rongnung iba lima nung jungkai adok. Tematiba Tsüngrem chir Yisu Khrista alima nung aso, nüburtem den ali aser  pa tenzükba mapaji iba lima nung  inyakdang alima meimchir ochimashi yimsüsür ket nung kangki nung tepset. Yisu Khristai tanela tekümtet asoshi dangbo kodanga meinyak aser mesayu. Kechiaser tanela aser shi taküm mepilatet sentaktepa lir, aser meimchir taküm rangben tekümtet asoshi Yisu Khristai taküm agütsü

Arogo lanu putu Gnostic tesayuba agi arogo kanga mangmangdaktsü. Parnoki tanela aser shi taküm asangsang nung sentaktepa mali ta sayu. Tsüngremji tanela aser tanelai shi akümtsü makok. Tsüngrem meimchir shi aküm ta sayubaji tai ta sayu. Yisu Khrista Tsüngrem dang nungi tilaba, aser kangki nung shi temang kangshiba ama mekangshi. Yamaji shi aser tanela tesentaktep mali ta sayuba anema arogo tamangtirtemi aitsü aser magizük. Iba mesükba ama nisung aikadi arogo mapaji `soul winning’, tanela tekümtet asoshi dang jembir aser social justice, community development, clean election, yi tongbang ama nung shilem magitsüla ta jembir. Item olulu ya Lai tesayuba masü kechiaser Laishibai temang rangben tekümtet asoshi kuli agütsür. Tejen lai putu ainkartemi ochimashi yimsüsür aser inyakyim anema tasü itta Tsüngrem obendangba sangoktsü. Asen Kibuba Yisu Khrista ochimashi aser anemsü lenir anema ola adokba ajanga kangki nung meta. Kasaji taküm rangpen tekümtet asoshi inyaktsü aser ochi ola adoktsü arogo jatet ta angatetdi.

*****